کانونی دووەم 17, 2021

کوردستان و ئازەربایجان شەڕیانە لەسەر تۆمارکردنى جێژنە هەنار

بەڕێوەبەری میراتی فەرهەنگی و گەشتیاریی کرماشانى ڕۆژهەڵاتى کوردستان باسى لەوە کرد کە تیمێکی پسپۆڕی داتا و فایلی تایبەت بە "جێژنی شوکرانەبژێریی هەنار"یان کۆ کردووەتەوە و لە چوارچێوەی دۆسیەی تۆماری جیهانیدا ڕەوانەی یونسکۆیان کردووە.

 

هەرچەندە وڵاتی ئازەربایەجانیش هەر بۆ ئەم جێژنە و تۆمارکردنی لە یونسکۆ هەوڵى زۆرى داوە و دەیانەوێت بە ناوى وڵاتى ئازەربایەجانەوە تۆمار بکرێت، بەڵام ڕۆژهەڵاتى کوردستانیش ناڕەزایەتى دەربڕیوە و بەرپرسانى فەرهەنگى کرماشان وێڕای ناڕەزایی پێشاندان بەو کارە ڕایگەیاندووە کە ئەوانیش داتاکانی خۆیان ناردووە بۆ یونسکۆ.

بە پێى هەواڵى هەواڵدەرییە کوردییەکانى ڕۆژهەڵاتى کوردستان، تیمێکی پسپۆڕی کاری کۆکردنەوەی داتاکانی جێژنی شوکرانەبژێریی هەناریان لە ناوچەی هەورامان تەواو کردووە و ئەو زانیاری و بەڵگانە لە چوارچێوەی دۆسیەی تۆماری جیهانیدا بۆ یونسکۆ نێردراون و چاوەڕێی وەڵام دەکەن.

شایەنى باسە جێژن و ڕێوڕەسمی هەنار، بەشێکە لە دۆسیەی تۆماری جیهانیی هەورامان کە وەک میراتی جیهانی لای یونسکۆ دۆسیەی بۆ تۆمار کراوە، لە هەمان کاتیشدا وڵاتی ئازەبایەجان لە دۆسیەیێکدا داتای جێژنی شوکرانەبژێریی هەناردی نەتەوەیەکگرتووەکان کردووە و داوا دەکات ئەو ڕێوڕەسمە بە ناوی وڵاتەکەیەوە تۆمار بکرێت. شۆڕش غەفووری - هه‌‌ولێر

 

© 2017 Hawler