ئازار 22, 2019

(میدیا حوسێن) : "هونەری میللی هونەرێكە لەنێو هەموو چین و توێژێك جێگەی خۆی دەكاتەوە!"

هونەرمەندی بە ئەزموونی گۆرانیبێژ (میدیا حوسێن) لە میانەی دیدارێكی دا خوێنەرانی "هەولێر" ئاماژە بۆ بەرهەم هێنانی چەند گۆرانییەكی تازە دەكات، لەوانە گۆرانییەك لەژێر ناوی (هەیاران و مەیاران)، كە ئەو گۆرانییە جیاوازییەكی باش دروست دەكات، بە بەراورد لەگەڵ بەرهەمەكانی پێشووی، هەروەها ئاماژە بۆ ئەوەشدەكات هونەری گۆرانی میللی لە ئێستادا تێكەڵییەك و بێسەرو بەرەیەكی زۆری پێوە دیارە، دیارە ئەوەشیان هۆكارەكەی تەنها بۆ گۆرانیبێژەكان دەگەڕێتەوە نەك هونەرەكە، هەروەها بەشێكیشی پەیوەندی بە دەزگا راگەیاندنەكانەوە هەیە بەتایبەتی تیڤیەكان!.

لەدەستپێكی قسەكانی دا لەو دیدارەدا هونەرمەندی گۆرانیبێژ (میدیا حوسێن) دەربارەی بەرهەمە تازەكەی گوتی : "دیارە هەبوونی بەرهەمی تازەی هەر هونەرمەندێك پەیوەستە بەلایەنی مادییەوە، چونكە سەرجەم سێكتەرەكانی بەرهەم هێنان هونەر لەئێستادا ئەوەندە سەخت بووە، زۆر ئەستەمە بەبێ بوونی پارە بتوانی گۆرانییەك بە دڵی خۆت كاری میوزیك و تۆماركردن و ڤیدیۆ كلیپی بۆ بكەی، ئێمەش چەندیین ساڵە لەسەر ئەرك و گیرفانی خۆمان گۆرانی دەڵێن، ناشكرێت هەر بەو شێوەیە بەردەوام بین!".
لەبەشێكی دیكەی قسەكانی دا (میدیا) ئەوەشی خستەروو : "لەدوای (35) لەكاری هونەرییم، لەو ماوەیەدا سپۆنسەرێك بۆ كارە هونەرییەكانم دروست بوو، ئەوەشیان لە نێو هەست و دڵسۆزی هاوڕێیەكم بۆ كاری هونەریی و خەمخۆری بۆ هەبوونی بەرهەم رەسەن و كوردەواری، سوپاسی (بانكی ئەربیل) كە لە شاری سلێمانییە بنكەی، بە سپۆنسەری یەكێك گۆرانییە تازەكانم بۆ ئەوەی كاری تۆمار كردنی بۆی بە ئەنجام بگەینم، هەروەها پێویستە ئەوەش بڵێم كۆمپانیای (بابیلۆن میدیا) ئەركی وێنەگرتنی ڤیدیۆ كلیپی گۆرانییەكە دەخەنە ئەستۆی خۆیان، كە لە راستی دا تا ئێستا بەتەنها كۆمپانیای بابیلۆن بۆ بەرهەم هێنانی گۆرانییەكانم هاوكارییەكی زۆر باشیان كردووم بۆ من و زۆربەی هونەرمەندان ئەو كۆمپانیایە ئەو هەوڵەیان هەبووەو منیش لەلای خۆمەوە سوپاسی ئەو هاوكارییان دەكەم.
هونەرمەند (میدیا حوسێن) لەبارەی ئەو ڕەوشەی لە ئێستادا گۆرانی میللی پێیدا تێپەڕ دەبێت و لەمبارەیەوە گوتی : "هونەری میللی لە هەموو دونیادا هونەرێكی بەرزەو، دەتوانم بڵێم لەپێشەوەی زۆربەی هونەرەكانی دیكەوەیە، چونكە هونەری میللی هونەرێكە لەنێو هەموو چین و توێژێك جێگەی خۆی دەكاتەوە، هەروەها دەكرێ بڵێین هونەری میللی دەبێتە ناسنامەی هەموو گەلێك، بۆ ئەوەی بەباشی كەللتور و فەرهەنگیان بناسیت، سەیر بكەن هونەرمەندێكی وەك (چارلی چاپڵن) و هونەرمەندێكی میللی بوو، تائێستاكەش هاوتای ئەو لەنێو دونیا كۆمێدی دا بوونی نیە، میوزیكژەنێكی وەك (مۆزارد)، كە میوزیكژەنێكی میللی بوو، تا ئێستاكەش بووە بە ناسنامەیەكی دیاری نێو گۆڕەپانی میوزیك، لە كوردستانی خۆشمان كەسانی وەك (حەسەن زیرەك، محەمەدی ماملێ، ئەحمەد شەماڵ، جەلال سەعید)ـو دەیان هونەرمەندی میللیمان هەبووە، جێگەو پێگەیان ئەوەندە بەرز بووە تا هەتایە بیر ناچنەوە!، بەڵام بەداخەوە هەندێك بەناو هونەرمەند هونەریی میللیان شێواندووە، كە پێویستە هەڵوەستە لەسەر كاری ئەوان بكەین و بڵێین هونەری میللی هونەرێكی بەرزە، بەڵام هەموو كەس ناتوانێ ئەو بەرز و جوانییە بپارێزێت، بەداخەوە كەناڵەكانیش وایان كردووە، بەشێك لەو بەناو گۆرانیبێژانە بكەن بەماڵ بەسەر گۆرانی كوردییەوە، كە بەداخەوە نابێت وابێت، چونكە هونەری میللی هونەرێكە پڕە لە رەسەنایەتی و فەرهەنگ و كەللتور!".
لەبارەی بەرهەم هێنانی گۆرانییە تازەكەی (میدیا حوسێن)ـی هونەرمەند گوتی : "ئەو گۆرانییە ئاواز و تێكستەكەی خۆم دامناوە، لە ژێر ناوی (هەیاران و مەیاران) كارم بۆ كردووە، ناوەرۆكی هۆنراوەی گۆرانییەكە، فۆرمێكی تازەم بەكار هێناوە، هەوڵمداوە ئەو گۆرانییە ببێتە كارێكی تازە لە مێژووی كارە هونەرییەكانم، هەروەها هەوڵمداوە شێوازی گوتن و كاری میوزیكی بەرهەمەكەش، كارێكی باش بێت، هیوادارم لە ئایندەیەكی نزیكدا سەرجەم كارەكانی تەواو بێت، بۆ ئەوەی بتوانین لە رێگەی كەناڵەكان بینەرە بەڕێزەكان بیبینن، جگە لەو بەرهەمەش چەند بەرهەمێكی دیكەم ئامادەیە، بەڵام نازانم و كەی دێتە بەرهەم!".

 

عەبدولغەفار عەبدوڵڵا-هه‌ولێر

© 2017 Hawler