نیسان 15, 2021

یانه ی هه ولێر له دۆخێكی دژواردا میوانداریی ئه مانه ی به غدا ده كات

ئه‌مڕۆ چوارشه‌مه‌ له‌ گه‌ڕی بیسته‌می یارییه‌كانی خولی نایابی عێراقی، له‌ ده‌ستپێكی قۆناخی دووه‌می خوله‌كه‌ هه‌ولێر له‌ یاریگه‌ی دهۆك میوانداری ئه‌مانه‌ی به‌غدا ده‌كات، چونكه‌ یاریگه‌ی هه‌ولێر نۆژه‌نده‌كرێته‌وه‌، یارییه‌كه‌ش كاتژمێر(1)ـی دوای نیوه‌ڕۆ به‌ڕێوه‌ده‌چێت، ئه‌م یارییه‌ بۆ هه‌ولێر گرینگی خۆی هه‌یه‌، چونكه‌ سێ یاریی گه‌ڕی رابردووی دۆڕاندووه‌.

 

هه‌ولێر به‌ راهینه‌رایه‌تی لوئه‌ی سه‌لاح، خۆی بۆ ئه‌م یارییه‌ ئاماده‌كردووه‌، كێشه‌ی هه‌ولێر له‌م یارییه‌ دووركه‌وتنه‌وه‌ی نوزادی به‌رگریكه‌رییه‌تی به‌هۆی ئه‌وه‌ی تووشی كۆرۆنا بووه‌، هه‌روه‌ها شوان مامۆ پێكانی هه‌یه‌، ره‌نگه‌ نه‌توانێت به‌شداریبكات، هه‌موو هیوای تیپه‌كه‌ی لوئه‌ی سه‌لاح بۆ ئه‌م یارییه‌ بردنه‌وه‌یه‌، چونكه‌ تیپه‌كه‌ له‌ دۆخێكی باشدا نییه‌، له‌ ئه‌گه‌ری دۆڕاندنی ده‌كه‌وێته‌ ناوچه‌ی سوور و دابه‌زین.  له‌ یاریی چوونی له‌ دژی ئه‌مانه‌ی به‌غدا به‌دوو گۆڵ یارییه‌كه‌ی بردبووه‌وه‌، هه‌ولێر له‌ كۆی 19 یاریی 4 بردنه‌وه‌ و 7 یه‌كسنان و 8 دۆڕانی هه‌یه‌، به‌ كۆكردنه‌وه‌ی 19 خاڵ له‌ خانه‌ی پازده‌یه‌م دێت، گۆڵكه‌ر‌ی هه‌ولێر له‌ قۆناخی یه‌كه‌م بارزان شێرزادبوو به‌ تۆمار كردنی 5 گۆڵ.

ئه‌مانه‌ی به‌غدا، له‌ قۆناخی یه‌كه‌م ئاستێكی باشیان پێشكه‌ش كرد، به‌تایبه‌تی سه‌رهه‌نگ موحسینی گۆڵپارێزی پێشووی هه‌ولێر، كه‌ توانی له‌ 19 یاریی 9 جار گۆڵه‌كه‌ی به‌ پاكی ڕابگرێت، كه‌ تاكه‌ گۆڵپارێزه‌ له‌ قۆناخی یه‌كه‌م ئه‌م كاره‌ی كردبێ، یارمه‌تیده‌رێكی باشی ئه‌مانه‌ی به‌غدا بووه‌، ئه‌مانه‌ی به‌غدا له‌ 19 یاریی قۆناخی یه‌كه‌م، 6 بردنه‌وه‌ی هه‌بووه‌، 6 یه‌كسانی تۆمار كردووه‌، 7 جاریش تامی شكستی كردووه‌، به‌ 24 خاڵ، خانه‌ی نۆیه‌می گرتووه‌.

له‌ كۆی 10 یاریی ڕابردووی نێوان هه‌ولێر و ئه‌مانه‌ی به‌غدا، هه‌ولیر 4 یاریی بردووه‌ته‌وه‌، ئه‌مانه‌ی به‌غدا 2 یاریی بردووه‌ته‌وه‌، له‌ 4 یارییش یه‌كسانبوونه‌، گه‌وره‌ترین ئه‌نجامی نێوانیان (3-3) بووه‌، كه‌ شه‌ش گۆڵی تێدا تۆماركراوه‌.

قوه‌ی جه‌ویه‌ به‌ 41 خاڵ پێشه‌نگی خولی نایابی عێراقی گرتووه‌، ئه‌یمه‌ن حوسێنی هێرشبه‌ریشی به‌ 14 گۆڵ سه‌روو ریزبه‌ندی گۆڵكه‌رانی داگیركردووه‌.

 

بارزان ئه‌كره‌م - هەولێر

 

© 2017 Hawler