تشرینی دووەم 16, 2018

له‌ ساڵی 2001ـەوە تا ئێستە، 10 بردنه‌وه‌ بۆ هه‌ولێر، 9 بردنه‌وه‌ بۆ قوه‌جه‌وییه‌ و 6 یەكسانبوون

له‌گه‌ڕی حه‌وته‌می خولی نایابی عێڕاق یانه‌ی هه‌ولێر سبه‌ی له‌ یاریه‌كی به‌هێزدا له‌شاری به‌غدا ڕووبه‌ڕوی یانه‌ی قوه‌ جه‌ویه‌ ده‌بێته‌وه‌، هه‌ولێر له‌ 6 یاریدا 9 خاڵی هه‌یه‌ و خانه‌ی نۆیه‌می گرتووه‌ و یانه‌ی جه‌ویه‌یش كه‌ یارییه‌كی كه‌متر ئه‌نجامداوه‌ له‌ 5 یاریدا به‌15 خاڵ له‌ پێشه‌نگی یانه‌كان ده‌بیندرێت، یارییه‌كه‌ له‌سه‌ر یاریگه‌ی شه‌عبی نێوده‌وڵه‌تی له‌ كاتژمێر 4:45 خوله‌ك به‌ڕێوه‌ده‌چێت، هه‌ولێر له‌ شه‌ش یاریدا دوو سه‌ركه‌وتن و سێ یه‌كسان بوون و دۆڕانێكی هه‌یه‌، له‌ دواین یاریشدا له‌گه‌ڵ یانه‌ی نه‌وتی میسان كه‌ له‌ پێشه‌نگی یانه‌كان بوو به‌بێ گۆڵ یه‌كسان بوو.

هه‌ولێر ئاماده‌یه‌
ئه‌گه‌ر سه‌یری بارودۆخی هه‌ردوو یانه‌ بكه‌ین ڕه‌نگه‌ یانه‌ی جه‌ویه‌ به‌ هه‌موو پێوه‌ره‌كان باشتر ئاماده‌بێت بۆ یارییه‌كه‌ و له‌ هه‌فته‌ی ڕابردویش بۆ جاری سێیه‌م بونه‌ پاڵه‌وانی جامی یه‌كیه‌تی ئاسیا و به‌ ڕابه‌رایه‌تی ڕاهێنه‌ری به‌ ئه‌زموون (باسم قاسم) پێكهاته‌یه‌كی به‌هێزیان هه‌یه‌، دوای گه‌ڕانه‌وه‌ی یانه‌ی هه‌ولێریش بۆ خولی نایابی عێڕاق ئه‌مساڵ یانه‌كه‌ له‌ ئاستێكی مام ناوه‌ندی ده‌بیندرێت و گه‌ره‌كیه‌تی له‌ خوله‌كه‌ بمێنێته‌وه‌ و پێكهاته‌یه‌كی باش بۆ ساڵانی داهاتوو ئاماده‌ بكات.
ده‌رباره‌ی ئه‌م یارییه‌ش له‌ لێدوانێكدا بۆ ڕۆژنامه‌ی هه‌ولێر (ڕێبین ڕه‌مزی) به‌رپرسی ڕاگه‌یاندنی یانه‌ی هه‌ولێر گووتی" یانه‌كه‌مان به‌ ته‌واوه‌تی بۆ ئه‌م یارییه‌ ئاماده‌یه‌ و چه‌ند ڕۆژێكه‌ به‌شێوه‌یه‌كی چڕوپڕ ئاماده‌كاریمان بۆ ئه‌و یارییه‌ ئه‌نجامداوه‌، هیچ یاریزانێكمان پێكانی نیه‌ و هیچ یاریزانێكیشمان به‌هۆی كارتی ڕه‌نگه‌و ڕه‌نگ بێ به‌ش نابێت و هه‌موو یاریزانه‌كان بۆ یارییه‌كه‌ ئاماده‌ن".

مێژووی ڕووبه‌ڕ و بونه‌وه‌ی نێوان هه‌ردوو یانه
هه‌ردوو یانه‌ی هه‌ولێر و قوه‌جه‌ویه‌ له‌ مێژوودا زۆر جار له‌ چوارچێوه‌ی یارییه‌كانی خولی نایابی عێڕاق و جامی عێڕاق و جامی یه‌كیه‌تی یانه‌كانی ئاسیا به‌یه‌كه‌وه‌ یاریان كردووه‌، یانه‌ی هه‌ولێر كه‌ 4 جار بۆته‌ پاڵه‌وانی عێڕاق و دوو جاریش پله‌ی دووه‌می جامی یه‌كیه‌تی ئاسیای به‌ده‌ستهێناوه‌، مێژووه‌یه‌كی باشی به‌رانبه‌ر یانه‌ به‌هێزه‌كانی عێڕاق هه‌یه‌، له‌ ساڵی 2001 وه‌ تاكو یارییه‌كه‌ی سبه‌ی هه‌ردوو یانه‌ 25 جار له‌ یارییه‌ فه‌رمیه‌كاندا ڕووبه‌ڕوی یه‌ك بونه‌ته‌وه‌، یانه‌ی هه‌ولێر له‌ 10 یاریدا به‌سه‌ر یانه‌ی هه‌ولێردا سه‌ركه‌وتووه‌، یانه‌ی قوه‌جه‌ویه‌یش له‌ 9 یاریدا براوه‌ بووه‌، له‌ شه‌ش یاری نێوانیشیاندا یه‌كسان بوون، گه‌وره‌ترین سه‌ركه‌وتنی یانه‌ی جه‌ویه‌ له‌و 25 یاریه‌دا بردنه‌وه‌ بوو به‌ 4 گۆڵی بێ به‌رانبه‌ر له‌ وه‌رزی 2005 – 2006 گه‌وره‌ترین سه‌ركه‌وتنی یانه‌ی هه‌ولێریش له‌ ساڵی 2013 بوو كه‌ له‌ شاری به‌غدا به‌ سێ گۆڵ به‌رانبه‌ر به‌ گۆڵێك سه‌ركه‌وتنی تۆمار كرد.
بۆیه‌ له‌ یارییه‌كه‌ی سبه‌یدا پێشبینی ده‌كرێت یاریه‌كه‌ له‌ ئاستێكی به‌رزدا بێت، جه‌ویه‌ هه‌وڵ ده‌دات به‌ بردنه‌وه‌ له‌ هه‌ولێر پارێزگاری له‌ پێشه‌نگی یانه‌كان بكات و هه‌ولێریش گه‌ره‌كیه‌تی به‌ ئه‌نجامێكی باش بگه‌ڕێته‌وه‌ پایته‌ختی كوردستان، هه‌ولێر به‌رده‌وام له‌ ده‌ره‌وه‌ی یاریگه‌ی خۆیدا به‌شێوه‌یه‌كی باشتر ده‌رده‌كه‌وێت.

© 2017 Hawler