تشرینی یەکەم 16, 2019

(سەفەرێک بۆ ناو پیاوە ئازاکان ) – نوسینی دانا ئادەم شمیدت
ئێستا چەند دەیەیەک بەسەر داستانی نوسینی ئەم کتێبەدا تێپەڕیوە. شوێن وڵاتی لوبنانە و شار بەیروتی پایتەخت و ماڵ، ماڵی ( دانا ئادەم شمیدت ) ی بەرپرسی نوسینگەی رۆژنامەوانیی (رۆژنامەی نیویۆرک تایمز ) ی ئەمەریکایە. زەمەن، ساڵی ١٩٦٢ وەو سەروبەندی هەمان کاتی ئێستایە. دەمەو ئێوارەیە و ( دانا ) خەریکە لە ماڵەکەی خۆی بێتە دەرێ و لەو دەمەدا زەنگی تیلیفۆنەکەی دەزرنگێتەوە . دوای پرسیار لەبارەی ناسنامەی ئاخێوەر، دەنگێک لە سەرەکەی دیکەوە وەڵام دەداتەوە:
_ من لە بارەگای مستەفا بارزابییەوە هاتووم.
لێرەش لە کوردستان تەنیا چەند مانگێك بەسەر هەڵگیرسانی شۆڕشی ئەیلول بە سەرکردایەتی مستەفا بارزانی تێپەریوە. لە بەغدا رژێمی دیکتاتۆری تاکڕە و چنگ داگرتوو بەسەر هەموو دەسەڵاتەکانی ‌‌‌‌‌حکومەت،مەودای ئازادییەکانی تا ئەو پەڕی توانا، بەر تەسک کردۆتەوەو حوکمی واقیعیی و کردەنیی لە دەستی سوپادا چڕبۆتەوە. خەڵکی کورد بە هەر جۆرە بیانویەک، دەگیرێن، ئەشکەنجە دەدرێن، دەست بەسەر دەکرێن یان بۆ باشوری عیراق دوور دەخرێتەوە . هەندێک خەڵک لە گرتووخانەکاندا بە تاوانی جۆر بە جۆر حوکمی سەیرو سەمەرەیان بۆ دەبڕدرێتەوە. سوپا، کوردستانی کردۆتە بەرەی شەڕو هێزی ئاسمانیی عێراق بێ پەروا بەسەر ئاسمانی کوردستانەوە دەسوڕێنەوە و گوندو ئاوەدانی و باخچەو خەرمانی دانەوێڵە دەسوتێنن.
بەلای دەسەڵاتەوە هەرشتێک بۆنی کوردبوونی لێبێت جێی گومانەو ڕژێم سڵ لە سێبەری خۆشی دەکاتەوە.
رژێم بە هەموو تواناو کەرەسەگەلێکی سیاسیی و ئابووری هەرچەشنە کەناڵێکی کەلەبەر دەستی دایە و هەوڵ دەدات رووداوەکانی ناوەوەی وڵات لەبەر چاوی جیهانی دەرەوە بشارێتەوە. لە هەل و مەرجێکی ئاوادا کە هێزە هەرێمیی و نێودەوڵەتییەکان سەرەتاتکێ لەگەڵ بارودۆخی ناوەوەی عێراقدا دەکەن، لەدەمێکدا کە هەموو سنورەکان و دەریچەکان بە توندیی و مەحکەمیی داخراون، شەهیدی نەمر (ئەحمەد تۆفیق) سکرتێری حیزبی دیموکراتی کوردستای ئێران لە سەر فەرمانی بارزانی، لە لوبنان دەکەوێتە کار بۆ گەیاندنی پەیامی بارزانی و، هاندان و رازیکردنی رۆژنامەوانانی وڵاتانی رۆژئاوا تا بە نهێنی بێنە ناو کوردستان و سەردانی ناوچەکانی شۆڕش بکەن. هەر خۆشی رێبەرایەتیی هێنانی ( دانا ئادەم ) دەکاو لە ئەرکەکەیدا سەرکەوتن بە دەست دێنێت .
نوسەر لەم سەردانە مەیدانییەدا بۆ ناوچەکانی کوردستان هەوڵی داوە پوختەیەک لە بارەی مێژوو و نەژادی کورد، گەنجینەیەک زانیاری بەسەر یەکەوە بنێت. لەدوایدا لەبارەی بنەماکانی هۆشیاری نیشتیمانیی و پرسی سیاسیی دۆزی کورد بیرورا گەڵاڵە بکات . پاشان لەبارەی حکومەتەکانی عێراق لە ڕووی پێکهاتەی سیاسیی و سروشتی کۆمەڵگەی کوردی بنوسێت.
لە بەشەکانی دیکەی کتێبەکەدا (دانا ) لەبارەی هۆکارەکان و چۆنیەتی هەڵگیرسانی شەڕ، هەل و مەرجی نێوخۆیی رژێمی فەرمان ڕەوا، پێگەی جەماوەریی، وەزعییەتی سیاسیی و نێو دەوڵەتییەوە شیکردنەوە پێشکەش بکات. لە بەشێکی تردا ژیانی جەنگاوەرانی رێگای ئازادی( پێشمەرگەی کوردستان )، پێکهاتە و باری رێکخراوەیی، گوزەران و ژیان، خۆراک و پۆشاک و حەوانەوە، تاکتیکەکان و ئۆپەراسیۆنە جەنگییەکان روون بکاتەوە.
لەبەشێکی دیکەی کتێبەکەدا بەناوی ( داستانی بارزانی) ژیان و بەسەرهاتی سیاسیی، بۆچوون و لێڕوانینەکانی بارزانی لەبارەی رژێمی سیاسیی، دۆزی نەتەوەیی کورد و شۆڕشی کوردستان هەروەها رەوشی هەمەلایەنەی شۆڕش دەخاتە روو.
ئەم کتێبە، یەکێکە لەو سەرچاوە دەگمەن و نایابانەی کە بیانی لەسەر شۆرشی گەورەی کوردستان نوسیویانە .
بە دڵنیاییەوە بۆ کات و ساتی خۆی توانیویەتی گورزێکی گەورە ئاراستەی ئەو هەڵمەتی خامۆش کردن و تەوقە ئیعلامییە بکات کە دوژمنانی کوردستان لەسەر کێشەی رەوای کورد و شۆرشی کوردستانیان دانابوو .
لەو بنەمایەوە کە نوسەر خۆی شایەت و بینەری کەمێک لەو تاوان و کاولکاریی و دەست درێژییانە بووە کە لەلایەن دەوڵەتەوە دەکرایە سەر گەلی کورد.
سەرچاوەکە بەهایەکی بەڵگەنامەیی و سیاسیی بەنرخی هەبووەو بۆ ئێستاش سەرچاوەیەکی مێژوویی یەکجار بەرزە و هێشتا کەم هاوتایی و ئێستایی خۆی لە دەست نەداوە.

© 2017 Hawler