تشرینی دووەم 19, 2019

(18)
بەشی دووەم

كەوشەن. پێچ: سەرو شەدە، باو. كرێشە: جۆری كاڵای كەزی (قوماش). سەخرە: گەورە. جن: جنۆكە، ئەجندە.
كڵاوی سەخرە جن: ئەو كڵاوەیە هەر كەسێك لە سەری بكا لە پێش چاوان بزر دەبێ و نامینێ.
(فلیمی حەسەن كەچەڵی فارسی، فلیمە كارتۆنەكان و .... تاد).
* ئەی پشیلەی قوڕ بەسـەر گۆڕ هەڵتەكێنە وای لە كوێ
وا تلی لیلی دەكەن مشكان لەســەر بانی عـەمار 126
گۆڕهەڵتەكێنە: وشەیەكە لە دوی مردووێكی دەڵێن كە میراتی زۆرەو كوڕی نییە، وجاغكۆرە. تلیلی: هەلهەلە، بە هۆی زمان لە نێو دەمدا دەنگی شادی دەربڕین. تلیلیلی: هەراو هۆریای شادومانی.
شیعری (52)و تەرجیعبەندی (9) باس لەو كارەساتانە دەكا كە ڕۆژانێك یەخەو بەرۆكی ئەو میللەتەی خۆمانی گرتبوو. عەمبار پڕەو لێی دەڕژێ. ئەوە گوێزو باوی، مێوژی ڕەش و سوور، شتەكانیتر. مشكەكان بە كەیفو زەوقی خۆیان لەو جێیە عەججایبو بەهەشت ئاسایە! نە پشیلە (ترس)، نە گۆڕهەڵتەكێنە (خاوەن) چاویان دیار نییە. بۆیە دەنگی خۆشیو پێكەنینو هەلهەلەی مشكەكان ڕۆژە ڕێیەك دەڕواو كەس بە كەس نییە! هەر لێدەو بخۆ، پێكەنینو هەڵپەڕینە.
* نـاقــڵیشــێ دار پوازی تا لە جنسی خــۆی نەبێ
پشـتی كورد كوردی شـكاندوویە وەهـا بـوو هەر قەدەر 131
پواز: سنگێكە لە دار دروست كراوە. لە نێو درزی دارێكی قەڵشتیدا دەكوتن تا لێك ببنەوەو یەكتری نەگرنەوە. جنس: ڕەگەز. بیور، تەورداس و مشار دەسكیان دارە! واتە: ئەگەر دار كرمی لە خۆی نەبێ هەزار ساڵ زیاتر دەمینێ.
حەمدی بە كوردی و بە كورتی، ئەنجامی هەموو ماڵ وێرانیو كارەساتەكانی میللەتی كورد و خۆبەختكردن و شۆڕشەكانی ئەوساو ئێستای بەچوار وشە دەربڕیوە: پشتی كورد، كورد شكاندوویەتی.
* بە جێ نایە بە پول پول داعییەی جود
گەرم نابێ بە تڕ حەمامی زل زوود 158
بە بەخشینی پارەی وردە (فلس فلس) ی پێشان، (250) دیناری ئێستا، وا بزانی شتێكی گەورەت كردووە، زۆر سەهوی! ئێمەی كوردیش دەڵێین: حەمام بە تڕان گەرم نابێ. چ جای ئەوەی حەمامەكەش گەورەو زل بێت.
* جێی حاكمی بەبانی بە دەروێشـیدا زەمان
ڕێـوی ئـەخـاتـە لانەی شـێری ژیــانـەوە 164
ئیتر ئەوە دنیایە! دەروێشێك دەبێ بە پاشاو ئەمر دەكا، چەند سەیرە! ڕێوی لە لانەی شێردا سینگی خۆی دەردەپەڕێنیو پۆز لێدەدا.
* بە گـوێی هـەمڕازی تـۆدا ئــاشنـا نـابێ فیـغــانی من
لە برسی قەت ئەپرسـێ ئەوكەسـەی تێری تەعـاماتە 180
هەمڕاز بەرامبەر فغان
برسی = تێر
كورد دەمێكە ئەو هەستە وردو دەروونییەی هەبووە: زگی تێر، ئاگای لە زگی برسی نییە.
* دنیا بە دەستی زۆرەوە هەر وەك عەسایەكە
پاڕانەوە و خـوا خـوایە هەموو ئەسـلـەحەی گەدا 223
ستەمكارو بێویژدانی خاوەن چەك و هێز، بەردەوام بە (زۆری) دەكا. كە دەڵێی: بە زۆرییە!
وەرامدەداتەوە: بە زۆرییەو زیاتریش، ئەوەی ئەو دەیەوێ هەر ئەو دەبێ. حەمدی لەو دێرەیدا هەر دوو چەكەكەی نیشانداوە: گۆپاڵ ــــ پاڕانەوە، ئەوەی دووەم قەت حسێبی بۆ نەكراوەو ناخوا.
* عومری وەك عەیشی بە دایم كورتە (حەمدی) عاشقان
پێنج و دوو ڕۆژێ بە هەر دوو حیسسەیی بولبول درا 229 + 254
پێنجو دوو ڕۆژ: بۆ كەمو كورتی تەمەنو زەمەن گوتراو. (شاعیرەكانمان ئەو دەستەواژەیان زۆر بەكارهێناوە). بە حەمدی دەڵێ: تەمەنو ژیانی عاشقان زۆر كەمو كورتە، هەر پێنجو دوو ڕۆژێكە، ئەویش بۆتە بەشو میراتی بولبول.
* ئەرزی ئەقدەس گەر لە دنیادا ببێ مەیخانەیە
قودسییە وەك خۆم ئەوانەی لەو مەقامە نێژرا 230 + 48
وادی موقەددەس لە قورئانی پیرۆزدا هاتووە: (تفسير: (إني أنا ربك فاخلع نعليك إنك بالواد المقدس طوى)گه (12). ئەرزی ئەقدەس یا ئەرزی موقەددەس: ئەرزی پیرۆز، ئەرزی پاكو پاكیزە. مەیخانە: ئەو شوێنەیە بە بەردەوامی شەرابی لێ دەخورێتەوە، دركەیە بۆ شوێنی پیرۆزو شوێنی خواپەرستی، جیهانی لاهووت، (وەكو زاراوەیەكی سۆفیگەری واتای تریشی هەیە). مەقام: جێگە، جێی ژیان، ئەو جێگەیەیە لە كەعبە ح. ئیبراهیم نوێژی لێكردووە، (واتای زۆرە).
ئەم چیرۆكەم لە باوكی خوالێخۆشبووم بیستووە: بە فەرمانی باری تەعالا، كۆمەڵە پیاوێكی غەیبی (نادیار) تەرمو لاشەی ئەو مردووانەی خوایی بوونو بێ ئەمری ئەویان نەكردبوو، خوای گەورەش خۆشیانی دەوێت. بۆ ئەو شوێنە پاكو پیرۆزە دەگۆزرێنەوە، ئەو مرۆیانە لەوانەن تا ڕۆژی خۆی هیچیان لەسەر نابێت، لە ئازارو ئەشكەنجە، گوڕەو شاریش نادرێن.
هەر هەمان ئەو پیاوە غەیبییانە، هەندێ تەرمولاشەی ئەو شوێنە پیرۆزە، دەبەنە دەرەوەی ئەم سنوورە، دیارە شایانی ئەوە نین لەو شوێنە پیرۆزە تەقەت كراونو شاردناونەتەوە. لە شارێكی گەورەی ئەو دەورو پشتانە، ئەوەی دزی بكردبا لە سێدارە دەدرا (ئیعدام دەكرا). كابرایەك ئەو قسەو چیرۆكەی ئەرزی موقەددەسی گێلێببوو، عەجمانی نەمابوو. بە نوێژی نیوڕانێ دزیەكی دەكا (دیارە مەبەستی خۆی هەبووە).
كە دەگیرێو دەیبەنە لای قازی دەڵێ: خینی منت، وكی شیری داكت لێ حەڵاڵ بێت. پاش نەمانم تەرمەكەم لە ئەرزی موقەددەس بشارنەوە! قازی كەسێكی وەلیو خوایی بوو، زۆر زوو لە مەبەستی كابرای گەیشت. لە خۆی نزیك كردەوە، سەری كابرای گرتو لە بن باڵی یا بن هەنگڵی لای ڕاستەی نا، گۆتی: چاوت باوێ سەریەك، سەڵتەكەی بەسەریدادا، پاش دەمەكی ئەو جارە سەرەكەی بردە لای چەپەی، دیسان گۆتی: چاوت باوێ سەریەكو بیان قوچێنە!

 

© 2017 Hawler