تشرینی یەکەم 21, 2020

گۆڵكاری خولی نایابی كوردستان وه‌ڵامی 11 پرسیاری هه‌ولێر ده‌داته‌وه‌

دیار عه‌لی له‌ دایكبووی ساڵی 1992، هێرشبه‌ری نه‌ورۆز ناسراو به‌ (حه‌مكه‌)، گۆڵكاری وه‌رزی رابردووی خولی پله‌یه‌كی كوردستان به‌ 9 گۆڵ، له‌م وه‌رزه‌شیدا له‌گه‌ڵ نه‌ورۆز، به‌ ئاستێكی نایاب ده‌ركه‌وتووه‌ و به‌ 9 گۆڵ ریزبه‌ندی یه‌كه‌می گۆڵكاری خولی نایابی كوردستانی گرتووه‌ و ئاستێكی نایاب پیشكه‌ش ده‌كات، ئه‌م هێرشبه‌ره‌ی نه‌ورۆز له‌ دیمانه‌یه‌كی رۆژنامه‌ی هه‌ولێر وه‌ڵامی 11 پرسیار ده‌داته‌وه‌ و ناوی باشترین یاریزانی نێوخۆ و جیهان ئاشكرا ده‌كات كه‌ پێی سه‌رسامه‌، نهێنی ناسناوی (حه‌مكه‌)ـش ده‌دركێنێت.

* ده‌ستپێكی وه‌رزشیت كه‌ی بووه‌؟
ـ له‌ 2004، په‌یوه‌ندیم به‌ تازه‌پێگه‌یشتوانی سیروانی نوێ كرد، دواتر قۆناخی لاوانیشم بڕی تا له‌ 2012 سه‌رخرامه‌ ریزی یه‌كه‌می تیپه‌كه‌.
* چیت هه‌یه‌ له‌سه‌ر خولی نایابی كوردستان؟
ـ ئه‌م وه‌رزی خوله‌كه‌ زۆر باشه‌، چونكه‌ به‌شێوه‌ی خول ده‌روات، ژماره‌ی یانه‌كانیش زۆرترن له‌ ساڵانی رابردوو، راگه‌یاندنیش رۆلێكی باش ده‌بینن له‌ نیشاندانی رووداوه‌كان به‌ هانده‌ران، بۆ قۆناخی دووه‌میش هیوادارم به‌ جوانترین شێوه‌ به‌ڕێوه‌بچێت، نه‌ورۆزیش بۆ یه‌كه‌م جار ببێته‌ پاڵه‌وانی خولی كوردستان.
* حه‌زده‌كه‌ی بۆ كام یانه‌ی تر یاریی بكه‌ی؟
ـ ته‌نها حه‌زده‌كه‌م بۆ نه‌ورۆز یاریی بكه‌م، چونكه‌ لێكتێگه‌یشتنم له‌گه‌ڵ یاریزانه‌كان له‌نێو یاریگا زۆر باشه‌.
* ئه‌ی بۆ هه‌ڵبژارده‌ی كوردستان؟
ـ به‌ڵێ بێگومان حه‌زده‌كه‌م یاریی بۆ هه‌ڵبژارده‌ی كوردستان بكه‌م.
* ئاواتی وه‌رزشیت چییه‌؟
ـ بردنه‌وه‌ی خولی نایابی كوردستان بۆ نه‌ورۆز بۆ یه‌كه‌مجار له‌سه‌ر ده‌ستی ئێمه‌.
* ئاماده‌ی بۆ یانه‌یه‌كی خولی عێراقی یاریی بكه‌یت؟
ـ چه‌ندان یانه‌ په‌یوه‌ندیان پێوه‌كردووم، به‌ڵام له‌به‌ر هه‌ندێ كاری تایبه‌تی خۆم نه‌گونجاوه‌ بچم.
* بۆچی ناسناوی (حه‌مكه‌)ـت لێنراوه‌؟
ـ هه‌ر كه‌ مناڵ بووم باوكم به حه‌مكه‌‌ بانگی كردووم، ئێستاش به‌وه‌ ناسراوم.
* كێ پاڵپشتیت ده‌كات بۆ وه‌رزش كردن؟
ـ خێزانه‌كه‌م به‌رده‌وام هاوكاریم ده‌كات و پاڵپشتمه‌.
* جوانترین گۆڵی ئه‌م وه‌رزه‌ت كامه‌یه‌؟
ـ گۆڵی دووه‌م، كه‌ له‌ زێرڤانی تۆمارم كرد.
* كه‌ی په‌یوه‌ندیت به‌ نه‌ورۆزه‌وه‌ كرد؟
ـ ئه‌مه‌ یه‌كه‌م وه‌رزمه‌ له‌ نه‌ورۆز، وه‌رزی رابردوو له‌ پێشمه‌رگه‌ی سلێمانی یارییم ده‌كرد، تیپه‌كه‌شمان هێنایه‌وه‌ ریزی نایابه‌كان.
* به‌كام هێرشبه‌ری ناوخۆ و جیهانی سه‌رسامیت؟
 ـ له‌ ناوه‌خۆ به‌ ئه‌حمه‌د سالار، له‌ ده‌ره‌وه‌ش به‌ كریستیانۆ رۆناڵدۆ.

 

بارزان ئەكرەم - هەولێر

© 2017 Hawler