شوبات 27, 2021

فەرهەنگی زارەکیی موکریان دوو بەرگی دیکەی لێ چاپ بوو

 

خانەی موکریانی لە شاری هەولێر بەرگی نۆیەم و دەیەمی "فەرهەنگی زارەکی موکریان"ی فەرهەنگنووس سەلاح پایانیانی چاپ و بڵاو کردەوە کە تایبەتە بە فەرهەنگ و ئەدەبیاتی زارەکی ناوچەی موکریان و نووسەرەکەی نویکەی ٢٦ ساڵی تەمەنی خۆی بۆ تەرخان کردووە. بەرگی نۆیەمیان تایبەتە بە پیتی «س» کە 795 لاپەڕیە و بەرگی دەیەمیشی پیتەکانی «ش، ع، غ، ف»ی لەخۆ گرتووە و لە 958 لاپەڕە پێک هاتووە.

 

هەشت بەرگەکەی پێشووی فەرهەنگی زارەکی موکریان کە بە پێی پیتی ئەلفوبی کوردی و لە دوو فەرهەنگی جیا بە ناوەکانی "فەرهەنگی خۆراکی موکریان" و "فەرهەنگی جل وبەرگی ژنانی موکریان" چاپ و بڵاو کراوەتەوە و چووەتە پێشەوە.

سەلاح پایانیانی هەر لە چوارچێوەی فەرهەنگی زارەکی موکریان، سی کتێبی بە ناوەکانی "کانی مرادان، گۆرانییەکان و شیعرە زارەکییەکانی موکریان"، "ئەدەبی زارەکی ژنانی موکریان" و " ئەدەبی زارەکی منداڵانی موکریان" لە دوو بەرگدا چاپ و بڵاو کردووەتەوە و هەروەها دوو فەرهەنگی تری بە ناوەکانی "فەرهەنگی زارەکی زاراوەکانی کشتوکاڵی موکریان" و "فەرهەنگی زارەکی ئاژەڵداری موکریان" ئامادە کردووە و بڕیار وایە لە ئایندەیەکی نێزیکدا چاپ و بڵاویان بکاتەوە.

 دکتور محەممەد خزری‌ئەقدەم لە بەشێک لە پێشەکی ئەم فەرهەنگەدا نووسیویەتی: "ئەم فەرهەنگە کە لەسەر داروپەردووی پاشەواری پێشینان ڕۆ نراوە و بە تان‌وپۆی ویستێکی زانست‌خوازانەی شێوازمەندەوە تەنراوە، چوار کەڵک و کاری سەرەکیی ئەدەبی، زمانی، فێرکاری و ئەنترۆپۆلۆژیکی لە ئامێزدایە و لە سۆنگەی ئەم تایبەتمەندی و کارکردانەشە کە دەبێ بڵێین فەرهەنگی زارەکیی موکریان هۆی داوەتەوە و هەتا ئێستاش لفە و دووانەکەی پێی نەناوەتە سەر ڕووی دنیایە؛ بۆیە نە دەكرێ ئەم کارە بچێتە بەراوردکێی هیچ شتێکی تر و نە هیچ فەرهەنگێکی تریش بخرێتە پارسەنگی؛ کەوابوو دەبێ چاو لە ڕێگای هاتنی کارێکی هاوشێوە بین و جا ئەو کاتی باسی پێک‌گرتن و سەنگاندنێ بکەین".

سەلاح پایانیانی، نووسەر و لێکۆڵەری فەرهەنگ و ئەدەبی زارەکی موکریان کە ئێستا تەمەنی سەرووی چل و دوو ساڵە، لە شاری مەهابادی ڕۆژهەڵاتی کوردستان لەدایک بووە و ئێستا بەڕێوەبەری مۆزەخانەی فەرهەنگی و ئەدەبی"ماڵی هێمن"ـە لە شاری مەهاباد.

شۆڕش غەفووری - هه‌‌ولێر

 

© 2017 Hawler