تەمموز 19, 2019

شەهیدی ڕاپەڕین جەوهەر باپیر هەمیشە لە بیر و هزرماندایە

 شەهیدی ڕاپەڕین هونەرمەند و پێشمەرگە (جەوهەر باپیر) ئەو هونەرمەندە پڕ بەخششە بوو كە دڵ و دەروونی لێوانلێو بوو لە ئەشق و خۆشەویستی هونەر و نواندن، بۆیە هەر كاتێ دەستی لە ئیش بەر دەدا بێ ئەوەی پشوویەك بدات و كەمێك ماندووبوونی خۆی بحەسێنێتەوە، یەكسەر خۆی دەگەیاندە سەر تەختەی شانۆ بۆ ئەوەی لەگەڵ هاوڕێی و هەڤاڵە هونەرمەندەكانی دەست بە پڕۆڤە بكەن و لە هونەرەكەی دانەبڕێ كە پیرۆزترین شت بوو لەلای، لە كاتێكدا قوورسترین كاری دەكرد ئەویش فیتەری بوو، ئەوا لە نواندنیشدا بە گەواهی هەموو لایەك هونەرمەندێكی تا بڵێی لێزان و بە سەلیقە بوو بۆ هونەرەكەی بۆ ئەوەشیان ئێمە هیچ ناڵێین و ئەرشیفە دەوڵەمەند و پڕ ئەفراندنەكەی گەواهی ئەو ڕاستیەی بۆ دەدەن و بە گەورە و بچووك دەڵێین: "مەحاڵە كەسێكی وەك جەوهەر باپیر لە مێژووی شانۆی كوردیدا دووبارە بێتەوە".


 ئەوەی كەمێك بە دیقەتەوە سەیری كارەكانی ئەو هونەرمەندە شەهیدە بكات ئینجا دەزانێ لە مێژووی هونەری خۆیدا چۆن نواندێكی بێوێنەی نمایش كردوە بێ ئەوەی لە ناوەندێكی ئەكادیمش بخوێنێ و دەربچێ و هەر خۆڕسكانە ملی دابووە بەر هونەر و تێشیدا سەركەوتوو بوو كە یەكێك لەو كارانەی كە تا ئەمڕۆكەش لەسەر زاری گەورە و بچووك بە زیندوویی ماوەتەوە چیرۆكی تەمسیلی (تاپۆ هەقی چیە) بوو كە ئەو زۆر بە سەركەوتوویی ڕۆڵی (خدری لۆبیا فرۆش) ی تێدا بینی و توانیی ئیبداع و ئەفراندنێكی بێوێنەی تێدا بكات، بە تایبەتی كاتێك خانووەكە لە حاجی یادگار دەكڕێ و لە پێش دادوەر ئیمزای بۆندی خانوەكە دەكەن و، دەڵێ: (من خاردەمە لوبیای یان خاردەمە خیندنێ)، بەڵام چی دەكرێ لەگەڵ قەدەری خوای گەورە و بە داخێكی زۆرەوە ئەو هونەرمەندە لە ڕاپەڕینە پڕ شكۆدارەكەی ئاداری 1991ـدا بە خوێنی ئاڵی بەرگریی لە خاكی پیرۆزی كوردستان كرد و، لە شەڕێكی دەستە و یەخەدا و لە ڕۆژهەڵاتی شاری هەولێر نزیك سیمی خاتووناوە بەدەستی بەعسیەكان شەهید كرا و، ماڵئاوایی یەكجارەكیی لێكردین، دەبێ بگوترێ هونەرمەند و پێشمەرگەی شەهید (جەوهەر باپیر حەمەدەمین)، ساڵی 1952 لە شاری هەولێر لەدایك بووە، فیتەرێكی لێهاتوو بووە و لە پاڵ ئەوەشدا ئەشقی شانۆ و نواندن بووە و هەر لەو ڕێگایەوەش توانیویەتی خزمەتێكی بەرچاو پێشكەشی جەماوەرە خۆشەویستەكەی بكات و، لە چەندین كاری شانۆیی و تەلەفزیۆنی وەك "شێتەكانی ئەم ڕۆژگارە و لۆ تێم ناگەن و ئاسكە و میوانی ناوەخت و" چەندین كاری دیكە بەشداری بكات، بەڵام دیارترینیان درامای تەلەفزیۆنی (تاپۆ هەقی چییە) بوو، كە ئێستاشی لەگەڵدا بێت لە نێو هەموو خەڵكی دەنگی داوەتەوە و تێیدا ڕۆڵی (خدری لۆبیا فرۆشی) بینیبوو، هەر بەو كارەش زیاتر لەنێو خەڵكەكە ناسرابوو، بۆیە لەو یادە پڕ شكۆیەدا هەزار سڵاو بۆ گیانی پاكی شەهید جەوهەر باپیر و سەرجەم شەهیدانی كورد و كوردستان دەنێرین. هەر وەك ئەمانەتێكی ڕۆژنامەوانیش دەبێ ئەوە بەرچاو بخەین كە برای شاعیر و نووسەرمان (ئاری ئاغۆك) وەك خەمخۆرێك دووەمین ساڵە لەسەر یەك لەسەر شاشەی تەلەفزیۆنی ڕەسەن بە بەرنامەیەكی تێر و تەسەل بەناونیشانی (یاد و وەفا) یادی ئەو كەڵە هونەرمەند و پێشمەرگەیە دەكاتەوە و، هاوڕێیەكانیشی بە چەندین پەیڤی جوان و ناسك باس لە ڕۆژە گەشەكانی ئەو هونەرمەند و پێشمەرگەیە دەكەنەوە و، لە بەرایشدا مامۆستا (چەتۆ حەسەن) دەڵێ: ئەگەر باسی هیچ شتێكی شەهید جەوهەر باپیر نەكەین، دەبێ باس لە تەمسیلی (تاچۆ هەقی چیە) بكەین، كە لەگەڵ هونەرمەند (سەلام كۆیی) توانیی ڕۆڵێكی سەرەكی یەكجار مەزن ببینێ و دڵی هەموو لایەك خۆش بكات، بۆیە ئەو هونەرمەندێكی بێوێنە بوو، لەلایەكی دیكەوە هونەرمەند (سەلام كۆیی) دەڵێ: لەو بڕوایەدا نەبووین شەهید جەوهەر بەو ماوە كوورتە ئەو ڕۆڵە بەرچاوە لە (تاچۆ هەقی چیە) ببینێ، بە جۆرێك من بە هەولێرییەكی تۆخ قسەم دەكرد، ئەویش بە كرمانجیەكی دەشتەكیی خەست خەست قسەی دەكرد، بەبێ خۆگوشین ئەو ڕۆڵەی ئەدا كرد، بۆیە لەو یادەدا دروود بۆ گیانی دەنێرین. هونەرمەند (عەلی ئەحمەد) یش بە سەرسووڕمانەوە دەڵێ: نازانم لەو یادەدا باس لە چ لایەنێكی ئەو هونەرمەندە بەرزە بكەم، چونكە شەهید جەوهەر پێشمەرگە بوو، سیاسی بوو، نەتەوەیی بوو، هونەرمەندێكی لێهاتوو بوو، شەهید جەوهەر سیفەتێكی زۆر بەرزی هەبوو ئەویش دوژمنی گەورەترین دوژمنی كورد بوو، هەزاران ڕەحمەت لە گۆڕەكەی بێت، هاوسەری شەهید (جەوهەر باپیر) یش دەڵێ: كاتێك هەولێر داگیركرایەوە، جەوهەر خۆی بۆ نەگیرا و چەكەكەی كردە شانی بۆ ئەوەی بەرگری لە شاری هەولێر بكات، بەڵام بەداخەوە لەو بەرگرییەدا شەهید كرا. ئەوە بوو ئێمە دوای 10 ڕۆژ ئینجا زانیمان شەهید كراوە، هەر لەو یادەدا برایەكی شەهید دەڵێ: من وەك برایەكی شەهید جەوهەر باپیر زۆر شانازی بەو برایەمان دەكەین كە لە پێناو خاك و شاری هەولێر شەهید كراوە، كاتێ بەرهەمەكانیشی لە كەناڵەكاندا دەبینین زۆر هەست بە غەمباری دەكەین، بەڵام لە هەمان كاتیش دڵمان پێی خۆشە، كە ئەو بەو ئەشق و خۆشەویستیەوە خزمەتی هونەری شانۆ و تەمسیلی كردوە.

 

محەمەد سەعید كوردە - هه‌ولێر

© 2017 Hawler