ئاب 23, 2019

هۆشدارییەك بۆ جووتیاران سەبارەت بە سووتانی زەوییەكانیان

هەموو ساڵێك لەو ئان و ساتەدا وەرزی دروێنەی گەنم و جۆ دەست پێدەكات و جووتیاران بە خۆشحاڵیەوە بە گشتی بەری ڕەنجی ئەو ساڵەیان دەدوورنەوە بۆ ئەوەی سوودی لێ ببینن و دڵ و دەروونیان ئاسوودە بێت، بەڵام بەداخەوە دوای ئەنجامدانی وەرزی دروێنەی گەنم و جۆ هەندێك لە برا جووتیارەكان بێ لەبەرچاوگرتنی بەرژەوەندی گشتی و ژینگە و ئاو و هەوا لێرەو لەوێ لە زەویەكانیاندا ئاگر لە پووش و پەڵاشەكانیان بەردەدەن بە حیسابی چەوتی خۆیان بەو كارە زەویەكانیان بەو شێوەیە پاك دەكەنەوە، بەڕاستی ئەوەیان زەرەر و زیانێكی زۆر بە دوای خۆیدا دەهێنێ و كارێكی باش نیە، چونكە بەو هۆیەوە ئاگر دەپەڕێتەوە بۆ زەوییەكانی دەوروبەریش، پاشان بە ئاسانی كۆنتڕۆڵ ناكرێ و ماندووبوونێكی زۆری پێویست دەبێ، بۆیە دەبێ برا جووتیارەكان لەو ڕووە وە بەوپەڕی بەرپرسیەتی و هەستكردن بە لێپریسینەوە مامەڵە لەگەڵ زەوییەكانیان بكەن و بەدەستی خۆیان نەبنە هۆكاری زەرەر و زیان گەیاندن بە دەوروبەر، چونكە ئەوە مافێكی گشتیە و لەو حاڵەتەشدا پەشیمانی دادیان نادات و كار لە كار دەترازێ، دیارە لە ساڵانی ڕابردوو ئەو حاڵەتە نەخوازراوە زۆر جار دووبارە بۆتەوە و زەوییەكی زۆر سووتاوە و لە ئەنجامدا زەرەر و زیانێكی زۆری لێ كەوتۆتەوە و ژینگە و ئاو و هەواش بەو گازە كوشندەیە ژەهراوی بوە و گرفت و كێشەی كۆمەڵایەتی زۆریشی لێ كەوتۆتەوە و دڵی زۆر كەس ڕەنجاوە، بۆیە با بە خۆماندا بچینەوە و بەرژەوەندی گشتی لەبەرچاو بگرین و كارێك نەكەین كە لە ئەنجامدا پەنجەی پەشیمانی بگەزین یان بەهۆی كێشەی كۆمەڵایەتیەوە ڕوو بە ڕووی یاسا ببینەوە.

 

محەمەد سەعید كوردە - هه‌ولێر

© 2017 Hawler