ئەیلول 30, 2020

ئه‌مڕۆ و سبه‌ی یارییه‌كانی‌گه‌ڕی سێیه‌می خولی پله‌یه‌كه‌كانی كوردستان به‌ڕێوه‌ ده‌چێت

ئه‌مڕۆ و سبه‌ی چوارشه‌ممه‌ گه‌ڕی سێیه‌می خولی یانه‌ پله‌ یه‌كه‌كانی كوردستان به‌ڕێووه‌ ده‌چن، یارییه‌كان له‌ كاتژمێر 2:00 ئه‌نجام ده‌درێن، ئه‌مڕۆ له‌ یارییه‌كانی كۆمه‌ڵه‌ی یه‌كه‌مكۆیه‌ میوانداریی یانه‌ی هه‌ڵۆ ده‌كات، یانه‌ی سیروانی نوێی پێشه‌نگی یانه‌كانیش له‌ یارییه‌كی به‌هێزدا میوانداری یانه‌ هه‌ڵه‌بجه‌ی شه‌هید ده‌كات، یانه‌ی ئاشتیش میوانداری یانه‌ی ئاڵتون كۆپری ده‌كات، له‌ یارییه‌كانی سبه‌یشدا یانه‌ی ئاسۆ ده‌بێته‌ میوانی یانه‌ی كفری و ڕزگاریش ڕووبه‌ڕوی سۆلاڤ ده‌بێته‌وه،‌ له‌ شاری كه‌ركووكیش خاك میوانداری گاره‌ ده‌كات.

یارییه‌كانی كۆمه‌ڵه‌ی یه‌كه‌م
له یارییه‌كانی كۆمه‌ڵه‌ی یه‌كه‌مدا و له‌ یاری لوتكه‌دا ئه‌مڕۆ یانه‌ی سیروانی نوێی پێشه‌نگی یانه‌كانی كۆمه‌ڵه‌كه‌، میوانداری یانه‌ی هه‌ڵه‌بجه‌ی شه‌هید ده‌كات، سیروانی نوێ تاكه‌ یانه‌یه‌ كه‌ له‌ دوو گه‌ڕی ڕابردوودا براوه‌ بووه‌ و به‌ 6 خاڵ پله‌ی یه‌كه‌می كۆمه‌ڵه‌كه‌ی گرتووه‌، كوڕانی ڕزگار عه‌لی تامه‌زرۆی گه‌ڕانه‌وه‌ن بۆ ڕیزی نایاب و گه‌ره‌كیانه‌ له‌ كاروانی سه‌ركه‌وتنه‌كانیان به‌رده‌وام بن و هه‌ڵه‌بجه‌یش به‌ ده‌ردی یانه‌كانی تر ببه‌ن، هه‌ڵه‌بجه‌یه‌كانیش له‌ دوو یاری ڕابردوودا 2 خاڵیان هه‌یه‌ و ئه‌نجامه‌كانیان به‌ دڵی هانده‌رانی پایته‌ختی شه‌هیدان نیه‌، به‌ گوته‌ی وه‌لی كه‌ریمی ڕاهێنه‌ریش یانه‌كه‌ یاری دوای یاری ئاستی باشتر ده‌بێت و متمانه‌ی به‌ تیپه‌كه‌ی هه‌یه‌ كه‌ ده‌توانن ڕكه‌به‌ری یانه‌كانی تر بكه‌ن، له‌ یاریه‌كی تردا یانه‌ی كۆیه‌ میوانداری یانه‌ی هه‌ڵۆ ده‌كات، كۆیه‌ له‌ دوو یاریدا براوه‌ نه‌بووه‌ به‌ دوو خاڵ له‌ پله‌ی چواره‌م دێت، هه‌ڵۆیش 4 خاڵی هه‌یه‌ و له‌ پله‌ی دووه‌م دێت، یانه‌ی ئاشتیش میوانداری یانه‌ی ئاڵتون كۆپری ده‌كات، هه‌ردوو یانه‌ یه‌ك خاڵیان هه‌یه‌ و له‌ پله‌كانی شه‌شه‌م و حه‌وته‌م دێن، له‌ یاریه‌كی تردا یانه‌ی سۆران پێشوازی له‌ یانه‌ی شێخان ده‌كات، سۆران 4 خاڵی هه‌یه‌ و پله‌ی سێیه‌می گرتووه‌ و شێخانیش به‌ بێ خاڵ له‌ پله‌ی كۆتای دێت.

یارییه‌كانی كۆمه‌ڵه‌ی دووه‌م
سه‌به‌ی چوارشه‌مه‌یش به‌ ئه‌نجامدانی 4 یاری یارییه‌كانی كۆمه‌ڵه‌ی دووه‌م به‌ڕێوه‌ ده‌چێت تیایدا له‌ یاریه‌كی گرنگدا یانه‌ی ئاسۆ ده‌بێته‌ میوانی یانه‌ی كفری، ئاسۆ له‌ دوو یاری ڕابردوودا 4 خاڵی هه‌یه‌ و له‌ پله‌ی سێیه‌م دێت و مه‌به‌ستیه‌تی به‌ ئه‌نجامێكی باش له‌ ده‌ڤه‌ری گه‌رمیان بگه‌ڕێته‌وه‌، یانه‌ی كفریش ئه‌نجامه‌كانی وه‌ك پێویست نیه‌ و ته‌نیا 1 خاڵی هه‌یه‌ و به‌ دۆڕانی له‌ یارییه‌كه‌ی سبه‌یدا هیوای گه‌یشتنی به‌ قۆناخی دووه‌م لاواز ده‌بێت، بۆیه‌ به‌ هه‌موو پێوه‌ره‌كان پێشبینی یارییه‌كی به‌هێز ده‌كرێت، له‌ یارییه‌كی تردا یانه‌ی سه‌یدسادق له‌به‌رده‌م هانده‌ره‌ زۆره‌كانی پێشوازی له‌ یانه‌ی خانه‌قین ده‌كات، سه‌یدسادق 2 خاڵی هه‌یه‌ و له‌ پله‌ی شه‌شه‌م دێت یانه‌ی خانه‌قینیش به‌ كۆكردنه‌وه‌ی 3 خاڵ خانه‌ی پێنجه‌می گرتووه‌، له‌ یارییه‌كی تردا یانه‌ی گاره‌ كه‌ 4 خاڵی هه‌یه‌ و له‌ خانه‌ی دووه‌‌م دێت ڕوده‌كاته‌ شاری كه‌ركووك و ڕووبه‌ڕوی یانه‌ی خاك ده‌بێته‌وه‌ كه‌ به‌ 4 خاڵ و به‌ جیاوازی گۆڵ پله‌ی یه‌كه‌می گرتووه‌، بۆیه‌ پێشبینی یاریه‌كی به‌هێز ده‌كرێت، له‌ دواین یاری ئه‌م كۆمه‌ڵه‌یشدا یانه‌ی ڕزگاری له‌سه‌ر یاریگه‌ی خۆی میوانداری یانه‌ی سۆلاڤ ده‌كات ڕزگاری 3 خاڵی هه‌یه‌ و له‌ پله‌ی چواره‌م دێت، یانه‌ی سۆلاڤیش هیچ خاڵێكی نیه‌ و له‌ پله‌ی كۆتای دێت، ڕزگاری به‌ مه‌به‌ستی بردنه‌وه‌ و گه‌ڕانه‌وه‌ بۆ نێو ڕكه‌به‌ریه‌كان یاری ده‌كات و سۆلاڤیش بۆ ڕزگار بوون دوركه‌وتنه‌وه‌ له‌ ناوچه‌ی مه‌ترسیدار له‌گه‌ڵ ڕزگاری ده‌جه‌نگێت. ‌

یارییه‌كانی كۆمه‌ڵه‌ی یه‌كه‌م/ سێشه‌ممه‌4/12/2018‌
كۆیه‌ × هه‌ڵۆ /یاریگه‌ی كۆیه‌‌
سیروانی نوێ ×هه‌ڵه‌بجه‌ی شه‌هید/یاریگه‌ی سیروانی نوێ
سۆران× شێخان /یاریگه‌ی سۆران
ئاشتی × ئاڵتون كۆپری /یاریگه‌ی ئاشتی
یارییه‌كانی كۆمه‌ڵه‌ی دووه‌م/ چوار شه‌ممه‌ 5/12/2018
ڕزگاری×سۆلاڤ/یاریگه‌ی ڕزگاری
كفری ×ئاسۆ/یاریگه‌ی كفری
سه‌یدسادق× خانه‌قین/یاریگه‌ی سه‌یدسادق‌
خاك×گاره‌/یاریگه‌ی خاك
بۆ زانین ئه‌م وه‌رزه‌ی خولی تۆپی پێی یانه‌ پله‌ یه‌كه‌كانی كوردستان به‌ به‌شداری 16 یانه‌ به‌ڕێوه‌ ده‌چێت، یانه‌ به‌شداربووه‌كانی خوله‌كه‌یش به‌سه‌ر دوو كۆمه‌ڵه‌ دابه‌شكراون، له‌ هه‌ر كۆمه‌ڵه‌یه‌ك دوو یانه‌ سه‌رده‌كه‌ون بۆ چوارگۆشه‌ی زێڕین و دواتر هه‌رچوار یانه‌كه‌ به‌ شێوازی چوون و هاتن به‌یه‌كه‌وه‌ یاری ده‌كه‌ن و دوو یانه‌یش سه‌رده‌كه‌ون بۆ خولی نایابی كوردستان و خاوه‌نی پله‌كانی كۆتایی هه‌ردوو كۆمه‌ڵه‌كه‌یش داده‌به‌زن بۆ ڕیزی یانه‌ پله‌ دووه‌كان.

 

هێمن ئەسكەندەر - هەولێر

© 2017 Hawler