نیسان 23, 2019

لە كۆلێژی ئەندازیاری هونەر و ئەندازە ئاوێتەی یەك دەبن

كاتژمێر 10ی سەر لەبەیانی ڕۆژی دووشەمە بەرواری 15/4/2019، بەشی تەلارسازی كۆلێژی ئەندازیاری زانكۆی سەلاحەدین، پێشانگای ساڵانەی بەشەكەی دەكاتەوە و بۆ ماوەی دوو ڕۆژ بەردەوام دەبێت.
پێشانگای تەلارسازی پێك دێت لە نمایشكردنی كار و بەرهەمەكانی قوتابیانی بەشی تەلارسازی بە مەبەستی دەرخستنی بەهرە و تواناكانیان لە ڕێگەی ئەو دیزاین و بیرۆكە جیاوازانەی كە قوتابییان هێناویانەتە بەرهەم.

لەم باریەوە (محەمەد سووركێو شەریف) ڕێكخەری پێشانگاكە بە (هەولێر)ی گوت: ساڵانە لە بەشی ئەندازیاری تەلارسازی زانكۆی سەلاحەدین پێشانگا دەكرێتەوە، ئامانج لە كردنەوەی ئەو پێشانگایەش دەرخستنی توانا و بەهرەی قوتابییانی بەشی تەلارسازیە، مەبەست لە كردنەوەی ئەم پێشانگایانەش هێنانەدی بیرۆكە و دیزاینی جیاوازی ئەندازیارییە، خۆشبەختانە لەم بوارەشدا ساڵ لە دوای ساڵیش بەرەو پێشچوونەكان ڕوونتر و بینراو ترن.
گوتیشی: بەشێكی تریش لە پاڵ پێشانگا گرنگی پێدەدرێت ئەویش بوونی (گەلەری هونەری)یە، كە ساڵانە بەشێكە لە پێشانگاكە، كە تێیدا تابلۆی هونەری كێشراو و كاری دەستی قوتابیان نمایش دەكرێت، دەربارەی هونەر و تەلارسازی و بابەتی تری جیاواز، ئەمەش بۆ زیاتر بەرچاوڕوونیە كە ئەندازیاری تەلارسازی و هونەر دوانەیەكی لێك دانەبڕاون و هەردووكیان بە یەكەوە گرنگی و جوانی دەبەخشن بە كارەكان، هەروەها لە پاڵ ئەم چالاكیانە چەندین چالاكیی تری جۆراو جۆر و چێژبەخش بۆ میوانانی خۆشەویستئامادە كراوە.
ئاماژەی بەوەش دا: لە گەلەریی هونەری زیاتر لە 25 تابلۆی هونەری بەشداری پێكراوە كە بابەت و ستایلی جیاواز لە خۆی دەگرێت، وەك هونەری تەلارسازی و هونەری سروشت و مرۆڤ و تابلۆی واتا بەخشی تریش كە هەریەكەیان تایبەتمەندی و ماندووبوون و بیرۆكەی ناوازەی پێوە دیارە.
لە كۆتایشدا گوتی: گرنگی تەلارسازی لەوە دایە كە هەریەك لە هونەر و ئەندازە ڕۆڵی باڵایان هەیە لە سەركەوتنی هەر پڕۆژەیەكدا، لەگەڵ لە دایك بوونی هەر بیرۆكەیەكی نوێ لە لایەن ئەندازیاری تەلارسازەوە، پێویستە هونەرێكی ڕێك و خوێندراو لە پاڵ كارە ئەندازیاریەكەی ڕەچاو بكات، چونكە هونەر و تەلارسازی لە یەكتر جیا ناكرێنەوە و بە یەكەوە پڕۆژەیەكی سەركەوتوو دێننە كایەوە.

 

سەرهەنگ غەریب - هه‌‌ولێر

© 2017 Hawler