حوزەیران 23, 2018

"خولی نایابی كوردستان لە ڕووی رێكخستنەوە خراپترین وەرزی تێپەر كردووە"

لەوەتەی فیدراسۆنی تۆپی پێی كوردستان، خولەكانی بەرێوە دەبات، لە هیچ كام لەوەرزەكان وەك ئێستا نەبووە، لە ڕووی كارگێڕی و رێكخستن و بڕیاردان لە سەر كات و شوێنی بەرێوەچوونی خولەكان، چونكە ئەم وەرزە بڕیارەكانی فیدراسیۆن ئەوەندە خێرا و لە پرێكدان، كە وەرگرتنی و قوڵكردنی ئاسان نیە تەنانەت لای هاندەرانی یانەكانیش، هەندێك جار لە یەك هەفتە بڕیاری بەرێوەچوونی یارییەكان لە كاتژمێرێك بۆ كاتژمێرێكی دیكە دەگۆڕدرێت.

لە ڕوانگەی ئەو كاردانەوانەی لە لایەن هاندەران و سۆشیالأ میدیا هەست پێدەكرا، رۆژنامەی هەولێر بە پێویستی زانی لە نزیكەوە بۆچوونی ئەو یاریزن و ئەكادیمیانە وەربگرێت و لەسەر لایەنە خراپ و باشەكانی ئەم وەرزەی فیدراسیۆنی تۆپی پێی كوردستان دەستنیشان بكات.

"خولەكانی كوردستان هەر لە سەرەتاوە لە ڕووی پلاندانانەوە هەڵەیە"
دكتۆر دیار كەمال، پسپۆڕێكی تایبەتمەندن بە كارگێری و وەرزش، بەرێوەچوونی خولەكە بەم شێوە دەبینێ خولی كوردستان لە سەرەتاوە لە ڕووی پلاندانانەوە هەڵەیە، چونكە پێشتر دەستپێكردنی خولەكە كاتەكەی دیار نەبوو، هەموو كاتێك خولی كوردستان كە تیپەكان دەچنە ماوەی گواستنەوەی یاریزانان، دەبێت ماوەكەی لە دوو هەفتە یا سێ هەفتە بێت و لە ڕووی زانستیەوە یاریزانەكان پێویستە پشوویەكی ئەرێنی وەربگرن، بەڵام یاریزانەكانی خۆمان 4 بۆ 5 مانگ پشوو وەردەگرن، ئەمە خۆی لە خۆیدا كارەساتە، ئینجا خولەكانیش بە شێوەی پچرپچر و بەرێوەئەچن، بێگومان زیانی زۆری هەیە بۆ كوالیتی و ئاستی یاریی كردن، لە ڕووی پلان و لایەنی هونەری و دەروونیەوە كێشە بۆ تیپەكان دروست دەكات، ئاستی پاڵنەری بردنەوە و پێشكەوتن لای تیپەكان كەم دەبێتەوە، ئەوانەش كاریگەری زۆری هەیە بە تایبەتی لە ڕووی زانستیەوە بەسەر كۆی خولەكە بەگشتی.

بێستون ئەكرەم، ئەم هۆكارانە وادەكەن فیدراسیۆن ئەم بڕیارانە بدات
بێستوون ئەكرەم یاریزانی پێشووی یانەی برووسك مامۆستای زانكۆ لە كۆلێژی وەرزشی سۆران، بەم شێوە بۆ هەولێر دوا: ئەو بارە نالەبارەی هەرێمی كوردستانی گرتۆتەوە، لە ماوەی ڕابردوو وا ی كردووە خولەكان بە پێی پلانی دارێژراو بەرێوەنەچن، كەم بوونەوەی یانەكان كشانەوە لە خولەكە وای كردووە كات و ساتی یارییەكان نەزانرێ، بۆیە یارییەكان درێژدەكرێنەوە و دواخستنی یارییەكان ڕوودەدات، فیدراسیۆن ناچارە بڕیاری دواخستنی یارییەكان بدات، بۆ ئەوەی گیانی یاریزانەكانی سەلامەت بن لە هەر ئەگەرێكی نەخوازراو، چونكە گرژی و ئالۆزی لە هەندی شار وا دەكات یانەكان نەتوانن بە ئاسانی گەشت بكەن، بۆیە من ئەم دواخستنە بە بڕیارێكی باش دەزانم، بۆ پاراستنی یاریزانەكان، بەڵام كاریگەری خراپیشی هەیە بەسەر لایەنی دەروونی و پرۆگرامی راهێنەرەكان، هەروەها لایەنی دارایی یانەكانیش وەك پێویست نین، كە ئێستا خولەكە كەوتۆتە ناو مانگی رەمەزان، دیسان كاریگەری خراپی دەبێت لەسەر لایەنی فسیۆلۆجی و دەروونی وجەستەی یاریزانەكان، چونكە سیستەمی خۆراك و خەو و راهێنانەكانی دەگۆڕێن، بەڵام من پێم وایە فیدراسیۆن هۆكاری ئەم دواخستنە نیە، ئەو بارە نا لە بارەیە، كە بەسەر كوردستان داهاتووە، بۆیە فیدراسیۆن ناچارە ئەم بڕیارانە بدات.

فەرحان جەبار كێ بە بەرسی ئەم دۆخە دەزانێت؟
فەرحان جەبار راهێنەر و یاریزانی پێشووی كوردستان بە رۆژنامەی هەولێری راگەیاند كە لە سەرەتاوە چۆن دەبێت فیدراسیۆنی تۆپی پێی كوردستان داوا لە یانەكان بكات چ؟ شێوازێكی بەرێچوونی خولەكەتان پێباشە بۆ بەرێوەچوونی خولی كوردستان.
فەرحان دەشڵێت: ئەگەر ژمارەی یانەكان كەم نەبووایە رەنگە بەسەر دوو كۆمەڵە دابەشبكرانایە، بەمەش شێوازی بەرێوەچوونی خولەكە بە یەك كۆمەڵە و دوو قۆناغ زۆر باشتر دەبوو، چونكە من وای دەبینم ئەم هۆكارانەی خوارەوە كاریگەریان بەسەر خولی كوردستان وە هەبێت.
1-دیاریی نەكردنی دەستپێكی خولی كوردستان لە رابردوو زۆر زیانی لە ئاستی خولەكەداوە، 2- بەشداری نەكردنی چەند یانەیەك بەهۆی بارودۆخی سیاسی، 3، ئەنجامدانی سەرجەم یارییەكان لە یەك رۆژ و لە یەككاتدا لە یەك شاردا كاریگەری خراپی هەیە لە هەموو ڕوێكەو بە تایبەت بۆ رێژەی جەماوەر و راگەیاندن، 4- پەخش نەكردن و نەگواستنەوی یارییەكان لە كەناڵە تەلەفیزیۆنیەكان، هۆكارن بۆ دەرنەكەوتنی ئاستی یاریزانان و یانەكان.

كێشەكان هەمووی پەیوەست نین بە فیدراسیۆنی تۆپی پێی كوردستان
شاخەوان عارف یاریزان راهێنەری كوردستان لە بارەی ئەم پرسە جەختی لەوە كردەوە كە زۆرجار بارودۆخی وڵات و تەرخان نەكردنی بودجە، لە لایەن حكوومەتەوە، هۆكارن بۆ دواخستن و درەنگ دەستپێكردنەوەی خولەكان و گۆڕانكاری لە سیستەمی بەڕێوەچوونی خولەكە.
شاخەوان عارف هەڵگری ماستەر لە بواری وەرزش دەشڵێت: هەندێك جاریش لایەنی ئاسایشی ناوچەكە وا دەكات خولەكە دوابكەوێت، بۆیە كەیسەكان لە دەرەوەی دەسەلاتی فیدراسیۆنن، بە بیانووی سەلامەتی یاریزانەكان ناچارن یارییەكان دوابخەن، یانیش بۆ لاوان و تازەپێگەشتاوان بەهۆی تاقیكردنەوەكانەوە، ئەگەر نا ساڵانێك، كە بارودۆخ ئاسیایی بوو خولەكان لە كات و ساتی دیاریی كروای خۆیاندا بەرێوە دەچوون، ئەمەش گرینگ بوو بۆ راهێنەر و یانەكان تا بە وردی پلانەكانی خۆیان دارێژن، لە كاتی ئامادەكاریەكانی تیپەكەیان، بەڵام زۆر وەساتانی خول بەرنامەی راهێنەر تێكدەدات، بە تایبەت ئەگەر راهێنەر زیرەك نەبێت لە دابەشكرنی پلانەكانی رۆژانە و هەفتانەی، بەمەش خزمەت بە بەرەو پێشچوونی لایەنی هونەری و جەستەی یاریزانان ناكات و خولەكە گەرموگوڕی خۆی لەدەست دەدات.

جاسم عوسمان هۆشداریی دەدات!
جاسم، تەمەنێكە لە نێو یاریگادایە، ئەزموونێكی زۆری لە بوارەكەدا هەیە هەم وەك یاریزان هەم وەك راهێنەر ئەو پێی وایە، پێویستە لە سەرتادا فیدراسۆن پلان و بەرنامەیەكی باش و تۆكمە دابڕێژێت، تاوەكو لە ناوەراست و كۆتاییدا هیچ گیرروگرفتێك نەیەتە پێشەوە و نەبێتە هۆی سستی و لاوازی بە رێوەچوونی خولەكان، چونكە بەوهۆیەوە یاریزان تووشی بێزاری ماندووبوون دەبێت، ئەم شێوازەی ئەم ساڵ پەیرەو كرا، زۆر باشبوو بە یەك كۆمەڵە و چوون و هاتن، بەڵام پێویستە ژمارەیی یانەكان زیاد بكرێن بۆ 14 یانەبۆ ئەوەی وەك خولێكی سەركەوتوو سەیر بكرێت، لایەنە خراپەكانی خولەكانی كوردستان ئەمانەن، یەكەم هەمیشە كات و ساتی بەرێچوونی خولەكان دیارنییە، بێ بەرنامە خولەكان بۆ كاتێكی نادیار دەوستێت، دووەمیان كەمی ژمارەی یانەكان هۆكارێكی ترە.

"داوا دەكات فیدراسیۆنی تۆپی پێی كوردستان شێوازی كاركردنی بگۆڕێت"
قەهار حوسێن كە پێشتر یاری بۆ هەڵبژاردەی كوردستانیش كردووە، ئاماژە بۆ ئەوە دەكات كە ئەم جۆرە خولانەی كوردستان پێی دەوترێت خولی ماراسۆنی، دەشڵێت: لە كوردستان بەپەلە تیپ كۆدەكرێتەوە و بەپەلە ئامادەكارییەكان ئەنجام دەدەن، هەندێكیان راستە زووتر دەست بە ئامادەكاری دەكەن، بەڵام ئەوانیش بەهۆی ناڕێكی لە سیستەمی بەڕێوەچوونی خولەكە تووشی بێزاری دەبن و ناتوانن رزگاریان بێت باجی خۆیان هەر دەدەن، بێ ئومێدی دەبن لەبەر ئەوەی ململانێ و ركابەری نییە.
قەهار حوسێن كە ساڵانێكی زۆر یاری بۆ یانەی ئاسۆ كردووە، گوتیشی: دەبێت فیدراسیۆن شێوازی كاركردنی خۆی بگۆڕێت و بیكاتە پیشەگەرانە، چونكە نابێت لە ڕووی سەرچاوەی دارایی بە تەواوی پشت بە حكوومەت ببەستی، چونكە هیچ گرەنتیەك لە حكومەتەوە نییە بۆ بەردەوامی دابینكردنی بوجە، جیا لەوەش هەفتانە ناڕوونی لە كات و رۆژ و بەڕێوەچوونی یارییەكان هەبوو، كە هۆكارێك بوو بۆ كەمی ئامادەبوونی هاندەران لە نێو یاریگادا، هاندەران فەرامۆش كرابوون، كە لایەنێكی گرینگی وەرزشن.
قەهار دەشڵێت: هەندێك یانەش هەیە لەبەر ئەوەی درەنگ دەستی بە ئامادەكاری كردووە تا ئێستا نەچۆتە ناو كەش و هەوای ركابەریەكان بە شێوەیەكی راستەقینە، لەوانە یانەكانی نەورۆز و شێروانە، بەهۆی دیاریی كردنی كاتی خولەكە دواتر وەستانی جارێكیتر یانەكانیش ئامادەكارییەكانیان رادەگرت، پاشان بەشێوەیەكی خێرا دەستیان بە مەشق دەكردەوە و پاڵەپەستۆی زۆریان دەخستە سەر یاریزانەكان، ئەمەش هۆكاری ئەنجامی خراپی لێكەوتەوە، خراپترین بڕیاریش بریتیە لە وەستانی خولەكە بەشێوەیكی كتوپر، كە كاریگەری خراپی زۆرە

 

بارزان ئەكرەم - هەولێر
.

© 2017 Hawler

Please publish modules in offcanvas position.