نیسان 15, 2021

ئەمڕۆ لەشاری دیوانیە قۆناغی یەکەمی پاڵەوانیەتی پایسکیل سواری یانەکانی عێڕاق بەڕێوەدەچێت

هێمن ئەسکەندەر - هەولێر

 

بەبەشداری زیاتر لە ٢٠ یانە ئەمڕۆ لەشاری دیوانیە قۆناغی یەکەمی پاڵەوانیەتی پایسکیل سواری یانەکانی عێڕاق بەڕێوەدەچێت، پاڵەوانیەتیەکە سێ قۆناغە، لە پاڵەوانیەتیەکەدا ٧ یانەی کوردستان بەشداری دەکەن و چاوەڕێ دەکرێت ئەنجامی باش بەدەست بهێنن، بڕیار وایە دوای جەژنی ڕەمەزان یارییەکانی قۆناغی دووەمی پاڵەوانیەتیەکە لەشاری هەولێر بەڕێوەبچن، دەربارەی پاڵەوانیەتیەکەیش لە لێدوانێکدا بۆ ڕۆژنامەی هەولێر، موسا موحسین بەم جۆرە قسەی کرد.

حەوت یانەی کوردستان بەشدارن
لە دەسپێکدا موسا موحسین جێگری سەرۆکی فیدراسیۆنی پایسکیل سواری عێڕاق بەمجۆرە قسەی بۆ ڕۆژنامەی هەولێر کرد و گووتی بەبەشداری ٢٠ یانەو بۆ ماوەی ٣ ڕۆژ لەشاری دیوانیە قۆناغی یەکەمی پاڵەوانیەتی پایسکیل سواری یانەکانی عێڕاق بۆ ئاستی کوڕان بەڕێوەدەچێت، ئەو پاڵەوانیەتیە بۆ ئاستەکانی تازەپێگەیشتوان و لاوان و پێشکەوتوان دەبێت.
گوتیشی لە پاڵەوانیەتیەکەدا چەند یانەیەکی کوردستان بەشدارن کە بریتین لە یانەکانی هەولێر و کۆیە و دوکان و ڕانیە و جیهان و دهۆک و پێشکەوتن.

پاڵەوانیەتی کچانیش ئەنجام دەدرێت
جێگری سەرۆکی فیدراسیۆنی پایسکیل سواری عێڕاق هێمای بۆ ئەوەیش کرد ساڵانە پاڵەوانیەتی پایسکیل سواری یانەکانی عێڕاق بە سێ قۆناغ بەڕێوەدەچێت، ئاماژەی بەوەیشدا کە دوای قۆناغی یەکەم بڕیار وایە قۆناغی دووەمی پاڵەوانیەتیەکە لەشاری هەولێر ئەنجام بدرێت، باسی ئەوەیشی کرد دەسکەوتی ئەو یاریزانانەی لە هەرسێ قۆناغی پاڵەوانیەتیەکە ئەنجامی باش بەدەست دەهێنن ئەوەیە کە لە پلەی یەکەم تاوەکو شەشەم مووچەیان لە هەڵبژاردەی عێڕاق پێبدرێت و لەڕیزی هەڵبژاردەی عێڕاقیش بەشداری پاڵەوانیەتیەکانی دەرەوە دەکەن، بڕیاریش وایە دوای جەژنی ڕەمەزان قۆناغی یەکەمی ئاستی کچانیش لەشاری هەولێر ئەنجام بدرێت.

© 2017 Hawler