ئازار 21, 2019

لە جامی عێراقدا، ئه‌مڕۆ هه‌ولێر له‌ یاری گه‌ڕانه‌وه‌دا میوانداریی زه‌ورا ده‌كات

ئه‌مڕۆ له‌سه‌ر یاریگه‌ی شه‌هید فڕانسۆ هه‌ریری و له‌ یاری گه‌ڕانه‌وه‌ی قۆناخی 16 ی جامی عێڕاق یانه‌ی هه‌ولێر میوانداری یانه‌ی زه‌ورا ده‌كات، یارییه‌كه‌ له‌ كاتژمێر 1:30 خوله‌ك به‌ڕێوه‌ ده‌چێت، له‌ یاری چووندا كه‌ له‌ شاری به‌غدا ئه‌نجامدرا هه‌ردوو یانه‌ به‌بێ گۆڵ یه‌كسان بوون، ئه‌مه‌یش ئه‌نجامێكی باش بوو بۆ كوڕانی نازم شاكر و گه‌ره‌كیانه‌ ئه‌مڕۆ سپی پۆشه‌كان تووشی شكست بكه‌ن و خۆیان بگه‌یه‌ننه‌ قۆناخی هه‌شته‌م، له‌م یارییه‌دا 3 یاریزانی یانه‌ی زه‌ورا به‌هۆی په‌یوه‌ندی كردنیان به‌ هه‌ڵبژارده‌ی عێڕاق له‌ یارییه‌كانی جامی ئاسیا به‌شدار نابن.

مێژوو له‌ به‌رژه‌وه‌ندی كێیه‌؟
یارییه‌كه‌ ئه‌مڕۆ له‌ كاتژمێر 1:30 خوله‌ك ئه‌نجام ده‌درێت، به‌هۆی ئه‌وه‌ی كه‌ هه‌ر یانه‌یه‌ك بدۆڕیت ماڵئاوای ده‌كات پێشبینی ده‌كرێت یارییه‌كه‌ هه‌ستیارییه‌كی زۆری پێوه‌ دیار بێت، له‌ ڕیزه‌كانی یانه‌ی هه‌ولێر یاریزانی دڵی به‌رگری (هه‌ردی سیامه‌ند) دوای گه‌ڕانه‌وه‌ی بۆ هه‌ولێر له‌م یاریه‌دا به‌شداری ده‌كات، ئه‌مه‌یش فاكته‌رێكی به‌هێز ده‌بێت بۆ هه‌ولێرییه‌كان، دوای هاتنی ڕاهێنه‌ر نازم شاكر یانه‌كه‌ چه‌ند گۆڕانكارییه‌كی كردووه‌ سێ یاریزانی پیشه‌گه‌ری له‌ تیپه‌كه‌ی دوور خسته‌وه‌ و گرێبه‌ستیشی له‌گه‌ڵ یاریزانی سوری و پێشووی نه‌جه‌ف (عه‌لا شبلی) مۆركردووه، هه‌ولێر نایه‌وێت به‌ ئاسانی له‌ جامی عێڕاق ماڵئاوای بكات و گه‌ره‌كیه‌تی به‌ بردنه‌وه‌ له‌ زه‌ورا خۆی بگه‌یه‌نێته‌ قۆناخی 8 یانه‌ی زه‌وراش كه‌ پاڵه‌وانی وه‌رزی ڕابردووی خولی نایابی عێڕاقه‌ له‌م یارییه‌دا له‌ تواناكانی چه‌ند یاریزانێكی سه‌ره‌كی تیپه‌كه‌ی بێبه‌ش ده‌بێت كه‌ له‌گه‌ڵ هه‌ڵبژارده‌ی عێڕاق له‌ جامی ئاسیا كه‌ له‌ وڵاتی ئیماڕات به‌ڕێوه‌ ده‌چێت به‌شدارییان كردووه‌.
هه‌ولێر و زه‌ورا له‌ مێژوودا یاری زۆرییان به‌یه‌كه‌وه‌ كردووه‌، مێژووی ڕووبه‌ڕوبونه‌وه‌ی ئه‌و دوو یانه‌یه‌ له‌ ساڵی 2001 تاكو ئێستا له‌به‌رژه‌وه‌ندی یانه‌ی هه‌ولێره‌، كه‌ له‌ 19 یاری نێوانیان له‌و ماوه‌یه‌ و له‌ میانی یارییه‌كانی خولی نایابی عێڕاق و جامی یه‌كێتی ئاسیا هه‌ولێر 9 جار به‌سه‌ر زه‌ورادا سه‌ركه‌وتووه‌ و 5 یاریش زه‌ورا براوه‌ بوو، له‌ پێنج یاریشدا هه‌ردوو یانه‌ یه‌كسان بوون كه‌ دواین یارییان هه‌فته‌ی ڕابردوو بوو له‌ یاری چوونی جامی عێڕاق هه‌ردوو یانه‌ له‌شاری به‌غدا به‌ بێ گۆڵ یه‌كسان بوون.

براوه‌ی ئه‌م یارییه‌ له‌گه‌ڵ كێ یاری ده‌كات؟
هه‌ردوو یانه‌ له‌ یاری چووندا به‌ بێ گۆڵ یه‌كسان بوون، بۆیه‌ براوه‌ی ئه‌و یارییه‌ ده‌گاته‌ قۆناخی هه‌شت و له‌وێیش له‌گه‌ڵ براوه‌ی یاری نێوان ئه‌مانه‌ی به‌غدا و نه‌وتی ناوه‌ڕاست یاری ده‌كات، كه‌ ئه‌وانیش له‌ یاری چووندا به‌بێ گۆڵ یه‌كسان بوون، ئه‌گه‌ر یارییه‌كه‌یش یه‌كسان بێت به‌ لێدانی سزا ناوی ئه‌و یانه‌یه‌ ئاشكرا ده‌بێت كه‌ ده‌گاته‌ قۆناخی هه‌شته‌م.‌

 

هێمن ئەسكەندەر - هەولێر

© 2017 Hawler