ئازار 22, 2019

"تا ئیستاكەش ئێمەی هونەرمەندانی كورد هونەرەكەمان بووە بە بەشێك لە ژیانمان و، دەبێ وەك مناڵەكان بەخێوی بكەین!"

هونەرمەندی بە ئەزموونی گۆرانیبیژ (سابیر كوردستانی) بەیەكێك لە هونەرمەندە بە ئەزموونەكانی نێو گۆرەپانی گۆرانی كوردی دادەندریت و، (كوردستانی) خاوەنی چەندیین بەرهەمی ناوازەیە، كە چەندیین ساڵە لە نێو هزر و یادەوەری گوێگران و هونەردۆستان بە زیندووی ماوەتەوە.

ئەو هونەرمەندە بە ئەزموونە لەمیانەی لێدوانێكی دا بۆ خوینەرانی (هەولێر) تیشكدەخاتە سەر چەند لایەنیك لەكارە هونەرییەكانی بەتایبەتی بەرهەم هینانی چەند گۆرانییەكی تازەی دەمیكە تۆماریكردوون، بەڵام تا ئێستا نەیتوانیووە ڤیدیۆ كلیپیان بۆ بكات، ئاواتە خوازە لە داهاتوویەكی نزیكدا پشتكگیری بەرهەمەكانی بكەن، بۆ ئەوەی بتوانی بڵاویان بكاتەوە.
لە دەستپێكی قسەكانی هونەرمەند (سابیر كوردستانی) لەبارەی هەبوونی بەرهەمیكی تازەی رایگەیاند : گۆرانییەكی تازەم بەدەستەوەیە لە ژێر ناوی (لاوە) تۆمارم كردووە، كە لە هۆنراوەی مامۆستا (رازی)ـ و ئاوازەكەشی خۆم دامناوە، بەشیوەیەكی باش و پر لەو هەستەی كە خۆم بەخاوەنی دەزانم لە چرینی گۆرانییەكانم هەر بەو شیوەیە تۆمارم كردووە.
ئەو هونەرمەندە بە ئەزموونە لە بەشیكی دیكەی قسەكانی دا ئاماژەی بە ئەوەشكرد : هەوڵمداوە لەڕووی موزیكەوە گۆڕانكارییەك بكەم، چونكە لە ئێستاشدا جۆر و فۆرمی گۆرانی تارادەیەكی زۆر گۆڕاوە، بۆیە منیش هەولمداوە كارێكی تازەو مۆدێرنانە پیشكەشی بكەم، بۆ ئەوەی لەو هەموو گۆرانكارییەی روویداوە منیش بەژدارییم هەبیت.
ئەو هونەرمەندە بە ئەزموونە كە بەشێكی زۆری تەمەنی خۆی پێشكەشی هونەری گۆرانی گوتن كردووە، بەڵام لە ئێستادا بۆ بەرهەم هێنانی ڤیدیۆ كلیپێك نازانی روو لە كی بكات ؟ لەمبارەیەوە (سابیر كوردستانی) گوتی : بەداخەوە دوای ئەو چەند ساڵە خزمەتی هونەری گۆرانی دەكەم، تا ئیستاكە نەگیشتومەتە ئەوەی بەرهەمێك تۆمار بكەم، كەسێك یا دەزگایەك بێتە پیشەوە ئامادە بیت تەنها گۆرانییەكەم بۆ وێنە بگریت، كە پی دەڵێن ڤیدیۆ كلیپ، بەداخەوە تا ئیستا ئێمەی هونەرمەندانی كورد هونەرەكەمان بووە بە بەشێك لە ژیانمان و وەك مناڵەكانمانی لێهاتووە دەبێ بەخێوی بكەین و هەمیشە لە خەمی دابین!، ئەوەتا لە ئێستادا من چەند گۆرانییەكم ئامادەیە نازانم چۆن كلیپیان بۆ بكەم، كە هەموولایەك ئەوە باشدەزانن كە بارودۆخی من لەگەل سەرجەم هونەرمەندانی كورد جیاوازە!، جگە لەوانەش ئەوە ساڵی (2019)ـیە، ئێمەی هونەرمەندان نزیكەی (28) ساڵە ئەم قسانە دەكەین و كەچی بەداخەوە ناگاتە شوێنی خۆی!".
سابیر كوردستانی) هونەرمەندە لەبەشیكی دیكەی قسەكانی دا ئەوەشی گوت : چەند بەرهەمێكی دیكەشم لەبەردەستدایە ئەگەر سپۆنسەر هەبێت دەتوانێت تۆماریان بكات، جگە لەوەش لە بەرنامەیدایە ئەو بەرهەمانەی پێشتری كە بەكوالێتی باش تۆمار نەكراون، دمەوێت بە كوالێتییەكی باشتر تۆماریان بكەمەوە، چونكە بەراستی بۆ گویگری ئیستا گرنگە بەو كوالیتیە بەرزە گویان لی بیت، لەبەر ئەوەی كاتی خۆی سیستەمی تۆمار كردن وەك ئیستا پیشكەوتوو نەبوو، هەروەها لەسەر كاسیت كوالیتی باش نەبوو، بۆیە بەو هیوایەم بتوانم جاریكی دیكە ئەم بەرهەمانەم تۆمار بكەمەوە.
هونەرمەند (سابیر كوردستانی) لە كۆتایی دا ئەوەشی گوت : جگە لەو گۆرانییانە بەرهەمی دیكەشم هەن، كە بەشی ئەلبومیكی گۆرانی دەبیت، ئومیدم وایە بتوانم تا تەمەنی ماوە پیشكەشی بكەم و بلاویان بكەمەوە!، چونكە ئەو بەرهەمانەم زۆر خۆشدەوین و هیوام وایە بچیتە بەرگویچەی بیسەران و هونەردۆستانی كورد.

 

عەبدولغەفار عەبدوڵڵا - هه‌ولێر

© 2017 Hawler