ئازار 22, 2019

فەرهەنگی خەم لە ئەکادیمیای کوردی

گومبەدەکەی ئەکادیمیای کوردی، خانەوادەی شێخی شاعیران (حەسیب قەرەداخی) و ئەکادیمیستان و ئەدیب و شیعردۆستان و هەوەدارانی (فەرهەنگی خەم)ی کۆکردەوە و رۆژی ٤ی ئادار رێوڕەسمێکی بەهاداری سازکرد بۆ بەرچاوخستن و بەدیاری بەخشینی چاپی دووەمی (فەرهەنگی خەم)-ەکانی (حەسیب قەرەداخی).
مامۆستایان( رێبوار سیوەیلی و عبدالخالق یەعقوبی) دوو باسی شیکارییان لەبارەی حەسیب و شیعر و خەم و ناسۆری و جیهانبینی فراوان و پڕ بابەتی جۆراو جۆری شێخی شاعیرانەوە پێشکەش کرد.
(بەهات حەسیب قەرەداخی) شیعری ( من هیچ ناڵێم) ی خوێندەوە کە شاکارێکی دەگمەنی شێخی شاعیرانە بۆ راپەڕینی خەڵکی کوردستان.
(ئازا حەسیب قەرەداخی) باسی چۆنێتی و قۆناغەکانی کارکردنی بۆ ئەم چاپەی فەرهەنگی خەم کرد و ئاماژەی بۆ ئەو جیاوازییانە کرد کە لە نێوانی چاپی یەکەم و دووەمدایە و سوپاسی هەموو ئەو بەڕێزانەی کرد کە بۆ ئەم بەرهەمە ماندوو بوون. بەتایبەتی کتێبخانەی هەژار موکریانی لە هەڵەبجە. بەڕێزان ( حەکیمی مەلا ساڵح و رەسوڵ سوڵتانی و سەفەر هەورامی).
جێی وەبیرهێنانەوەیە کە سەرجەمی شیعرەکانی حەسیب قەرەداخی لە ساڵی ٢٠٠٢دا لەسەر ئەرکی ( نێچیرڤان بارزانی) سەرۆکی حکومەتی هەرێم، لە دەزگای ئاراس چاپ و بڵاوکرایەوە.

 

© 2017 Hawler