ئازار 22, 2019

لە 30 ساڵەی كۆچی دوای هونەرمەند (محەمەد شێخۆ) دا

دوای تێپەڕبوونی 30 ساڵ بەسەر كۆچی دوایی هونەرمەند دەنگخۆش و مویكژەن محەمەد شێخۆ بە گرنگی دەزانین چەند پەیڤێكی وەفاداری بۆ بنووسین و لایەنە هونەری و كۆمەڵایەتیەكەی بەرچاو بخەین، محەمەد شێخۆ لە ساڵی 1948 لە گوندی (گرباوی) قامشلۆب سوریا لە دایك بوە و هەر لە ساڵی 1968 وە تێكەڵ بە دنیای هونەر بوە كە ئەو كاتە تەمەنی 20 بەهار بوە بە جۆرێك لە وڵاتی لوبنان چوار ساڵ وانەی موزیك دەخوێنێ تا بە شێوەیەككی ئەكادیمی گۆرانی و موزیك ئەدا بكات، ئەگەرچی پێشتر مەشق و ڕاهێنانێكی زۆریشی لەسەر ئامێری تەنبوور كردبو تا ئەندازەیەكی زۆریش شارەزایی ئەو ئامێرە بوو، بەڵام سەرەتا بە گۆرانی فۆلكلۆری ڕەسەن دەستی بە گۆرانی گوتن كردوە و یەكێك بوە لە ئەندامە چالاكەكانی تیپی (سەركەوتن) و شان بە شانی ژمارەیەك هونەرمەندی وەك سەعید یوسف و مەحمود عەزیز شاكر و ڕەمەزان نەجم و چەندین هونەرمەندی دیكە، ئەو هونەرمەندە خاوەن دەنگێكی خۆش بوە و بە ستایلێكی زۆر تایبەت گۆرانی چڕیوە، هەر بۆیە سەرۆكی وەزیرانی ئەوكاتەی لوبنان كە ناوی (شائیب سەلام) بوو زۆر بەو دەنگە كاریگەر و موعجەب بوە، هەروەها خانمە گۆرانی بێژی عەرەبی بەناوبانگ (سەمیرە تۆفیق) داوای لێكردوە لێی نزیك بێتەوە و كە گۆرانی لەگەڵ بڵێ و لە بواری گۆرانی و موزیك سوودی لێ ببینێ، بەڵام لە ساڵی 1973 وڵاتی لوبنان بەجێ دەهێڵێ و دەگەڕێتەوە عێراق و لە شاری كەركوك دادەنیشی، پاشان دەچێتە شاری بەغدا لەگەڵ هەریەك لە هونەرمەندان شەماڵ سائیب و محەمەد عارف جزراوی و تەحسین تەها و گوڵبەهار و بەشار زاخۆیی لە ئێزگەی كوردی ئەوێ خەریكی گۆرانی گوتن بوە، جگە لەوەی چەند گۆرانیەكیشی لە بەشی كوردی تەلەفزیۆنی كەركوك تۆمار كردوە و ئێستاش ئەو گۆرانیانە لە ئەرشیفی ئەو تەلەفزیۆنە ماوەتەوە، ئەو هونەرمەندە زۆر بە كەسایەتی بارزانی نەمر كاریگەر بوە، بۆیە ئەو هەلە زێڕینەی بۆ هەڵكەوتوە و بە خزمەتی گەیشتوە و بارزانی نەمریش زۆر بەگەرمی پێشوازی لێكردوە و ڕێزی گرتوە،ئەو هونەرمەندە جگە لە لایەنە هونەرییەكەی لەسەر بیر و باوەڕی كوردایەتی و گۆرانیە كاریگەرەكانی خراوەتە زیندانەوە و ئازار و ئەشكەنجەیەكی زۆری بینیوە و زۆر بە سەختی ئازار دراوە تەنانەت نینۆكەكانیان دەرهێناوە و پەنجەیان شكاندوە، جا لەدەرئەنجامی ئەو هەموو ئازار و ئەشكەنجە و نەهامەتیەدا تووشی نەخۆشیەكی لەناكا و كتوپڕ بوە و ئەوەش وایلێكرد باری تەندروستی بەرەو خراپی بڕوات تا لە ڕۆژی 9 ی ئاداری ساڵی 1989 بۆ دوا جار كۆچی دوایی كرد، بەڵام لە ژیان و دوای مردنیشی توانی سەروەرییەكی بێ وێنە بۆ خۆی و میللەتەكەی تۆمار بكات كە هەموو لایەك بە شانایەوە یادی بكەنەوە.

 

محەمەد سەعید كوردە-هه‌‌ولێر

© 2017 Hawler