کانونی یەکەم 06, 2019

ئاسۆ و خانه‌قین، ڕزگاری و شێخان له‌ دوو یاریی یه‌كلاكه‌ره‌وه‌دا ڕووبه‌ڕوو ده‌بنه‌وه‌

سبه‌ی له‌ دوو یاری یه‌كلای كه‌ره‌وه‌دا ناسنامه‌ی ئه‌و دوو یانه‌یه‌ ئاشكرا ده‌بن كه‌ ده‌گه‌نه‌ یاریی كۆتایی خولی یانه‌ پله‌ دووه‌‌كان، دوای ئه‌وه‌ی كه‌ هه‌رچوار یانه‌ی (ڕزگاری، ئاسۆ، خانه‌قین، شێخان) گه‌یشتنه‌ ڕیزی یانه‌ پله‌ یه‌كه‌كان و چوارگۆشه‌ی زێڕین، سبه‌ی له هه‌ولێر یانه‌ی ئاسۆ میوانداری یانه‌ی خانه‌قین ده‌كات، له‌ گه‌رمیانیش یانه‌ی شێخان ده‌بێته‌ میوای یانه‌ی ڕزگاری، براوه‌ی هه‌ردوو یارییش ده‌گه‌نه‌ یاریی كۆتایی.

ئاسۆ × خانه‌قین
ئه‌م یارییه‌ له‌سه‌ر یاریگه‌ی دووه‌می شه‌هید فڕنسۆ هه‌ریری له‌ هه‌ولێر ئه‌نجام ده‌درێت، تیایدا یانه‌ی ئاسۆ دوای بردنه‌وه‌ی له‌ یانه‌كانی شه‌قڵاوه‌ و بروسك، گه‌یشته‌ ئه‌م قۆناخه‌ میوانداریی یانه‌ی خانه‌قین ده‌كات، كه‌ دوای چاوه‌ڕوانییه‌كی زۆر ئه‌و یانه‌یه‌ جارێكی تر گه‌یشته‌ ڕیزی یانه‌ پله‌ یه‌كه‌كان، ئه‌وه‌ی كه‌ ئه‌و 4 یانه‌یه‌ گه‌ره‌كیان بوو گه‌یشتن بوو به‌ڕیزی یانه‌ پله‌ یه‌كه‌كان، بۆیه‌ له‌ ئه‌گه‌ری دۆڕانی هه‌ر یه‌كێكیشیان ڕه‌نگه‌ ئه‌وه‌نده‌ی ئه‌وه‌ خه‌مبارییان ناكات، چونكه‌ ئه‌وان گه‌یشتوون به‌ ئامانجه‌ گه‌وره‌كه‌.
له‌گه‌ڵ ئه‌وه‌یشدا هه‌ردوو یانه‌ی چاویان له‌وه‌یه‌ كه‌ بگه‌نه‌ یاریی كۆتایی و ناسناوی ئه‌م وه‌رزه‌ی خوله‌كه‌ به‌ده‌ست بهێنن، ئاسۆ دوای دابڕانی چه‌ند ساڵێك له‌ یانه‌ گه‌وه‌ره‌كان و دابه‌زینی بۆ ڕیزی یانه‌ پله‌ سێیه‌كان ئه‌م وه‌رزه‌ به‌ هیواوه‌ گه‌ڕایه‌وه‌ و گه‌ره‌كیه‌تی به‌ بوون به‌ پاڵه‌وان بوونی ئه‌م وه‌رزه‌ی ده‌رگه‌ی سه‌ركه‌وتنه‌كانی بۆ وه‌رزی داهاتوو بكاته‌وه‌ و جارێكی تر بگه‌ڕێته‌وه‌ ڕیزی یانه‌ پله‌ نایابه‌كان، خانه‌قینش بۆ سه‌لماندنی كوردستان بوونی خۆیی به‌رده‌وام بوونی ده‌یه‌وێت بۆ یه‌كه‌م جار له‌ مێژووی خۆیدا پله‌ی یه‌كه‌م و ناسناوی ئه‌م وه‌رزه‌ بكاته‌ دیاری هانده‌رانی.
 ڕزگاری × شێخان
ئه‌م یارییه‌یش له‌ شارۆچكه‌ی ڕزگاری له‌ ده‌ڤه‌ری گه‌رمیان به‌ڕێوه‌ ده‌چێت، ڕزگاری ئه‌مساڵ به‌بێ دۆڕان گه‌یشته‌ ڕیزی یانه‌ پله‌ یه‌كه‌كان و یه‌كێكه‌ له‌و یانانه‌ی كه‌ به‌ شایسته‌ی گه‌یشته‌ ڕیزی یانه‌ پله‌ یه‌كه‌كان، به‌مه‌یش ژماره‌ی یانه‌كانی پله‌ یه‌ك له‌ ده‌ڤه‌ری گه‌رمیان بوو به‌ 3 یانه‌ هاوشان له‌گه‌ڵ خانه‌قین و كفری، به‌سوود وه‌رگرتن له‌ یاریگه‌ و هانده‌رانیش گه‌ره‌كیه‌تی له‌م یارییه‌دا سه‌ركه‌وتن تۆمار بكات و لایه‌نێكی یاریی كۆتایی بێت.
یانه‌ی شێخانیش وه‌ك تاكه‌ نوێنه‌ری پارێزگای دهۆك له‌م وه‌رزه‌دا ئه‌سپی ڕه‌شی خوله‌كه‌ بوو، هه‌مووان چاوه‌ڕێیان ده‌كرد زوو ماڵئاوایی بكات، به‌ڵام به‌ پێكهاته‌یه‌كی لاو ئه‌و یانه‌یه‌ به ئاستێكی به‌رزده‌ركه‌وت و له‌ قۆنا‌‌خی یه‌كه‌مدا به‌ پله‌ی یه‌كه‌م سه‌ركه‌وت، له‌ قۆناخی هه‌شته‌میشدا هه‌ردوو یانه‌ی شه‌قڵاوه‌ و بروسكی دور خسته‌وه‌، كه‌ به‌ربژێری سه‌ره‌كی بوون بۆ ئه‌وه‌ی سه‌ربكه‌ون بۆ ڕیزی یانه‌ پله‌ یه‌كه‌كان، ئه‌مه‌یش فاكته‌رێكی به‌هێز ده‌بێت تاوه‌كوو ئه‌و یانه‌یه‌ له‌ یارییه‌كه‌ سه‌ركه‌وتن تۆمار بكات و بگاته‌‌ یاریی كۆتایی.
بۆ زانین خولی یانه‌ پله‌ دووه‌كانی كوردستان ئه‌م وه‌رزه‌ دوای ئه‌وه‌ی یانه‌ پله‌ سێیه‌كان نه‌مان به‌ به‌شداری 32 یانه‌ ئه‌نجام درا، كه‌ به‌ شێوه‌ی ناوچه‌ی جوگرافی و به‌ سیسته‌می دوو دۆڕان به‌سه‌ر 4 كۆمه‌ڵه‌دا دابه‌شكرا بوون و 8 یانه‌ گه‌یشتنه‌ قۆناخی دووه‌م و چوار یانه‌یان سه‌ركه‌وتن بۆ چوارگۆشه‌ی زێڕین و ڕیزی یانه‌ پله‌ یه‌كه‌كان، یاریزانی یانه‌ی بروسك (مه‌حه‌مه‌د عه‌نته‌ر) به‌ 9 گۆڵ بوو به‌ گۆڵكه‌ری خوله‌كه‌.

 

هێمن ئەسكەندەر - هەولێر

© 2017 Hawler