حوزەیران 23, 2018

لوتفییەی مەلا صـــدیقی نازەنینی 1922 ـ 1977

پێموانییە هیچ میللەت و هۆز و عەشیرتێك لە سەر ڕووی زەوی مابێت، بەمانەشیانەوە كە لە دارستانە چڕەكانی ئەفریقا و بەناو دوور لە شارستانیدا دەژین، هێندەی كورد لە فەرامۆشكردنی كلتوور و كەسە دیارەكانی خۆیبێ گوێ بێ، دیارە ژنانیش لە نێو ئەو كەسانەداكەمتر بەختی ناسینەوەیان هەبووە،هەر بۆیەشە كەمتر ناویان لە مێژووی ئەم میللەتە تۆمار كراوە، ئەوەتا لاپەڕەكانی ڕۆژنامەنووسی كوردی ناوی زۆر لەم كەسانەی تێدا هاتووە و تا ئەمڕۆ بە (نەناسراو)ی ماونەتەوە.(لوتفییەی مەلا صدیقی نازەنینی) یەكێك بووە لەم خانمانەی كەوا بەر ئەم بێ گوێیەی میللەتەكەی خۆی كەوتووە و ناوی كەوتۆتە نێو لەبیركراوەكان.وەكو بەدواداچوونم بۆی كردووە، ناوبراو لە ساڵی 1922دا لە دایك بووە، یەكێك بووە لە مامۆستا دیار و لێهاتوو و ناودارەكان، لە چەند دواناوەندییەكی شاری كەركووك مامۆستایەتی كردووە، دوا قوتابخانەیان ئامادەیی 11ی ئاداری كچان بووە.وەكو لێیشی دەگێڕنەوە ئەم خانمە،لە پاڵ سەركەوتوویی لە بواری زانستیدا، ڕۆڵی كۆمەڵایەتیشی لە بواری پەروەردەدا بینیوە. بە نموونە چەندان گیروگرفتی كۆمەڵایەتی بۆ قوتابییەكانی حەل كردووە، لەم بارەوە فەرهاد عەونی، لەسەر زاری یەك لە خوشكەكانی خۆی، دەڵێت: (هەمیشە دوو یا خو سێ قوتابی لە ماڵی ئەوان دەیانخوێند كە لە خزمەكانی كۆیەیان بوون).
(د. كوردستان موكریانی)یش بۆی نووسوم: (لە ساڵی 1963دا لەگەڵ كۆمەڵێك ئافرەت بەند كراوە، لەوانە: مامۆستا سەنیە جەباری ـ بەڕێوەبەری ئامادەیی ئیمام قاسم. ئەم ژنانە لە گرتووخانەدا ورەی پیاوە زیندانیكراوەكانیان بەرز كردۆتەوە و داوایان لێ كردوون كە ناوی هیچ كەسێك نەهێنن و دان بە ڕاستییەكان نەنێن).
هەرچی (فەرهاد عەونی)یە، كە تێكەڵاوی و هاتوچۆی خێزانی لە نێوان ماڵی ئەوان و ماڵی (لوتفییە) هەبووە، دوای ئەوەی باسی ژنەكانی (مەلا سدیق) دەكات، بۆی نووسیوم: (لوتفیە خان كچی یەكەمی مەلا سدیقە و لە زەهوەخانە، كە ئەویش كچی مام حوسێنە و ماڵیان لە گەڕەكی ؛بەفری قەندی؛ بوو). لە بارەی قۆناغەكانی خوێندنی زۆر هەوڵ درا، بە داخەوە، شتێكی ئەوتۆمان بەردەست نەكەوت، بەڵام (فەرهاد عەونی) دەنووسێ: (لوتفیە خان خوێندنی هەرسێ قۆناغی لە شارەكانی كۆیە، كەركووك و سلێمانی تەواو كردووە، پاشان لە بەغدا ؛دار المعلمین العالی؛ بەشی ؛حەیوان و نەبات؛ تەواو دەكات). لە بارەی پلەكانی فەرمانبەریشی نووسیویە: (لە ساڵانی 1954 بە دواوە لە كەركووك نیشتەجێ دەبێت، سەرەتا وەكو مامۆستا، پاشان وەكو یاریدەدەری بەڕێوەبەری قوتابخانەی ؛اعدادیە كركوك للبنات؛ تێیدا دەمینێتەوە كە بەڕێوەبەرەكەی مامۆستایەكی توركمان دەبێت بە ناوی ؛وەفیقە؛ پاشان ؛لوتفیەخان؛ پاش شۆڕشی 14ی تەمموز خۆی دەبێت بە بەڕێوەبەر)، باوكیشی چەند ساڵان لەو شارەدا سەرۆكی دادگای كەركووك بووە و خەڵك زۆر ڕێزیان لێی گرتووە.
جگەلەمە وا دیارە ئەو خانمە لەگەڵ (ناهیدەی شێخ سەلام)بۆ حزبی ؛ڕێی ڕاست؛ كاری كردووە، بەشداریشی لە نوووسینەوەی گۆڤارێكیان كردووە بە ناوی (تروسكە)لەسەر ئەمەش تووشی هەندێ گرفت بووە، لەم بارەوەش (ناهیدەی شێخ سەلام) لە بیرەوەرییەكانیدا بەشێكی لە بەشدارییەكانی ئەو خانمەی تۆمار كردووە.
لەبارەی كەسایەتی و ڕادەی خوێندەواری و شاعیرێتی ئەو خانمەش، قسە زۆر كراوە و ڕای جیاوازیش هەیە، لەم بارەیەوە (دلێر)ی برای دەڵێت: (لیسانسی وەرگرتووە، دواتر بووەتە مامۆستا، لە كەركووك و سلێمانی دەرسی گوتووتەوە، لە دوای بەیانی 11ی ئادار بۆتە مدیری 11ی ئاداری كچان).
پاشان بە ئافرەتێكی ئازا و بوێر پەسنی دەكات و زۆر بە ویژدانەوە دەڵێت: (یەكەم كچە گەورەی باوكم بووە، باوكم ژنی بەسەر دایكی هێناوە، كەچی ئەو جیاوازی نەدەكرد لە نێوان خوشك و براكان، من و ئەو، دایكمان جیا بوو كەچی تا كولیەم تەواو كرد ئەو هەمووی خەرجی دەكێشام، لە دایكم و خوشكم و هەموو خزمان بۆ ئێمە باشتر بوو، تەنانەت شوویشی نەكرد لە بەر خاتری براو خوشكەكانی، خۆ ئەگەر بیزانیبا قوتابییەك زیرەكە و گرفتێكی هەیە، دەچوو ماڵەكەیانی دەدۆزیەوە، سەیری حاڵ و باڵی دەكرد، ئەگەر خانەوادەكەی دەستكورت بان، هەموو خەرجی قوتابییەكەی لە ئەستۆی خۆی دەگرت، بۆیە كاتێك كۆچی دوایی كردووە هەموو خەڵك چوونەتە پرسەكەی، تەنانەت توركمانەكان و مەسیحییەكان گوتوبوویان لە ئێمە چوو).
لەبارەی ئاستی ڕۆشنبیریی ئەو ئافرەتەش ڕای جیاوازلە بارەوە دەگوترێ،بە نموونە (فەرهاد عەونی) نووسیویە: (بەندە خۆیشم چەندین جار ؛لوتفیەخان؛م لە ماڵی خۆمان لە كۆیە و ماڵی مامم ؛عومەر حەبیب؛ لە كەركووك، كە ئەو كاتە لەو شارە؛معاون دائرە تسویە الاراچی؛ بوو، چونكە هاتوچۆیەكی گەرم لە نێوان ماڵی ئێمە و ئەوان هەبوو، بە ڕاستی ئافرەتێكی بە شەخسیەت و ڕێك و پێك بوو، كاتێ بە هۆی پشووی هاوین دەهاتنەوە كۆیە زوو زوو سەردانی ماڵی ئێمەیان دەكرد، ؛لوتفیە خان؛ هەمیشەدەچووە ئەو ژوورەی كتێبخانەكەی باوكمی لێبوو، كتێبێكی دەستنیشان دەكرد و دەستی دەكرد بە خوێندنەوە، تەنانەت جارێكیان بە نووستوویی دیومە كتێبێكی لەسەر دەموچاوی بوو).
هەرچی لە بارەی هەستی كوردایەتیی ئەو ئافرەتەیە، لەم لایەنەوەش (فەرهاد عەونی) دەڵێ: (لوتفیەخان ئافرەت و مامۆستایەكی كوردپەروەر بوو تا سەر ئێسقان، بەڵام لە هەمان كاتیشدا مەیلێكی زۆری بۆ چەپ هەبوو، تەنانەت لەم بارەوە دۆستایەتیێكی بە هێزیشی لەگەڵ ؛فاتح ڕەسوڵ؛ هەبوو، كە هەردووكیان پێشووتر لە كۆیە یەكدییان ناسیوە).
لە بارەی شوونەكردنیشی، ئەو چیرۆكەی لێ دەگێڕێتەوە: (لوتفیە خان، سەرەڕای جوانی و لێوەشاوەیی كەسایەتییەكەی، شووی نەكردووە، هەر چەندیش ماوەیەك دەنگۆی ئەوە هەبوو كەوا دەیەوێت هاوسەرگیری لەگەڵ ؛عەبدولكەریم تۆفیق؛ی خەڵكی كۆیە بكات، ناوبراویش كادرێكی دیاری ئەو سەردەمەی پارتی دیموكراتی كوردستان بوو، پاشانیش بوو بە بەڕێوەبەری گشتی دائیرەی تووتن لە بەغدا، دیارە هۆی سەرنەگرتنی ئەو هاوسەرگیرییەش، وەكو دەڵێن، بۆ هەڵوێستی مەلا سدیقی باوكی لوتفیەخان دەگەڕێتەوە).
نەك هەر ئەوەندە، (لوتفییە خان) دۆستایەتی نزیكی لە گەڵ هەندێ لە ڕۆشنبیران هەبووە، بە نموونە لەگەڵ (مەلا جەمیلی ڕۆژبەیانی) نامەگۆڕینەوەی هەبووە، ئەو نامانەش هەمووی دەربارەی مێژوو و ئەدەب و ئەو شتانە بووە، هەر هەمووشیان تا كۆچی دوایی لای لوتفیەخان پارێزرابوون.
جگە لەمانە، ئەم خانمە وەكو خوێنەرێكی بە سەلیقەش باسی كراوە، ناوبراو كە خوێندنەوەی بە هەردوو زمانی عەرەبی و كوردی بووە، دوای ئەوەی بەدواداچوونمان بۆ كرد، دەركەوت لە(گەلاوێژ 1939 ـ 1949)دا كۆمەڵێ بابەتی بڵاوكردۆتەوە،لەوانە پارچە هۆنراوەیەكی بە ناونیشانی (گوڵ) لە هەولێرەوە ناردووە و بە ئیمزای (محەمەد ئەرجومەند نازەنین)ی برای بڵاوكراوەتەوە، هەروەها پارچە پەخشانێكیشی لە كۆیەوە بە ناونیشانی (هیوا) ناردووە و بە ئیمزای كچە كوردێك (ل. ن) بڵاوكراوەتەوە، پارچە پەخشانێ و پارچە شیعرێكیشی بە ناونیشانەكانی (بانگێ لە كانی دڵەوە) و (لای لایە)ەوە لە سلێمانییەوە ناردووە و هەر لەم گۆڤارەدا بڵاوكراوەتەوە.
(لوتفیە خان) لەگەڵ دایك و خوشكێكی لە كەركووك دەژیا، دلێری برای بە قسەی خۆی هەمووجار سەردانی دەكردن، ئەوەبوو لە لەو كاتەدا كە دەچێتە دەوام، تووشی كارەساتی دیواربەسەردا كەوتن دەبێ و كۆچی دوایی دەكات، لە 24/2/1977دا، هەر لەم شارەدا لە گۆڕستانی شێخ محێدین نێژراوە.
ئێمە دوای ناسینەوەی ئەم خانمە، كۆمەڵێك وردكاری ژیانیمان نووسیوەتەوە و لەم ڕۆژانەدا لە بەشی دووەمی بەرگی یازدەی ساخكردنەوەی ناوی نووسەرانی گۆڤاری گەلاوێژ لە لایەن (بنكەی ژین) بڵاودەكرێنەوە.
مخابن هەموو شیعر و نامە و نووسینەكانی ئەم خانمە، دوای كۆچی دواییەكەی هەمووی تیاچوون، ئەمەی لێردا دەیخوێننەوە، دەقی ئەو شیعر و نووسینانەی نابراوە، كە دوای ماندووبوون و هاتۆچۆیەكی زۆر بۆ ئەم شار و ئەو شاری كوردستان، لەپاڵ ناسینەوە و دۆزینەوە و چاپكردنی شیعرەكانی (كچەكورد زێنەب خانی مەلا ڕەئووف ئەفەندی خادم سجادە، واتە خوشكە گەورەو مامۆستا و بەخێوكەری دڵداری شاعیر) توانیمەلە چەند ژمارەیەكی گۆڤاری (گەلاوێژ) بیاندۆزمەوە:

گوڵ
ئەی گوڵ چەند گەش و ڕەنگین و جوانی
پرشنگی خۆشیی ڕەونەقی ژیانی
زەرد و سوور و شین لە هەموو ڕەنگی
بۆن خۆش و ناسك چەند شۆخوشەنگی
نەشئەی گوڵزاری، جوانی گوڵشەنی
فریشتەی باغی، چرای چیمەنی
سەربەست و ئازاد، مەست و چالاكی
لە كەدەر دووری، بۆیە بێباكی
هاوڕێی هاودەمی دەستی دڵداری
لابەری خەمی دڵی هەژاری
خەندان و تازە شیرین ڕوخساری
عینوانی جوانی، بووكی بەهاری
پایز لە لای تۆ وەكو بەهارە
چ باكتە جیهان گشتی غەمبارە
چ باكتە بلبل بە ئاواتتەوە
بە نەغمە خوانی ڕۆژ ئەكاتەوە
كە تاریكی ڕووی لە دەشت و كێوان
بەرگی ڕووناكی لەبەر كرد جیهان
لە سروەی شەماڵ چاوت هەڵدێنی
بە سەد عشوە و ناز بلبل ئەدوێنی
شەماڵ بە بۆنەی لەرزەی چلانە
پەرچەمی خاوت ئەكا بە شانە
بلبل دێتە ڕووت بە نەغمەخوانی
تۆ عاشقی ئاواز، ئەو عاشقی جوانی
پۆلێ چاومەستان دەستەی جوانان
دێنە ناو گوڵزار بە نیازی سەیران
وەك تۆ دڵگەش و جوان و ڕەنگینن
خەندان و ناسك و ڕووخسار شیرینن
منیش سەردەمێ وەكو تۆ وابووم
دڵ پڕ لە خۆشی و شادی و هیوا بووم
كە ڕووی وەرگێڕا لێم چەرخی بەدكار
ژیانمی پڕكرد لە دەرد و ئازار
بە جارێ فەوتا ئامانجی ژینم
ڕوو زەرد و سیس بوو گوڵی ڕەنگینم
تۆش خەرۆ مەبە، تا سبەینێ
بزانە گەردوون چیت بەسەر دێنێ
لە هەولێرەوە: محەمەد ئەرجومەند نازەنین، گەلاوێژ، ژمارە 2، ساڵی 2، مارت و نیسانی1941، ل 90 ـ 92.
ئەو محەمەد ئەرجومەندە، كە برای لوتفییەخانە، لەدایكبووی ساڵی 1938ە، لە شەستەكانی سەدەی ڕابردوودا ڕۆڵی گرنگی لەكۆمەڵەی خزیندكارانی كورد لە ئەوروپا هەبووە، بڕوانامەی دكتۆرای هەیە ماوەیەكی زانكۆی سلێمانی ڕاگری كۆلێژی ئەدنازیاری بووە و ئێستاش خانەنشینە.

هیوا
هیوا ڕووناكی ژینە، تیشكی خۆشییە، هەوێنی هەوڵ و تەقەلایە، كلیلی دەرگای سەركەوتنە، مایەی بەرزییە، لابەری ئازار و تاڵی دڵشكستییە. هیوا ژینە دڵنیایی مردنە، هیوا دڵخۆشكەری گیانە، دڵنیایی مایەی خەم و داخە.
ئەگەر هیوا نەبووایە ماوەی ژیان زۆر كورت و ناخۆش ئەبوو و ئێش و ئازاری نائومێدی سەری ئەكردە ئادەمیزاد و دنیای لێ ئەهێنایەوەیەك وە هەزاراران لە گەنجەكان چرای ژینیان ئەكوژایەوە.
هیوا هێز ئەبەخشێ بە گیان و گەشە ئەدا بە لەش و ڕێگەی كۆشش ئەكاتەوە.قوتابی كۆشش ئەكا بۆ فێربوون و زانست و شەونخونی ئەكێشێ بە هیوای سەركەوتن.سەرداری لەشكر گیانی خۆی و هەزاران لە شەڕكەرەكان ئەخاتە تالوكەوە بە هیوای گەیشتن بە ئامانجێك كە زۆر لەلای خۆشەویستتر و گرانبەهاترە لە ژین.
هەروەها شتداهێنەرەكان (مخترعەكان)، پزیشكە گەورەكان و بلیمەتە ناودارەكان، بازرگان، ڕەنجبەر، كرێكار، ئیشكەر، هەر یەكە بۆ خۆی هیوایەكی هەیە لەم جیهانە گەورەیەدا هەوڵی بۆ ئەدا. ئەگەر لە مێژووی گەلە سەركەوتووەكان ورد ببنەوە بۆمان دەرئەكەوێ كە زۆر لە شاه و سالار و سەردارە گەورەكان بە هۆی هیوا و هەوڵدانەوە توانیویانە وڵاتەكەیان پێبگەیەنن وپایەی بەرز بكەنەوە.
(سەردارێكی زۆر گەورە و چالاك كە هەمیشە لە شەڕدا سەرئەكەوت لەشكرەكەی كشایەوە دواوە و بەم هۆیەوە بەشی زۆری ئەو لەشكرە بە دیل گیرا. بەڵام خۆی دەرباز بوو ڕووی كردە شاخ و كێو، چونكە ڕووناكی ژین لە چاویا كوژابووەوە و لە ژیان بێزار بووبوو، چووە كونجی ئەشكەوتێكەوە بیری ئەكردەوە كە چۆن لەم تاڵییە ڕزگاری ببێ. لەو ساتەدا چاوی بە مێروولەیەك كەوت دەنكێ گەنمی بەدەمەوە بوو ئەیویست سەری بخا بۆ شارە بەرزەكەی، بەڵام بێسوود بوو، هەر سەرئەكەوت و ئەكەوتەوە خوارێ.
لە پاش حەفتا جار ئەو دەنكە گەنمەی سەرخست. سەردار كە ئەمەی چاو پێكەوت، وتی: گیانلەبەرێكی وا بچووك و بێ مێشك نائومێد نەبوو تاكو ئامانجی خۆی پێكهێنا من بۆچی وەرز ببم كە خاوەن بیر و هۆشم!. لە دواییدا لەشكرێكی گەورەی ڕێكخستەوە، ناحەزەكانی شكان).
جائەگەر بمانەوێ سەركەوین و ئامانجێكمان دەستگیر بێ ئەبێ تێكۆشین و هەوڵێكی زۆر بدەن چونكە هیوا و هەوڵدان پیاو سەرئەخا، ئەگەر لە ژیاندا هەندێ دڵتەنگی و ناخۆشیمان بێنە ڕێ نابێ پشتمان سارد بێتەوە و واز لەو ئاواتە بهێنن كە هەوڵی بۆ ئەدەین. ئەبێ وەك پێشوو تێهەڵچینەوە ئەگەر لە یەكەم جارا سەرنەكەوین لە دووەم یا سێیەم جارا هەر سەرئەكەوین.
پێویستە لە سەر لاوان و گەنجەكانمان هیوایەكی گەورە بخەنە پێش چاویان و بیكەن بە پێشڕەوی ئیش و تێكۆشین.
نائومێد نەبن چونكە ژین بە بێ هیوا وەك بیابانێكی وشكە كە هیچ گیانلەبەرێتیا ناژی.
لە كۆیەوە: كچە كوردێك (ل. ن)، گەلاوێ، ژمارە 3 ـ 4، ساڵی 3، مارت و نیسانی 1942، ل 9 ـ 92.
لای لایە
هەی لای لایە ڕووناك لای لایە بە سۆزی دەروون بۆت ئەكەم لایە
كورپە بچكۆڵەم ڕۆلەكەی دایە  هیوادارم من بتبێ دەسمایە
بەڵام نامەوێ پارەدار بی هەژار نەناس و لە گەلت دوور بی
خۆت باخت بكە بە ماڵ و بە دڵ لەڕێگەی كوردا، قەت مەبە غافڵ
تۆ كە گەورە بووی ئەبێ بتبینم  هاوار كە بڵێ كوردان ئەدوێنم
من ئەمەندەم وت ڕۆڵە لای لایە نازانم ئەڵێن كورد گەیشتە پایە?
گەر لە خەویشای گوێ گرە لە لایە بزانە دایە چۆن ئەكا لایە
هەی لای لایە ڕووناك لای لایە خۆزگە لەم

جەهلە ڕزگار بووینایە
من وا پێت ئەڵێم هەر لە ئێستاوە گوێ لە من بگرە دڵم سووتاوە
بۆیەكە من تۆ، وا بە خێو ئەكەم بە ڕیشەی جگەر پەروەردەت ئەكەم
هەستی مەردانە قۆڵی لێ هەڵكەی  چی بەرزی گەلتە درێغی نەكەی
هەی لای لایە كچم لای لایە دەبا كچ و كوڕ وەك یەك بوونایە
سلێمانی: گەڕەكی دەرگەزین. كچە كوردێك، گەلاوێژ، ژمارە 8، ساڵی 4 ئۆغستۆسی 1943، ل 41 ـ 42.

بانگێ لە كانی دڵەوە
پیشكەشە بۆ خۆشەویستەكانی وڵاتەكەم و بۆ دایكە شیرینەكانی نیشتیمانەكەم

خوشكە نازدارەكانم، وا بانگتان ئەكەم وە ئەم هاوارەمتان لە كانی دڵەوە بۆ هەڵئەڕێژم تاكو بیبیسن ناڵەی دڵی شێواوم، وە تێبگەن ڕاستی نەهێنییەكەی، وە بڕواننە جەرگی هەڵقرچاوم و ڕەنگی لێل و بزڕكاوم تاكو بزانن چی بەسەر هاتووە دڵی پەست و گیرەوەم، وە بۆچی چاوم فرمێسكی خوێنینیش ئەڕێژێ، وە ڕووم وا زەرد و ژاكاوە.
ئەو هەموو سوێر و تاڵییەی كە من وە زۆرمان ئەیچژین، وە ئەم هەموو تارماییەی كە بەری دڵمی گرتووە، وە ئاسمانی ژیانی تاریك كردووم، هەمووی دەردی كوێرەوەری و هەناسە ساردی ئەم وڵاتەیە، هەمووی داخی ئێش و ئازاری نیشتیمانە بێكەسەكەمە، هەمووی خەفەتی نەگبەتی و نەزانینی گەلەكەیە كەوا جەرگ و دڵی كۆلەوار كردووم. ئا ئەم خەفەتانەیە كە من و گەلێكمانی دووچاری ئەم دەردە كردووە. دەسا توخوا وەرن با بۆتان بژمێرم گلەیی كوول كراوم لە لاتان، لە لای ئێوە ئەی ئەوانەی دوورن لە هەموو بیرێك، وە بێبەشن لە هەموو كردەوە و خزمەتێك، وە مەحرومن لە هەموو ئازادییەك، وە لەلای ئێوە ئەی ئەوانەی كە لە ژێر بەرگێكی ڕەش و نەگبەتا شاراونەتەوە، وە هەمیشە لە بەینی چوار دیوارا ئەژین لە ژێر زۆری باوك و برا و مێردی نەزان و بێ ویجدان و زۆردارا. دە وەرن با لاتان بكەم گلەییم لە بەختی ڕشمانوە لە بەختی ڕەشی وڵاتەكەمان تاكو بزانن چەند بەش بڕاوین لە خۆشی ژیانا وە لە دەست گرتنی نیشتیمانا وەك لە ژنی وڵاتان تا بزانن كەی چینی (گبقە) ژنانی كوردستان وا دەستبەسەر و بێكەلك و ون كراوبوون، بۆ لە كاتێكاكە كورد خۆی بە تەنیا تەماشای جوانی وڵاتەكەی ئەكرد نازانن ژن چ كەلك و شانبەرزییەكی ئەنواند? وە چ پایەیەكی

بەرزی هەبوو لە ژیانا?، وە چۆن لە كاتی تەنگ و چەلەمە و ـ بەزم و خۆشیا خۆی ئەنواند? نەك وەكو ئێمە كە خراوینەتە قەفەسەوە، وەسەر و شوێنی هەموو شتێكیان لێ تێكداوین، وە ڕێی هەموو كەلكێكیان لەبیربردووینەتەوە، وە دوایان خستووینەتەپاشەوە، وە لە پلەیەكی زۆر نزمی ژیاندا فڕێیان داوین، وە زمانی هاواركردنیشیان بڕیوین.
خوشكینە دەسا ئیتر بەسە، دڵتان هەتاكەی بەبەریەوە ئەمێنێ ئەم زنجیرەتان وا لە دەستا بێت؟ هەتاكەی ئەم كۆت و پێوەندە لە پێتانا ناشكێنن؟ تاكەی پەردەی ڕەشی نەگبەتی و شەرم لە خۆتان داناماڵن؟ تا بێنە ناوەوە بازوو هەڵكراو، چاك بەلاداكراو، ئامادە بۆ هەموو پێناوێك، حازر بۆ هەموو یارمەتییەك، چونكە یارمەتی و واجیبات بە تەنیا نەخراوەتە ئەستۆی كوڕگەلەوە بەڵكو پێویستە دایكان زیاتر كەلك لەبەر بن وە زۆرتر هیوای چاكەیان لێ بوەشێتەوە بۆ ئەم وڵاتە كەساسە كە وەكو منداڵێكی ساوا وایە پێویستی بە دایكێكی دڵسۆز، وە بە دایەنێكی بە سەلیقە لە گۆشكردنا، وە بە جۆرە بەخێوكردنێكی باش بۆ ئەوەی ببێتە ڕۆڵەیەكی باش و منداڵێكی گەش وە پڕ كەلك، جا كێن ئەو منداڵە دڵسۆزانە وە ئەو دایەنە بە كەلكانە وەكو بیزانن؟.
وەكو هەموو ئەیزانن هەر ئێمەین ئەو دایكانە وە هەر گەلی كچانە، ئیتر كەواتە ئێمە كە گەلی ژنانین و دایكی دواڕۆژی وڵاتین ئەبێ باش بیزانین كە ئەم خزمەتە هەر بە تەنیا خراوەتە سەرشانی ئێمە و بە تەنیا بە ئێمە سپێرراوە.

سلێمانی: كچە كوردێك، گەلاوێژ، ژمارە 8، ساڵی 5، تشرینی یەكەمی 1944، ل 47 ـ 50.

© 2017 Hawler

Please publish modules in offcanvas position.