تەمموز 23, 2018

حەیدەرینامە، کتێبی (دوێنێ، ئەمڕۆ، سبەی)

بەشی یەکەم

بەر لە ماڵئاوایی: لە ماڵ، لە کتێبخانەو نیشتیمانەکەی گەورە نووسەر و رۆشنبیر (مومتاز حەیدەری) کەشکۆڵی حەیدەرینامەی لە دووتوێی ١٩٤٦ لاپەڕەیی چوار بەرگی قەبارە ئەی فۆر بە تیراژی ١٢٥٠ دانە لە بڵاوکراوەکانی کتێبخانە و ئەرشیفی (مومتاز حەیدەری) ژمارە (٣) لەسەر ئەرک و گیرفانی خۆی، دوای دووساڵ و دوومانگی بەردەوام لە خەریکبوون و کارکردن هاتە چاپکردن.
بەر لە هەموو شتێک حەیدەرینامە کتێبی مێژوویی، کەلتووری، ڕۆشنبیری، بەڵگەنامەیی، (دوێنێ، ئەمڕۆ، سبەینێ)ـیە.
چونکە لە ئامێزی ئەم کتێبەدا زۆر بەروونی و جوانی ئەرشیفی پارێزراو و ئەمانەتی مێژوویی و ڕابردوویەکی دوورمان نیشان دەدات، بە زمانێکی زۆر راستگۆیانە و واقیعانە وێنەهەمەرەنگەکان و فرە ڕەهەندەکان بۆ خوێنەر دەگوازێتەوە، بۆیە لەم ڕوانگەیەوە دەتوانین بڵێین بەو هەگبە پر ڕەنگاوڕەنگە مێژووییەوە حەیدەرینامە دەیەوێ خوێنەری ئەمڕۆ وەئاگا بێنێت، کە مێژوو شەرم لە کەس ناکات، گرنگ و پێویستە کەسایەتی و بابەتە ڕۆشنبیری و کەلتووری و بەڵگەنامەییەکان لە ئەمڕۆ و بگوازینەوە بۆ چاوی خوێنەری سبەینێ!!! تا ئەوانیش هەر لەو بازنە کراوەیەوە خوێندنەوە بۆ رابردووە پر لە شانازیەکە بکەن کە خۆشبەختانە ئەو مێژوو ون نەبوە یاخود نەشێوێنراوە، بەڵکو لە دەستێکی ئەمین، وەک ئەمانەتێکی مێژوویی لەلایەن خەمخۆرێکی سیاسی و ڕۆشنبیری و ڕۆژنامەوان و نووسەرەوە گوازراوەتەوە، چاو و هزری خوێنەر تێر دەکەن لە بابەتی هەمەچەشن و فرە نووسین، بۆیە ئەم کتێبە جێی شانازی و قبووڵ کردنەوە، جگە لە رۆشنبیران، ئەوا قوتابیانی زانکۆ و مامۆستایان دەتوانن سوودی لێ وەرگرن و وەک سەرچاوە بەکاری بێنن !!!
لێرەدا هەوڵ دەدەین لە چەند گۆشە نیگایەکەوە خوێندنەوەی گشتگیر بۆ کتێبی حەیدەرینامە بکەین.
(١) پەیام و هەناسە ساردەکانی مومتاز حەیدەری:
لەم دەروازەیەوە هەوڵ دەدەین پەیام و هەناسە ساردەکانی دانەری کتێب بخەینە ڕوو، کە زۆربەیان پەیامێکی مەعریفی ڕۆشنبیری و ئیعلامین، کە لە هەستێکی واقیعبینانەو پڕ لە قسە دەردەبڕدرێ و زۆر جاریش لە حاڵەتێکی هەناسە ساردیەوە هەست بە بێ تاقەتی و ماندوو بوون و بێهیوایی مامۆستا مومتاز دەکەین، بەڵام ئەم هەناسەیە هەناسەیەکی کورتە و بە ئاوێتەبوونی بە هەناسەیەکی گەرم و هاندانی کەسانی دەوروبەر ئەم کتێبە دێتە بوون و هەموو گلەیی و دەردەدڵ و پەیامە تەنزاوییەکان وەلاوە دەنرێت، ئیتر حەیدەرینامە وەک یەکێک لە خەونە جوانەکانی مومتاز لەدایک بوو، کە لە ناوەرۆک دا زۆر حەقبێژانە پەیام و هەناسە ساردەکانی دەربڕیووە، ئەوەتا لە دەرگای یەکەمی هەر چوار بەرگدا دانەر دەڵێ (چاوەرێی بڕوانامەی دکتۆرای فەخری - شانازی - ناکەم ..!).
پاش بڵاوبوونەوەی ئەم کتێبە (حەیدەرینامە) من چاوەرێی بڕوانامەی شانازی - فەخری - ناکەم ..!، بەڵکو چاوەڕێی ئەوە دەکەم مامۆستایەکی بەرێز خاوەن توانا و بڕوانامەی ماستەر بێت، یا دکتۆرا و یاخود دووەم دکتۆراکەی لەبارەی ئەم کتێبەوە بەدەست بێنێ ... هتد)
ئەم دەسپێکە پێمان دەڵێت ئەوەی نووسەر کردوویەتی بۆ خودی خۆی نیە بەڵکو بۆ ئایندەی ڕۆشنبیری و وڵاتیەتی، بۆ نەشێواندنی مێژوو و وننەکردنی راستیەکانە، بۆیە لەم پەیامە سەرەتاییەوە ئەوە دەخوێنینەوە مامۆستا مومتاز بۆ پاداشت و ناو و ناوبانگ و ئەم و ئەو و هیچ لایەنێک ئەو پڕۆژە گەورەیەی


نەکردووە، بەڵکو ئەو بۆ داهاتووی کردووە، کەواتە ئەو بڕوانامە فەخری یە لە خوێنەرانی ئەمڕۆ و سبەینێوە پێشکەش بە حەیدەری دەکرێ و لای خوێنەری ئەم کتێبە حەیدەری لەو بڕوانامەیەش گەورەترە .
هەر لە دەسپێک و بەرگی یەکەمی ناوەوە ئەمجارەیان لە تابڵۆ نووسینێکەوە حەیدەری زادە لە ژێر ناونیشانی (دەبێ وەڵام چی بێ .. ؟!) نووسیویەتی ئەم کتێبەشم جارێکی دیکە، لە دەرگەیەکی گەورەوە، خزمەتی وشەی ڕەسەنی کوردی دەکات، بگرە خزمەتی کلتووری نەتەوەیی و روناکبیری دەکات، ئەم کتێبە نموونەییە، بەشێکی مێژووی شکۆداری کورد پەروەری دەکات،لێرەدا من جارێکی دیکە ویژدانم ئاسوودە دەبێ و تا لە ژیانیش ماوم خزمەتی نەتەوەکەم دەکەم.. جا ئەوانەی (حەسوود) و بەدگومانن، دەبێ وەڵامییان چی بێ؟!
ئەمەش ئەو راستیەمان بۆ دەردەخات کە حەیدەری بەو عەشقە گەرمەیەوە بەرامبەر بە دونیای کەلتوور و ڕۆشنبیری و نووسین و بەڵگەنامەیی، ئەوا بە نیگای حەسوودەکان سارد نابێتەوەو بەردەوامە لە گەمەی ژیان و نووسین !!!
لە پۆستەرە نووسینێکدا هەر لەگەڵ پێرست و پێناسەی ئەم کتێبەدا دەڵێ
(حەیدەرینامە، لە هیچ کتێبێکی پێشووتر ناچێ!، بە ڵکو تەنها لە مێژوو، ڕاستگۆیی، داهێنان دەچێ).
لەم پۆستەرەوە نووسەر پێمان دەڵێت من ئیشم بۆ مێژوو کردەوە، دەمەوێ ئاوێنەی مێژوو بە ڕوونی نیشان خوێنەر بدەم، لە پشت ئەو ئاوێنەیەش مەبەستێک هەیە ئەویش بریتیە لە ڕاستگۆیی،،، نەک شێواندن و بەلاڕێ دابردنی ڕاستیەکان، بۆیە بە تێکەڵ کردنی ڕاستگۆیی، مێژووی پاک، دروست دەبێت،
لە لاپەڕەی دوای ئەودا بەفەڕشێکی سوور و بە گوڵێکی سوور ی گەڵا سەوز،
بە سەردێری (ناونیشان هەڵناگرێ!).
حەیدەری نووسیویەتی بەبۆنەی ٨٠ ساڵەی لەدایکبوونمەوە، مەزنترین دیاریی (حەیدەرینامە) لە جیاتی تێکڕای لایەنە پەیوەندیدارەکان!، خۆم بەخۆم پێشکەش دەکەم، پیرۆزە.
ئەو پەیامەی حەیدەری پێمان دەڵێت ٨٠ ساڵم تێپەڕاند، بەڵام بە بیرکردنەوەو خۆشەویستی بەرامبەر بە خوێندنەوە و نووسین و کتێب و نیشتیمان هەر بە گەنجی ماومەتەوەو ئەوەتا لەو کاروانە پڕەی تەمەندا گەورەترین کتێبم بە چاپگەیاند و چاوەڕێی پاداشت و سوپاس و پیرۆزبایی لەکەس ناکەم و خۆم پیرۆزبایی لەخۆم دەکەم.
ئینجا لەلاپەرە (٤) دا لەجیاتی سەروتار بەناچاری دوا وتار! نووسیویەتی
ئەرێ زانیوتانە حەزرەتی ئۆمەرمەندان لە دەرەوەی بۆشایی ئاسماندا دەژیت؟
لەم وتارە دەسپێک و کۆتاییەدا حەیدەری دەردەدڵ و پەیام و گلەیی و هێڵی مەبەستەکانی ئاماژە پێ کردوەو دەڵێت:
کورد گوتەنی (قسە هەزارە دووانی بەکارە) زۆر بە کورتی دەربارەی خەرجی چاپی ئەم پرۆژەیە، نامەوێت لێتانی بشارمەوە چەند لەتە ئەرزێکم هەن، لە باب و باپیرانەوە بۆم ماونەتەوە، وەڵێ ئەوانیش بەر ددانی قەیران کەوتن و بەهاکەیان بۆ تۆڵکەی پەنجاکانی سەدەی بابردە رۆیشتەوە، لەم دەرچەیەوە بۆ بەچاپگەیاندنی ئەم پرۆژە گەورەیە پەنام بۆ چەند دەروویەکی گەورەی (نیشتیمانی، سیاسی، بازرگانی، خێرخوازی،) برد شتاقیان بەزەبری دوعای زەوی و ئاسمانیش نەکرانەوە !!!.
هەڵبەت ڕازی بوون بە قەدەری بێبەهای زەویەکان، لە کۆتاییدا چەند پارچە زەویەکم فرۆشت، ئەوا حەیدەرینامە لە باوەشی گەرمی نەتەوەکەمدایە.

 

ئاری ئاغۆک

© 2017 Hawler

Please publish modules in offcanvas position.