تشرینی دووەم 16, 2018

سەروەران لە مەنزڵگەی شاعیرانی كورددا

" سەروەران لە مەنزڵگەی شاعیرانی كورددا" تازەترین كتێبی چاپكراوی نووسەر و ڕۆژنامەنووس" زانیار سەردار قڕگەیی"ە، تازەكی لە دووتوێی 344 لاپەڕە، لە چاپخانەی ڕۆشنبیری هەولێر، بە تیراژی (1500) چاپی كردووە، ئەم كتێبە خستنە بەرچاوی ئەو شیعرانەی شاعیرانی سلێمانییە كە بۆ بارزانی و مێژووی خەباتی بارزانییەكان نووسراوە.

كتیبی سەروەران لە مەنزڵگەی شاعیرانی كورددا، بریتییە لە بەسەركردنەوەی (22) شاعیر كە (21)یان خەڵكی شاری سلێمانین، ئەوی تریشیان لەدایكبووی شاری سەقزە، كە ئەویش (مەلا حەسەنی نەوحی)یە و سەرجەمیان شیعر و هۆنراوەی جوان و بەنرخیان هۆنیوەتەوە، لەگەڵ پەخشانێكی شەهید محەممەد قودسی كە گفتوگۆیەكە لەنێوان محەممەد قودسی و چیای شیرینی بارزان.
نووسەران و شاعیرانی كوردستان بەگشتی و شاری سلێمانی بەتایبەتی، هەمیشە پێنووس و هزر و بۆچوونەكانیان داكۆكیكارێكی سەرسەختی دۆزی ڕەوای گەلی كورد بوون، بە نووسین و شیعرەكانیان پشتگیر و پشتیوان بوون، هەمیشە بەو هەوڵەیان هەستی نەتەوەیی ڕۆڵەكانی گەلەكەمانیان بەهێزتر كردووە.
 شاعیرانی كورد جگە لەوەی لە هەوڵی هۆشیاری و بە ئاگاهێنانەوەی تاكەكانی كۆمەڵگەی كوردەواری كەمتەرخەم نەبوون، لە هەمان كاتدا لە پێناوی نەهێشتنی دیاردە دزێو و دواكەوتووەكانی كۆمەڵگەدا تێكۆشاون، هەروەها بۆ بەرەو پێشبردنی كۆمەڵگەیەكی پێشكەوتو و سەردەمیانە كاریان كردووە.
  زانیار قڕگەیی وەك وەفا و پێزانین و بەسەركردنەوەیەك هەوڵی داوە چەند شاعیرێكی شاری سلێمانی بە بیری نەوەی نوێ بهێنێتەوە، تا مێژووی ژیان و خەبات و تێكۆشانە بێ وچانەكەیان بە گەشی بمێنێتەوە و هەمیشە یادیان بكەینەوە.
شاعیران ناوەڕۆكی شیعرەكانیان لەسەر لایەنی "نەتەوەیی، كوردایەتی، سەركردەكانی كورد، ڕووداو، كارەسات، سروشت، جوانی، خۆشەویستی خاك و نیشتمان و ئەوینداری"ن، سۆزێكی هێجار زۆری خۆشەویستییان بۆ سەركردەی نەتەوەیی مستەفا بارزانی دەربڕیوە و بە كارێزمایی ئەو ڕابەرە نەتەوەییەوە سەرسام بوون، بەڕادەیەك كە مایەی هەڵوەستە لەسەركردنە، ئەم بەرهەمە چریكەی شاعیرانی سلێمانییە بۆ بارزانی.
بارزانیی نەمر وەك كەسایەتییەكی شۆڕشگێڕ و سەركردەیەكی ناوداری كورد، لای زۆربەی شاعیر و نووسەرانی ئەو سەردەمە جێی بایەخ و بەسەركردنەوە بووە، بەڵام (زانیار) تەنیا ئەوانەی بەسەركردووەتەوە كە خەڵكی سلێمانی و دەروروبەری بوون، بەوەش كارەكەی تایبەتمەندیی خۆی هەیە و وەك سەرجەم كارە رۆژنامەگەریی و نووسینەكانی دیكەی پسپۆڕانە دەستی بۆ كارەكەی بردووە.
سەلام عەبدوڵڵا، سەرنووسەری رۆژنامەی خەبات پێشەكی بۆ ئەم بەرهەمە نووسیوە، دەڵێت: "بارزانی نەمر وەك كەسایەتییەكی شۆڕشگێر و سەركردەیەكی ناوداری كورد، لای زۆربەی شاعیر و نووسەرانی ئەو سەردەمە جێی بایەخ و بەسەركردنەوە بووە، نووسەر لەو بەرهەمەیدا، بە بەڵگەوە خستوونیەتە ڕوو، پێم وایە ئەم بەرهەمە سوودێكی باشی دەبێت بۆ ئەوانەی مەبەستیانە كار لەسەر كەلەپووری بارزانیی نەمر بكەن."
ئەم كۆبەرهەمە لە پێشووتردا، سەرجەمیان لە نێوەندی ئەو زنجیرە بڵاوكراوەیەدا بوون كە لە ڕۆژنامەی (باس) بڵاو بوونەتەوە، پاشان نووسەر بڕیار دەدا لە دووتوێی كتێبێكدا كۆیان بكاتەوە و بە چاپیان بگەیەنێت، بۆ ئەوەی زیاتر بە نەوەی نوێیان ئاشنا بكات و جارێكی دیكە خزمەتە گەورە و بەرچاوەكەیان بخاتە ڕوو، تا ببێتە سەرچاوە و ژێدەر بۆ هەموو ئەوانەی مەبەستیانە لە بابەت و لێكۆڵینەوە و نووسینەكانیاندا سوودیان لێوەربگرن.
زانیار قڕگەیی تا ئێستا (16) كتێبی چاپ و بڵاو كردۆتەوە و چەند بەرهەمی تریشی ئامادەی چاپە. دەستخۆشی لە هاوكارمان كاك زانیار قڕگەیی دەكەین بۆ ئەم كارە جوانانەی و هیوای سەركەوتن و بەردەوامیی بۆ دەخوازین.

 

سەباح شێخانی

© 2017 Hawler