ئازار 21, 2019

سۆلاری له‌ لاساییكردنه‌وه‌ی زێدان شكستی هێناوه‌

رۆژنامه‌ی ماركا ئاماژه‌ی بۆ ئه‌وه‌ كردووه‌ كه‌ سۆلاری له‌ لاساییكردنه‌وه‌ی زێدان شكستی هێناوه‌ و كه‌سایه‌تییه‌كی لاوازی هه‌یه‌ و له‌ ژووری جلگۆڕینی یاریزانان و لای هانده‌رانیش خۆشه‌ویست نییه‌.
سه‌رچاوه‌كه‌ هێمای بۆ ئه‌وه‌ش كردووه‌ سۆلاری له‌ كاتی یارییه‌كان هه‌مان هه‌ڵه‌كانی لۆپیتیخی دووباره‌ ده‌كاته‌وه‌ و شتێكی نوێی پێشكه‌ش نه‌كردووه‌.
ماركا ئه‌وه‌شی نووسیوه‌یه‌: سۆلاری جێگیی په‌نجه‌ی له‌ پلانه‌كانی دیار نییه‌ و له‌سه‌ر رێچكه‌ی كاره‌ چه‌وته‌كانی لۆپیتیخی ده‌ڕوات، هاوشێوه‌ی راهێنه‌ره‌ دوورخراوه‌كه‌ی پێشوو، كۆرتوا به‌شێوه‌یه‌كی سه‌ره‌كی له‌ لالیگا و چامپیۆنزلیگ یاری ده‌كات، هه‌روه‌ك لۆپیتیخی یاری به‌ یۆرێنتی، ئۆدریزۆلا ریگلیۆن ده‌كات.
رۆژنامه‌كه‌ مه‌درییه‌كه‌ ئه‌وه‌شی خستۆته‌ڕوو كه‌ سۆلاری هه‌وڵداوه‌ له‌سه‌ر رێچكه‌ی زێدان بڕوات، به‌ڵام شكستی هێناوه‌ و ریال مه‌دریدی گه‌ڕاندۆته‌وه‌ خاڵی سه‌ره‌تا، هه‌مان ئه‌و خاڵه‌ی كه‌ لۆپیتیخی له‌سه‌ر ده‌ركرا.
رۆژنامه‌كه‌ ئاماژه‌ی بۆ ئه‌وه‌ش كردووه‌ كه‌ سۆلاری هاوشێوه‌ی لۆپیتیخی لای هانده‌ران و یاریزانانیش خۆشه‌وسیت نییه‌ و هه‌روه‌ك لۆپتیخی نه‌یتوانیوه‌ ژووری جلگۆڕین رێكبخات و متمانه‌یان به‌ده‌ستبهێنێت، به‌شداری به‌ هه‌مان ئه‌و یاریزانه‌ ده‌كات كه‌ لۆپیتیخی پشتی پێده‌به‌ستن و ته‌نیا ئیسكۆی له‌ پێكهاته‌كه‌ دوورخستۆته‌وه‌، له‌ كاتێكدا زۆربه‌ی یاریزانه‌كانی پێكهاته‌ی سه‌ره‌كی ئاستیان له‌ ئیسكۆ باشتر نییه‌.
له‌ راپۆرته‌كه‌دا هێما بۆ ئه‌وه‌ش كراوه‌ له‌ دوای رۆیشتنی زێدان زه‌حمه‌ته‌ هانده‌ران و یاریزانانی ریال مه‌درید راهێنه‌رێكیان پێ هه‌زم بكرێت و پێیانوایه‌ كه‌س ناتوانێت ببێته‌ جێنشینی زیزۆ.
ماركا ئه‌وه‌شی خستۆته‌ڕوو كه‌ سۆلاری له‌ دوای یه‌كسانبوونه‌كه‌یان به‌رامبه‌ر ڤیاریال، به‌رپرسان و هانده‌رانی یانه‌كه‌ی به‌هۆی لێدوانێك نیگه‌ران و توڕه‌ كردووه‌، كاتێك رایگه‌یادووه‌ كه‌ به‌ ئه‌نجامی یارییه‌كه‌یان به‌رامبه‌ر ڤیاریال رازیبوون، له‌ كاتێكدا ریال مه‌درید له‌مجۆره‌ تیپانه‌ نییه‌ به‌ خاڵێك رازی بێت.
سانتیاگۆ سۆلاری ته‌مه‌ن 42 ساڵ، له‌ رۆژی 13 نۆڤێمبه‌ری 2018 له‌ شوێنی لۆپیتیخی ئه‌ركی راهێنه‌رایه‌تی ریال مه‌دریدی وه‌رگرت، دوو یاری له‌ لالیگا به‌رامبه‌ر یانه‌كانی ئیبار و ریال سوسیداد دۆڕاندووه‌، له‌ چامپیۆنزلیگیش له‌ نێو یاریگه‌ی سانتیاگۆ بێرنابیۆ به‌رامبه‌ر سیسكا مۆسكۆ تووشی شكستێكی پڕ شه‌رمه‌زاری هات، له‌ یارییه‌كیش یه‌كسانبووه‌ به‌رامبه‌ر ڤیاریال، 7 یاریشی بردۆته‌وه‌ به‌رامبه‌ر یانه‌كانی (میلیللیه‌ له‌ جامی شای، رۆما، رایۆ ڤایكانۆ، عه‌ینی ئیماراتی، كاشیمای ژاپۆنی، هۆیسكا و ڤالێنسیا).


 

ئەسعەد ئیسماعیل- هەولێر

© 2017 Hawler