تشرینی دووەم 16, 2018

پاڵەوانی كورد لوقمانی رۆستەمی براوەی مەدالیای زێڕین لە هونەی تایچی

لوقمان خدر عەزیز، ناسراو بە(لوقمانی رۆستەمی) لە ساڵی 1991 لە شاری سەردەشتی رۆژهەڵاتی نیشتمان لە دایك بووە، هەر لە منداڵییەوە بە هۆی فیلمەكانی برووسلی و جیتلییەوە خەون و خولیای دەبێتە هونەری كۆنگ فۆ و تایچی و كاتێكی زۆری سەروەختی منداڵی و هەرزەكاری خۆی بۆ راهێنان لەسەر ئەو یارییە بەبێ ملامۆستا تەرخان دەكا.

بۆیە لەو بوارەدا درێژە بە خوێندن دەدات و لیسانسی لە بواری پەروەردەی جەستەیی و پەروەردەی راهێنەری وەرگرتووە.
لەساڵی 2008 لە تاران دەچێتە لای راهێنەری گەورە(عەبباسی هەمزەوی) و لای ئەو دەست بە راهێنان و خوێندن دەكات و لەبەر دەستی ئەو مامۆستا لیهاتووەدا بە شێوەیەك رۆڵ دەگێڕێ، كە لە ساڵی 2011 مامۆستای ناوداری چینی ئەو بوارە بە ناوی(لیویانگ) لە شاری سەردەشت سەردانی دەكات و لە ماوەی سێ رۆژدا تەواوی ئەو شتانەی لە مامۆستا هەمزەوی فێری دەبێ تاقیكردنەوە و نمایشی دەكات.
دەبێتە مایەی پەسەندی (لیویانگ) و بڕوانامەی تایچی پێ دەبەخشێ.
لە مانگی رەشەمەی ساڵی 2013 لەلایەن فیدراسیۆنی وۆشوی ئێرانەوە لەگەڵ چەندین ئوستادی دیكە دەنێررێت بۆ خولی(مربی گری بین المللی تایچی ئەنتالیای وڵاتی توركیا كە 40 دەوڵەت بەشدارییان تێدا كردووە و لوقمان رۆستەمی كەمتەمەنترین بەشداربووی خولەكە بووە.
لە ساڵی 2017 یەكەمین كێبەركێی جیهانی (تایچی) لە نێوان 22 وڵاتی بەشداردا لە شاری(چینگ دۆ) لوقمانی پلەی شەشەم بەدەست دێنێ.
لە هاوینی ساڵی 2017 وەك تیمی میللی ئێران لە وڵاتی ئەڵمانیا بەشداری لە دوو بەشدا كردووە:
- تالۆی دەست پلەی یەكەم و خەڵاتی ئاڵتوونی بە دەست هێناوە
- - تالۆی شمشیر پلەی دووەم و خەڵاتی زیوی بەدەست هێناوە.
- لە مانگی جۆزەردانی 2018 ـدا بەشداری لە خولی(ئەكادیمی نێونەتەوەیی (تایچ) لە (چن جیاگۆ) لە بەشی قوتابخانەی دێرینی تایچی(لائۆجیا) كردووە و بە پلەیەكی باش سەركەوتووە.
- لە خولی پێشكەوتووی(تایچی)(چن جیاگۆ) سەرۆكی ئەو ئەكادیمیایە سەرسام دەبێ بە تواناكانی و وەك قوتابی خۆی پەسەندی دەكات.
- بانگهێشتكراوە بۆ شاری سیاتل یێ ئەمریكا كە كۆنگرەی ساڵانەی تایچی لەوێ بەڕێوە دەچوو، بەڵام لەبەر ئەوەی لوقمان هەموو بەشداریكردن و سەفەرەكانی لەسەر ئەركی خۆی بووە نەیتوانیوە خەرجی ئەو سەفەرە دابین بكات بۆیە بەشداری ئەو كۆنگرەیەی نەكردووە.
ئەوەی مایەی سەرنجە لە تەواوی ئەو خول و یارییانەدا، كە بەشداری دەكا لوقمان دەڵێ(من كوردم) بەڵام بە ناوی تیپی میللیی ئێران و بەبێ هیچ هاریكارییەك لەو تیمەوە بەشدار دەبێ. لە دواكێبەركێی تایچی كە خولی سێیەمە و 45 دەوڵەتی جیهان لەشاری(بورگاس)ـی وڵاتی بوڵگاریا بەشداری تێدا دەكەن لوقمان بڕیاری دابوو، ئەگەر بتوانێ پلەی یەكەم بە دەست بێنێ لە جیاتی ئاڵای كوردستان(كە ناتوانێ بەرزی بكاتەوە) جەمەدانەیەكی سوور كە رەمزی كوردایەتی و خوێنبەخشینە، بەرز بكاتەوە و خۆزگەی دەخواست بیتوانیبایە ئاڵای كوردسستان بەرز بكاتەوە.

 

مەحموود هۆمەر باوزی - هەولێر

© 2017 Hawler