ئایار 23, 2022

زۆرترین بینراو وه‌رزش

Error: No articles to display

گرینگترین و دیارترین پێشهات و رووداوە وەرزشییە ناوخۆییەكانی ساڵی 2017

بەشی یەكەم

رۆژنامەی هەولێر، بە دوو بەش، گرینگترین رووداو و پێشهاتە وەرزشییە ناوخۆیی و جیهانییەكان دەخاتە ڕوو. ئەمڕۆ لە بەشی یەكەمدا، جێبایەخترین پێشهاتە وەرزشییە ناوخۆییەكانی ساڵی 2017 دەخرێنە بەر دیدی خوێنەران.

یانەی پێشمەرگەی هەولێر بووە پاڵەوانی خولی نایابی كوردستان
یانەی پێشمەرگەی هەولێر بۆ یەكەم جار لە مێژووی خۆیدا بووە پاڵەوانی خولی نایابی كوردستان دوای ئەوەی پلەی یەكەمی قۆناخی چوارگۆشەی زێڕینی گرت.
دەستەبەركردنی ناسناوەكە لەدوا گەڕی ئەو قۆناخە هات كاتێك یانەی پێشمەرگەی هەولێر سەركەوتنی بەسەر یانەی كەركووك تۆمار كرد، هاوكات یانەكەی باباگوڕگوڕیش توانی پلەی دووەم بە دەست بهێنێت و یانەی شێروانە پلەی سێیەمی بەدەست هێنا و یانەی نەورۆزیش پلەی چوارەمی دەستخست.

باشترینەكانی خولی نایابی كوردستان
دوای تەواو بوونی خولی نایابی پێشمەرگەی كوردستان باشترینەكانی خولەكە دەستنیشان كران، كە تێیدا رەوا یوسف یاریزانی پێشمەرگەی هەولێر وەك باشترین یاریزانی خولەكە دیاری كرا و و دیار جومعە گۆڵپارێزی كەركووك، وەك باشترین گۆڵپارێز هەڵبژێردرا و عەلی كاكە مینە هێرشبەری شێروانە بەتۆماركردنی نۆ گۆڵ بوو بە گۆڵكاری خولەكە.

دابەزینی یانەكانی گارە و دهۆك بۆ خولی پلە یەكی كوردستان
هەردوو یانەی دهۆك و گارە بۆ خولی یانە پلە یەكەكان دابەزین، دوای ئەوەی پلەی كۆتایی كۆمەڵەكانیان لە خولی نایابی كوردستان گرت، دهۆك لە كۆمەڵەی یەكەم یاریی كرد و گارەیش لە كۆمەڵەی دووەم.

هەردوو یانەی سەید سادق و كفری سەركەوتن بۆ ریزی پلە یەكەكان
لە خولی یانە پلە دووەكانی كوردستان هەردوو یانەی سەید سادق و كفری سەركەوتن بۆ خولی یانە پلە یەكەكانی كوردستان، هاوكات یانەی سەید سادق بوو بە پاڵەوانی خولەكە دوای ئەوەی لە یاریی كۆتاییدا یانەكە بە ئامادەبوونی هاندەرێكی زۆر لە یانەی كفری بردەوە و بوو بە پاڵەوان.
بڕیاردان لەسەر ئەنجامدانی وەرزی نوێی 2017 ـ 2018ی خولەكانی كوردستان
دوای چاوەروانییەكی زۆر فیدڕاسیۆنی تۆپی پێی كوردستان بریاری دا خولەكانی كوردستان ئەنجام بدرێن.
دەستپێكردنەوەی خولەكان لە وەرزی نوێدا وەك ساڵانی رابردوو دەبێت، دوای ئەوەی بەهۆی شەڕی داعش و قەیرانی دارایی بەشێك لە خولەكان لە دوو وەرزی رابردوو ئەنجام نەدران، بەڵام وەرزی نوێ وەك بڕیاری لەسەردرا، سەرجەم خولەكان بەهەموو جۆرەكانییەوە بەڕێوەبچن و، لەسەرەتاشەوە خولی فوتساڵی كچان دەستی پێكرد و دواتر خولی لاوانی نایابی كوردستان، بریاریشە خولەكانی پلە نایاب و پلە یەك و پلە دوو ئەنجام بدرێن.

كەركووك و گازی باكوور لە خولی نایابی كوردستان كشانەوە
بەهۆی رووداوەكانی 16ی ئۆكتۆبەر و ئەو بارودۆخەی لە كەركوك هاتە ئاراوە، هەردوو یانەی كەركووك و گازی باكوور بڕیاریان دا لە خولی نایابی كوردستان بۆ وەرزی نوێ بكشێنەوە و بەشداری نەكەن، هۆیەكەش بۆ ئەستەمی ئەنجامدانی یارییەكان لەشاری كەركووك و هاتنی تیپەكانی دیكە بۆ شارەكە گەڕاندەوە و چەندان هۆكاری دیكە.

یانەی هەولێر بۆ خولی یانە پلە یەكەكانی عێراق دابەزی
بە فەرمی، یانەی هەولێر بۆ خولی یانە پلە یەكەكانی عێراق دابەزی، دوای ئەوەی لەوەرزی رابردوو لەخولی نایابی عێراق پاشەكشەی كرد، ئەگەر چی بەر لە بڕیاری دابەزینی بۆ خولەكە ئەوەی باسی لێوەكرابوو یانەكە لە خولی نایاب بەشداری دەكات، بەڵام پێداگری و سووربوونی زیاتر لە 10 یانەی شارەكانی بەغدا و باشووری عێراق لەسەر دابەزاندی یانەی هەولێر و بڕیاری هاتنەخوارەوەی یانەكەی قەڵاومنارە بوو بەفەرمی.

هەڵبژاردن بۆ یانەكانی كوردستان ئەنجام دران
لە ناوەڕاستی ساڵی 2017 دوای زیاتر لە چوار ساڵ، هەڵبژاردن بۆ یانەكانی كوردستان ئەنجام دران، هەڵبژاردنەكەیش بۆ سەرۆك و جێگر و ئەندامانی دەستەی كارگێری بوو، بەڵام ئەوەی تێبینی كرا، زۆربەر سەرۆك و جێگیر و ئەندامانی یانەكانی كوردستان، لە شوێنی خۆیان مانەوە.

بالەی پێشمەرگەی سلێمانی بووە پاڵەوانی خولی عێراق
دوای بەشداریكردنی تیپی بالەی پێشمەرگەی سلێمانی لەخولی بالەی یانەكانی عێراق، ئەو یانەیە توانی ناسناوەكە دەستەبەر بكات.
تیپەكەی سلێمانی لە قۆناخە جیاوازەكاندا ئاستێكی بەرزی پێشكەش كرد و دواتر لە خولی بژاردە وتوانی یانە بەهێزەكانی شاری بەغدا تێپەڕێنێت و جامی پاڵەوانیەتییەكە بۆ شاری سلێمانی بگوازێتەوە.

شەتڕەنجی خانزاد پلەی سێیەمی خولی نایابی عێراق دەستەبەر كرد
یانەی شەتڕەنجی خانزاد، دوای بەشداریكردنی لە پاڵەوانیەتیی یانەكانی عێراق كە لە شارەكانی بەغدا و دیوانیە بەڕێوەچوو توانی پلەی سێیەمی پاڵەوانییەتییەكە دەستەبەر بكات. خولی نایابی شەترەنجی عێراق بەبەشداری 14 یانە بەڕێوەچوو.

بەچكەشێرانی خانزاد بوونە پاڵەوانی عێراق
دوای بەشداریكردنیان لە پاڵەوانیەتی شەتڕەنجی یانەكانی عیراق بۆ خوار تەمەنی 14 ساڵان، یانەی شەتڕەنجی خانزاد بە میدالیای زێڕەوە لە بەغداوە گەڕانەوە شاری هەولێر.
بەچكەشێرانی تیپی خانزاد بە پێنج یاریزانەوە بەشدارییان كرد و توانیان لەسەرجەم یارییەكان ببەنەوە و پلەی یەكەم دەست بخەن.

بادمنتۆنی یانەی ئەكاد بووە پاڵەوانی عێراق
یانەی وەرزشی ئەكاد، كە نوێنەرایەتی شاری هەولێری كرد لە پاڵەوانیەتیی بادمنتۆنی عێراق و پاڵەوانیەتییەكە لە شاری كەركووك بەڕێوەچوو، لەسەر ئاستی پلەی نایاب توانی براوەی پلەی یەكەم بێت و ناسناوی پاڵەوانیەتییەكە بباتەوە.

یانەی سلێمانی بووە پاڵەوانی تۆپی سەرمێزی یانەكانی كوردستان
تیپی سەرمێزی یانەی سلێمانی توانییان پلەی یەكەمی پاڵەوانیەتیی یانەكانی كوردستان بەدەست بهێنن، دوای ئەوەی كۆنتڕۆڵی ركەبەرییەكانی پاڵەوانیەتییەكەیان كرد.

بۆ یەكەم جار پاڵەوانیەتیی كراوەی تێنس لەسەر ئاستی عێراق لە هەولێر بەرێوەچوو
بۆ یەكەم جار لەمێژووی عێراق گەورەترین پاڵەوانیەتیی كراوەی تێنسی سەرزەوی لەشاری هەولێر بەڕێوەچوو، پاڵەوانییەتییەكە بەبەشداری 57 یاریزان ئەنجام درا و تێیدا ئەكرەم موستەفا خاوەن پۆلینی یەكەمی عێراق، بووە پاڵەوان و سان تەحسینیش وەك یاریزانیێكی كورد پلەی سێیەمی بردەوە.

بەڕێوەچوونی پاڵەوانیەتی نێودەوڵەتی ئەسپسواری لە هەولێر
بە بەشداری چەندان وڵات، پاڵەوانیەتیی نێودەوڵەتی ئەسپسواری لە هەولێر بەرێوەچوو.
پاڵەوانیەتییەكە بەبەشداری وڵاتانی ئەڵمانیا - هەنگاریا - ئەمریكا- عێراق - ئوردن و كوردستان ئەنجام درا و ركەبەرییەكانیش لە یانەی ئەسپسواری هەولێر بۆ ماوەی دوو رۆژ بەردەوام بوو.

بەڕێوەچوونی شەشەمین ماراسۆنی نێودەوڵەتیی هەولێر
شەشەمین ماراسۆنی نێودەوڵەتی هەولێر بەڕێوەچوو، بەڵام ئابڵوقەدانی ئاسمانی هەرێم و ڕاگرتنی گەشتە نێودەوڵەتیەكان، ڕێگربوو لەوەی ژمارەیەكی زۆر پێشبڕكێكار لە وڵاتانی دەرەوە بەشداری تێدا بكەن.
ئەوانەی بەشدارییان لە ماراسۆنەكەدا كرد ژمارەیان نزیكەی 2000 كەس دەبوو و هاوڵاتیانی هەرێم و عێراق و ئاوارە و پەنابەرانی سوریا بەشدارییان تێداكرد.
ئەم ماراسۆنە و ئەوانەی پێشوو بە سەرپەرشتی رێكخراوی ئەربیل ماراسۆن ئەنجام دران.

پاسكیلسوارانی یانەی كۆیە بەشداری لەپاڵەوانیەتی یانەكانی عەرەبیان كرد
تیپی پاسكیلسواری یانەی وەرزشی كۆیە، لەپاڵەوانیەتی یانە پاڵەوانەكانی وڵاتانی عەرەبی بە بەشداری تیپی حەوت وڵاتی عەرەبی كرد و پاڵەوانیەتییەكەیش لەوڵاتی جەزائیر بەڕێوەچوو.
دوای تەواوبوونی پاڵەوانیەتییەكە تیپی پاسكیلسواری یانەی وەرزشی كۆیە، هیچ میدالیایەكی بەدەست نەهێنا، بەڵام بەشداریكردنەكە ئەزموونی زیاتر بە یاریزانانی یانەكە بەخشی.

هێمن مەهدی بەناوی كوردستانەوە بەشداری لە پاڵەوانیەتی جیهانی تایكواندۆ كرد
‎لە ساڵی 2016ـدا هێمن مەهدی قادر، وەك یاریزانێكی تایكواندۆی كورد و بە ناوی كوردستان، بەشداری لە پاڵەوانییەتی جیهانی تایكواندۆ لە وڵاتی كۆریای باشوور كرد، كە تێیدا 64 یاریزان ركەبەرییان كرد.
‎هێمن مەهدی لە ركەبەرییەكانی كاشی شكاندن پشكداریی كرد، دوای دەستپێكردنی پاڵەوانیەتییەكە و بڕینی قۆناخەكان یەك لەدوای یەك، توانی لەدواییدا و بەشكاندنی 12 كاشی ژمارەیەكی پێوانەیی بشكێنێت و پاڵەوانیەتییەكە بباتەوە و باشووری كوردستان بكاتە خاوە مێدالیای زێڕ.

© 2017 Hawler