کانونی دووەم 18, 2019

بەهــــــــــــــا و هەڵــــــــەی پێشبینییەكان


به‌شی یه‌كه‌م
دۆخی یەكەم

هەموو كەسەكان لە بوێریی ڕۆیشتندا ڕازن
حاجی لەقلەق بە تەواوی بوون مایەوە و هەنیسكی نائومێدی بەسەر هه‌ولێردا هەڵدا
بارانیش كۆتری دەنیشێ و باڵ دەداتەوە
زەوی زمان بە لێوی دادەهێنێ و تەڕی دەكات
هەور دیكتاتۆر نییە
ئاسمان داگیردەكات بەڵام ساتی ئاخاوتنی ڕاستەقینەی دێ
ده‌ست به‌ ده‌موچاوی داده‌هێنێ و ڕقی خاودەبێتەوە
خۆی لەناودەبا و ئەو ئازاد و ڕێز نەشكاو
بە دەوری بانگی یەكەم و زەنگوڵە و گومەزدا دەخولێنێتەوە
خۆریش ئاوادەبێ پاش پێڵوو داخستن پەشیمان ده‌بێتەوە
ڕاسپاردەی دڵیم بەوپەڕی دڵەوە خوێندەوە
زوو هاتمەوە و دەموچاوی گڵۆپی ماڵم
پڕ دەمار و خوێن كرد و ورەم خستنەبەر
ماڵ بە پەرستگا و یەكەم شووشتنی پیرۆز دەزانم
خەوێكی ئارام دەڕژێنێتە چاومەوە
سوارێكی پاكیزە پارچە پارچە
كەلوو و ئاوازی هاوئاهەنگ و سێبووری هەڵدەدایە ناو دەستمان
لەبەر ماڵی تەورات و ئینجیل و قورئانی دەم بە وێرد و نەوای مندا
لە ئەسپە بەهرەمەند و بلیمەتەكەی دابەزی
ڕێگا ڕكەبەڕكایەتی لەگەڵ نەكرد
ئارام و ڕۆشن وەك دەموچاوی دایكێك
تازە نۆبەرەكەیان لە تەنیشتی دانابێت
فرمێسك لە چاوی قاوەیی ڕژا و بە تۆڕی چلچرا سڕیم
بە هەویری ئاردی گەنم كردمە پەیكەر
لاولاو بە دەست و پێی هەڵچوو
بووە یادەوەریی هەڵۆی كۆچەر
كە دووكەڵ و بارووتی بۆردوومان بە چۆكیدا نەهێنا
چل پێغەمبەر بە چیچكانەوە لە دەوری دانیشتوون
حەوت شەو و حەوت ڕۆژ بیریان كردەوە و مانەوە
دواتر ڕێی هاتنەوە ناو خۆیان لێ ون بوو
كێ كڵپە لە سەری هەڵسێ و بوێری ئەوەی هەبێت بێرەدا بڕوات
نەخشی خەواڵوویی دەشكێنێت و باوێشك نادا
ماڵ بە پەرستگا و یەكەم شووشتنی پیرۆز دەزانێ
خەوێكی ئارام دەڕژێنێتە چاویەوە
شەو و ڕۆژیش باڵی شەمێ فڕێ دەدەن و دەگەڕێنەوە ماڵی خۆیان
ڕازێك ماڵی ڕووناك كردووەتەوە
هەموو كەسەكان ڕازن لە یەكەم شوێن دەگەڕێنەوە
ئەستێرە هێلانەی لە ناولەپی ئاسمانە  بە ڕۆژ بەتاڵی دەكات و بە شەویش دەگەڕێتەوە ناوی  كە ڕۆژ بەتاڵی دەكات مەرگ هێرش دەهێنێتە ژوورێ لە دارەتەرم زیندانی دەكات  ئەستێرە ئێمەیە من ئەوی دی ئەستێرەم و ئەوی دی شتێكی كۆنە ژیاوەتەوە خۆراكی سەر سینییەكەی هێشتان تێكنەچووە و كتێبە كراوەكانی دانەخراون  پەشیمانیی جوانترین وشەیە لە زمان ناسیم  شیعریش یەكەم خوێن بوو ئادەمی لێ لەدایك بوو  هێمنیی ماڵی ئەم نۆبەرە تاهەتایییەی پێ زانی و باڵندەی زمانبەد دان لە حەوشەوبانی هەڵناگرێتەوە و زریانی ڕەشیش لێی نادات  سەرەتای یەكەم سۆزی پڕ ئازار گەڕایەوە بۆ یەكەم شووراوی پیرۆز  شووراوی پیرۆز بە دەنگێكی پیرۆز پێكەنی و بوو بە ئاوریشمی خاوی ناوقۆزاخە و بەسەر خورپەی ترسناكدا زاڵبوو  قۆزاخە ئەو شوێنەیە پێویستە بیزانیت نەك شتی لەبارەوە بڵێیت  نقوومبوون لە ڕازی یاد و شوێنەكان خۆشبەختییەكی كورتخایەنە لە باروبوارێكی تایبەتی ژمارە و ئاوازدا  وابزانم ئەوەی گوتوویەتی ئاواز هەڵەی كردووە ئازار پێش ئاوازە شوێن دڵۆپە ئاوێك بوو هات و دڵۆپە ئاوێكیش بوو ڕۆیشت  جگە لە ڕازی یادەكان هیچ شتێكی تر لێرە نییە گێڕانەوەی باس و خواسی كۆشكی كۆتایی خولیایەكی هەڵەیە  عۆل عۆل بە پەیژەی ئێسكی كلۆربوو سەردەكەوێ و فریای ئەستێرە بینین ناكەوێت


یەكەكان لە ئاسۆی چاوەڕوانیدا
یەك دابەش و جاران و كەم ناكرێ
خودا
خۆر
من
لەمەوبەدوا بازنەی یەكەكان داخران
بەرگەی سەیركردنمان بگرن
بۆنی هەر كەسێك دەدەین
ئاو و گیای كەروێشكەكانی بیر نەچێ و چڵی ناو دەمی ڕەش نەبووبێت

چاو ناپاكیی لەگەڵ زەمین ناكات  پێش من خودا و خۆری لێ بوو بەخێرهاتنی منیان كرد و گەنجینە لە دەستیان پڕ بوو  ئێمە هەرسێكمان گەیشتین بە هەموو شت و كەسێك  كەچی هەر تەنیاین و دەمانەوێ زمانی ئەو منداڵانە فێربین داوا دەكەن لەدایك بن  ڕنۆكی دڕندە ڕوان و ئەوان هەر خواردنی ناوكی دایكیان دەخوارد و لەناو زگی دایكیان سەرگەردان نین و ئەو شوێنە دەناسن كە بۆی دێن  هەموو شتێكیش جوان مایەوە دەستی هەموو جوان ماوەیەكمان گوشی لە چاوەڕوانی ڕوانەوەی لاسكە گوڵ لەناو لاپەڕەكانی كتێب ماوینەوە  سێبەر كەوتە سەر بۆشایییەكان  بۆشایییەكان پڕ مرۆڤن  مرۆڤ دابارین و سەرزەوییان داپۆشی و بەیاننامەی درۆزنانەیان ڕاگەیاند  حەزدەكەم هیچ كەسێك لە هیچ شوێنێك چاوەڕوانم نەكات

دیمەنێك لە شاری بۆشایییە سپییەكان
لە شۆستەیەكی خلیسك بەسەر سێبەری خۆمدا پازم دا
زوقمم لەسەر گوڵ لادا و پەڕەمووچێكم لە باڵندە بە ئامانەت وەرگرت
 دوو وێنەم پێكێشا
شمشێر و شمشاڵ
میوەیەكم دوولەت كرد
لەتێكم لە نزیك وێنەی شمشێر دانا
ئەویدیش لە نزیك شمشاڵ
توانیم ژمارە و ناوی هەموو كەلوپەلەكانی مۆزەخانە
لەسەر لەتی نزیك شمشاڵەكەدا بنووسم و بە ئامانەت داینێم
ڕێبوار ناتوانێ سكاڵا بكات
ڕێگا بریتییە لە خۆت
زەویش خەوی لێ تێك نەچووە
گوێی لە پەلەقاژەی ماسیی ناو تۆڕە
دڵ و هەستەكانی تێكەڵ دەبن

ڕەنگەكانی كۆبووەوەی ناو پەڕەمووچ بەختەوەرانە پێشوازی لە تابلۆی دەروازەی شاری بۆشایییە سپییەكان دەكەن و دروودی داگیرساو كڕنۆش بۆ مەی و مەیفرۆش و مەیگێڕ دەبا  خۆی دەدركێنێت چۆن بەسەر سێبەری خۆیدا پازی دا و تەماشای دەموچاوی نیوە مردووی ماسی كرد و هاواری كرد  تاوێك هەر تاوێك چاوەڕوانبە بەڕێوەم بۆ قوربانی و هەناسە ساردەكانت هەڵدەمژم  ماسی یازدەمین نەوەی من دەبێت و ناوی منیش هەڵدەگرێتەوە  بێ هۆ نییە گوڵەستێرە دەڕژێ و شتێك پێشكێشی هیواكان دەكات و بەر لە ئاگركەوتنەوە دەگرێ


لە هێزی درەوشانەوەدا
پیاوە زەنگوڵ جووڵێنەكەی ڕایەڵی وشە و شۆڕش
كە كیشوەرێكی تری پێ نەدۆزرایەوە
دوا قسەی بۆ كۆڵۆمبس كرد و بە دەرزیلە و سنجاقی دایكی
هێمنانە خوێنی خۆی ڕشتە كاسەی دڵخۆشییەوە
ئێمە ڕەنگی دڵیمان بینی
توانیمان لەبارەی تووڕەیی چیاكان و ڕەنگی ئەشق قسە بكەین
زەوی جلی خۆی لەبەركردەوە
بە كورسییە بەتاڵەكەی هەڵیواسی
شەكر و خوێی لەئاودا تواندەوە
قوڕی پێ خوساند
كوورەی داگیرساند
خشت بڕا
پێستی خاك بۆ بناغە لادرا
شار گەورە بوو
یەكەمین ئاهەنگ گێڕدرا و یەكەم جەنگ كوژایەوە
پەلكەزێڕینە كە لەئاسماندا ون دەبێت
سڵاوی هەموو جەربەزەیەكی سەندووەتەوە
ڕوخساری هەیە و دێتە ناو ڕیشاڵی ڕۆحت
ڕەنگی دڵی بینیوە و ڕەنگی ئەشق دەناسێت
پەنجەرەیەكی بەتاڵ لە سینگی دیواردا ئاسۆ و سنوورە
هەناسەی سازگاری خۆر تێیدا دێتە ناو جۆش و كوڵی كاروانەكان
كەسیشی تێدا بانگی دەرەوە ناكات
لە هێزی درەوشانەوەیدا دەردەكەوێت
هاوڕێی پاراو ئەگەر جەردە و چۆرتەمان لەبۆسەدا بینی
مەشق بە چاومان دەكەین و گۆرانی لە لێوی شار جێدەهێڵین
شار لە خەوێكی ئارامدا هەناسەدەدا
درەختی بە پەڕوباڵ بیرنەچوونەوەی شاری
قووڵایی دەریایان پێ سپێردراوە
كازێوەی سپێدە
زەردەپەڕی ئێوارە
كاتن
كات بیری شوێن دەكات و بۆنە خۆشەكانی لێ پەرت دەبێ
شەقام مۆر نەكراوە
دڵ مۆڵەت دەدا و بۆت دەكرێ جارێكی تر
بەسەریدا بچیتە شەڕی دەرزیلە و سنجاق
مووروویەكی تریش بكەیت بە نقێمی ئەنگوستیلەی قەدەغەكراو
هێڵەكانی ناو دەفتەری گەورەش بژمێری
هێلانە لە ترووكان هەناسەدەدا
شەوانی ڕەمەزانی هەولێر داوادەكات
قۆڵ لە قۆڵی شكۆی بێ پەروایی هەڵكێشی
ئەو خەونە ببینێ كە گرینگ و زۆر پێویستە
كازێوەی سپێدە
زەردەپەڕی ئێوارە
ئەو داوایە ئاسایی دەبینن و پرسیارەكانی باوانمان دووبارە دەبنەوە
دەمامكی پاشایەكانیش وەك خۆری نیوە ئاوابوو ڕەنگاوڕەنگن

پاشایەكان دەموچاویان  پڕە لە ترسناكی و تۆقین  پڕ دەدەنە تفەنگ و میل دەهێننەوە پەنجە لەسەر پەلاپیتكە دەجووڵێنن  تەقە لە ڕووناكییەكی تووڕە دەكەن و برسییەتی دەخەنە ناو تۆڕەوە بە هەناسەبڕكێوە لە بەرزایییەكەوە داوەكە ڕادەكێشن و دەمانخنكێنن دڕكی پەنجەكانیشمان دەرناهێنن  كەسەكەمان لە نێوان دووانماندا  سێوێكی لەت نەكرد و وەفایەك نەمایەوە  بەسەر هەورەگرمە  دابەشی كردین  خوێنی وشەی ڕشت  ڕووناكییە تووڕەكە  خوێنەكەی بۆ كۆ نەكرایەوە و سەروبۆری وشەكانمان كەوتن مانامان لێ تێكچوو ناوی دڵبەرەكانی خۆمان بۆ نەخوێندرایەوە خوێنی وشەكان هەمووی درەوشانەوەی ڕووناكییە تووڕەكەبوو ڕووناكییە تووڕەكە دەستی خستە سەر دڵمان و بۆ ماڵئاوایی هاتبوو  ئەو جامە ژەهرەی بۆمان ڕاگیرابوو دەستێكی لێدا و قڵپی كردەوە  ئاوی پاراوی تا ناو گۆزەمان هێنا  شوێنی خۆی نەگۆڕی و دوا دیمەنی بوو  دەستی خۆی ڕاخستووە تا مرۆڤ بەسەریدا بێتەوە ماڵەوە  پردی پاشاكان كەوت  شەقام بانگی هەموو یادگارییەكانمان دەكات

لە بۆسەی خدری زیندەدا
برین جۆشاون و گوێڕایەڵی یەكترن
درەختێكی ڕووت لە دوور
دوورییەكی سەیر دوور و ساكار
ئەوپەڕی دنیا تێیدا خۆی دەناسێتەوە
گوێی لە تەوقەی گەرمی ئەو كتێبەیە
لەبارەی ناودارانەوە نووسیومە
دەڵێت ئەوانە ڕۆژنامەی ئێوارانن
ڕۆژنامەفرۆشی گەڕۆك
بردوونی بۆ بازاڕ وسندووقی پۆسته و شوێنە گشتییەكان
یان گیانی بەرزبووەوەن
بە ڕێگای سرووشەوە براون بۆ دڵگۆیی و چاندنەوە
بەیانی دێنەوە هۆش و پشیلەی سەر بەز لەوێ نامێنن
وێنەكانی ڕۆحت لێی پێكهاتوون و تەزوون
لە چوارچێوەی سۆزی دیدار و خرۆشی
 جەزبەی دەگرێ
لە شەقامە سەرەكییەكان هەڵیدەواسێ و دەڵێت ورد سەرنجدەن
پێشبینی خەندەیەك دەكا و له‌ شه‌ڕ دایه‌ له‌گه‌ڵ مه‌حاڵ
بەم شێوەیە هەموو شەوێك هەمان شت دووبارە دەبێتەوە
سبەی دەستوڕست بۆ كوشتنی خدری زیندە لە بۆسە دادەنیشم
بەڵكو بۆم بكرێت بیكوژم و دۆنایدۆنی بم
زمانی بۆگەنكردووی باڵندەی بەدیش فڕێدەمە جیهانە ساردەكان

جیهانە ساردەكان ئێمەیان بەپێوە خەواند و جێ بەخۆ ناگرین  سەكۆی سەما كەسی لێ نەما ئەو ڕۆشنایییەی لە ڕوخساری ئێمەوە چووە سەر سەكۆ  پرسیار بوو بەناو سووڕی ڕۆژەكانمان جووڵا شانەكانی هەنگوین بە هێمنی خۆیان پڕ دەبن  لەمەوبەدوا بكوژی خدری زیندە بەنهێنی لەگەڵمان نادوێ و بەسەر پشتی نەهەنگەكان ڕەتمان دەكات  خۆرێكی جوانەمەرگین لە جۆگەلەیەكی پڕدا بە زەمین ئاشنادەبینەوە لە دۆنایدۆندا خوێنی زیندووبوونەوە پاشەكەوت دەكەین  دوای ئەمە چی ڕوودەدا  كەڵەبابی دڵخۆش ئەشقی دەپارێزێ و چێژ لە دەنگی خۆی دەكات داهاتوو دەبێ بە هی ئەو


ئاوم بەخۆڵدا كرد و بۆنی خودا خۆش بوو
هەور لە شوێنی دروستبوونی خۆی
ناسرا و بەسەر كێڵگەی لێوبەباردا تێپەڕی
بەهانەی سووتانی بۆ هێناین و بۆنی خۆڵەمێشی تەڕی كردین
گوڵدانی پڕی بەر پەنجەرە فێنكایی بۆ هات
گفتی بە ڕازی ژیان دا
پێستی ناونیشان بەسەر گۆشت و ئێسكم كشا
 خەندەی دیدار و ئاخاوتنی باڵندە ڕسكان
خونچە بۆ گوڵبوون چەند كراسی دڕاندووە
1- زێوان 1988 داوەتمان دەكات بۆ قووڵایی ناولەپ و بەرزكردنەوەی گۆزەی بێدەنگی
2- ڕووەكەكانی خوداوەند 1999 داوەتمان دەكات بۆ قووڵایی ناولەپ و بەرزكردنەوەی گۆزەی بێدەنگی
3- خەون وا خۆی گێڕایەوە 2004 داوەتمان دەكات بۆ قووڵایی ناولەپ و بەرزكردنەوەی گۆزەی بێدەنگی
4- شەڕی چل ساڵە 2005 داوەتمان دەكات بۆ قووڵایی ناولەپ و بەرزكردنەوەی گۆزەی بێدەنگی
5- مردوویەك ئاگای لە هەمووانە 2008 داوەتمان دەكات بۆ قووڵایی ناولەپ و بەرزكردنەوەی گۆزەی بێدەنگی
 6- سەد و یەكشەوە 2008 داوەتمان دەكات بۆ قووڵایی ناولەپ و بەرزكردنەوەی گۆزەی بێدەنگی
7- ساڵی سفر 2010 داوەتمان دەكات بۆ قووڵایی ناولەپ و بەرزكردنەوەی گۆزەی بێدەنگی
8- سروودی زەوی 2012 داوەتمان دەكات بۆ قووڵایی ناولەپ و بەرزكردنەوەی گۆزەی بێدەنگی
9- حەزدەكەم ئەوەندە بژیم 2015 داوەتمان دەكات بۆ قووڵایی ناولەپ و بەرزكردنەوەی گۆزەی بێدەنگی
10- دواكەوتن لە كەشتیی نووح 2018 داوەتمان دەكات بۆ قووڵایی ناولەپ و بەرزكردنەوەی گۆزەی بێدەنگی
براكانی ناخ دڵم سوار نییە و بەشدارم لە خوانی خودا و زیندانی واڵا
ئاوم بەخۆڵدا كرد و نیگا سه‌خته‌كانم
بیرنەچووەتەوە و دیمەنەكان دەلاوێنمەوە
بە هەڵەش حەزم لە ژیان نەكردووە پرسیویشمە ئادەم یان حەوا نۆبەر و دڵڕاتەكێنی زەوین
پەیدابوونی ناو دوێنێ بوو گەلێك تەلیسماوی نییە
ناو لە شوێنی لەدایكبوونی دەناسرێ
حەوای ڕوومەت حەفت ڕەنگ
هێز لە ئەژنۆت كۆكەرەوە و ڕاكە
تەنیایی بوومەلەرزەی خستە
هێلانەی حاجی لەقلەقەكەی بەر لەوەی بمرێ
دەست ڕەنگاوڕەنگەكان مرداندیان
تا ڕادەی پەرجوو تەماشام كرد
ئاسمان لەو كاتەدا سەرتاپای شین بوو
توندتر ڕاكە نواڵە
ژیان لەچاوەڕوانیدا چەند كراسی دڕاندووە
لەپڕ پەنجەرەیەك داخرا
خەیاڵ سۆمای نابینابوو
نەبووە ئاوێنەیەك خاڵی ناخی تێدا گەورە بكەمەوە
جاڵجاڵۆكەشم بینین
كراس بۆ پەرییان دەچنن و پرچیان ڕست دەكەن
هەموو بەهانەكان بۆ ئەمەن ڕۆن بەسێركدا بڕێژن و گا بخلیسكێ
زەوی بەئاسانی پەشیمان بووەوە
لە یاقووتە شینەكانی ڕژاندوویەتی
لە دوورییەكی ئارامدا ماومەتەوە
بۆنی خۆشی جەنگاوەرێكی بێ ئاگر و ئاسن لە بەرەیەكی نەرمدا دەپەیڤێ

پەیڤی و ژیان ئەشكەنجەی دابوو  سەرنشینەكان لەپێش چاوی من سەركەوتن و كەشتییەكە ڕۆیشت  تا بەهەشت گەیاندم  دڕكی لێ نەبوو بە پێخواسی بە ژێر گڵۆپی كەسك و سوور و قوللە و سەنگەردا پیاسەمان كرد  دانیشتین و خوانمان داخست و پێچایەوە  پشت لە هەڵەكان كرا ئەوەی ئاوی چۆڕاوی داخ بوو پەیكەری هەڵبژێردراوان لەناو باخچەی بەهەشت هەبوو پەیكەری مێژوو بۆ نووسراوەكان كە جلی ڕەنگاوڕەنگی دزراو لە نێرگزی تەمەندرێژیان لەبەرە  درێژە بە ژیان نادەم ئەو ژیانەی سەری ئەشكەنجەی دانا  ژیان ئەشكەنجە دەپاڵێوێت و هیوای نزیك لەدڵدا هەڵدەگرێت  كەشتییەك بە كرێ دەگرم گەشت لە ڕووباری تەورات و ئینجیل و قورئان و شیر و شەراب و هەنگویندا نائومێدی دەكوژێت

ئەسپی باڵ داستان و ئەفسانە گەیشت
 بە هەزار دڵ دەچمە ژوان و دیدەنی
مانگ لە ژوان و دیدەنی ناڕێكی زەوی شەرم دایگیرساند
بۆنی باوەش تووشی هەڵامەتی كرد
چنگ لەسەر دڵم هەڵگرە و لە كۆڕی یاران
دووركەوە ئەی پەتای حەفت دەمار
دەستی پەرۆشی و تاسەكردن لەبەردەرگای ماڵئاوایی
ئەلبوومە داخراوەكان دەكاتەوە و پەڕەكانی زۆرنین
خەونێك شەوی كورت كردم و بە دڵخۆشی خەبەری كردمەوە
مرۆڤ بەیانییان وەك ئاو دەجووڵێ
شەقاری پاشماوەی برووسكێك دەمی گەیشتە پەنجەی پێم
ئەسپی باڵ داستان و ئەفسانە چوار ناڵەی دا
چوومە خەونی تایبەتیی نووسینەوە
گوناهی زەویم سڕییەوە و ناوچەوانیشیم ماچكرد
خەو تازە چاوی زەوی گەرم كردووە
ئای لە خودی خەون دڵنیام
ئەشقی گەرمە و ڕووباری بەستوو دەكاتەوە
ئەی زەوی كۆترە پەیامبەرەكانت لەسەر شانی من دان بدە
بۆ شوێنێكی نەزاندراو نافڕن
ئەستێرە لەسەر شانی من ڕەنگیان ناگۆڕێ و نابن بە بەردی شەڕ

لەناو تەپوتۆزی تەڵخ و ئاسۆیەكی زەرددا پێم لە بەردی شەڕ گیربوو  بەلاداهاتم و نەكەوتم  كردم بە بەردەكێلی خوێنڕژاوان  ئەسپی نامرادەكان بەردی شەڕیان جێهێشت  نەچوونە سەر كانییەكی سازگار  دوور ڕۆیشتن چوونە سەر دەریا ئاوی سوێر بخۆنەوە لەسەر شۆستەی شەقامێكی چۆڵ دانیشتبووم وەك بای سبەینان بەسەر ئەو ناوەدا كشان لە لەخۆبوردوویی و خاكیبوونی خۆیانەوە دەبنە مانای ژیانمان  گوڵی سوورم بە دەستەوەیە و چاوەڕوانم چرای ناوچەوانیان داگیرسێنم  ئەوان قسەبكەن و منیش گوێیان لێ بگرم و تا قووڵایی ناخ بە داخ و زووخاوێكی زۆرەوە دەتلێمەوە  باڵندەیەكیش لە تەنكایی زەردەپەڕدا بانگم دەكات و دەڵێت لەناو تەپوتۆزی تەڵخ و ئاسۆی زەرددا وەرە دەرێ ئەوەش ببینە پیاوێكی كاسە چەور چەتری هەڵداوە و لەبەر بارانە خۆشی لەوە دڵنیاكردووە تەڕنابێت  ناشزانێ باڵندە كەی كۆچدەكەن و بەچكە پەڕەسێلكەش چەند ڕۆژ لێویان زەردە و ئەو تفرە لە ساردی یان لە گەرمی فڕێدەدەن

 

سەباح ڕەنجدەر

© 2017 Hawler