شوبات 26, 2021

یاریگەی یانەی هەڵۆ یەكێك لە خراپترین یاریگەكانی كوردستانە

سەرۆكی یانەی هەڵۆ بە رۆژنامەی هەولێری راگەیاند كە یانەكەبان قەرزدارە و بە دۆخێكی دارایی یەكجار خراپ تێپەڕ دەبێت، دەشڵێت: خاوەنی خراپترین یاریگەین لە كوردستان و یاریزانەكانمان رۆژانە لە نێو قورلیتە راهێنان دەكەن، دەرگا نەماوە لێمان نە دابێت، بەڵام كەس دەستی هاوكاری بۆ ئێمە درێژ ناكات، ئەگەر بارودۆخەكە هەر بەو شێوەیە بێت پاشەكشە لە خولەكە دەكەین و دەرگای یانەكە دادەخەین. راهێنەری یانەكەش دەڵێ، هۆكاری سەرەكی ئەنجامە خراپەكانی ئێمە لەم وەرزەدا بۆ خراپی یاریگە و دۆخی دارایی دەگەڕێتەوە.

 

یانەی هەڵۆ لە خولی نایابی كوردستان بە ئەنجامدانی پێنج یاری سێ بەرامبەربوون و دوو دۆڕاندن لە خانەی پێنجەمی ریزبەندی دایە و تاكە یانەیە ئەمساڵ شان بەشانی یانەی  هەولێر هیچ یارییەكی نەبردۆتەوە، رۆژی هەینیش لە سۆران دەبێتە میوانی ئەو یانەیە.

 

"یانەكە قەرزدارە"

ئەحمەد خەلیل، سەرۆكی یانەی هەڵۆ لە گفتووگۆیەكدا بۆ رۆژنامەی هەولێر هێمای بۆ ئەوە كرد كە دۆخی دارایی یانەكەمین لەو پەڕی خراپی دایە و كەس هاوكارییان ناكات, گوتیشی: ئەوە 19ی مانگە و تا ئێستا مووچەی یاریزانەكانمان نەداوە، لەگەڵ ئەوەی 5 ملیۆن دینار لە ماڵی خۆم بردووە بۆ یانەكە، 18 ملیۆن دیناریش قەرزدارین، ئەگەر بارودۆخی یانەكە هەر بەوشێوەیە بەردەوام بێت، رەنگە لە قۆناغی دووەم پاشەكشە لە خولەكە بكەین، چونكە هیچ شوێنێك نەماوە لە دەرگای نەدەین، بەڵام كەس هاوكاریمان ناكات، بۆیە ئەگەر بارودۆخەكە هەر بەو شێوەیە بێت دەرگای یانەكە دابخەین باشترە، ئەمە لە كاتێكدایە لە هەموو شوێنەكان هاوكاری یانەكان دەكرێت بەس لێرە كەس هاوكاری ئێمە ناكات، بۆیە خولی نایاب پێویستی بە یاریگا و یاریزان و ئیمكانیاتی باش هەیە، ئێمەش وەكو یانەی هەڵۆ ئەو شتانەمان نیە، بۆیە توانای دارایی ئێمە هی ئەوە نیە لە خولی نایاب یاری بكەین.

 

یاریگەی یانەی هەڵۆ یەكێكە لە خراپترین یاریگەكانی كوردستان

یانەی هەڵۆ، تاكە یانەی دەڤەری بارزانە لە خولەكانی تۆپی پێی كوردستان و لە خولی نایاب یاری دەكات، یاریگەی یانەكە لە شارەدێی بڵێ بۆتە جێگەی گڵەیی یانەكانی دیكەی خولەكە و تەنانەت دەستەی كارگێڕی، ڕاهێنەر، یاریزانان و جەماوەرەكەی.

سەرۆكی یانەی هەڵۆ، ئاشكرای كرد:" بە هەموو قەزای مێرگەسۆر و 5 شارەدێ تەنیا یەك یاریگە هەیە، ئەویش نەك هی ئەوەیە یاری تێدا بكەی، بەڵكو بەكەڵكی ئەوە نایەت راهێنانەكانیش تێدا ئەنجام بدەی، هەموو بۆتە قوڕ و لیتە، بۆیە یاریگەكەمان شیاو نییە بۆ یاریكردن، دەسەڵاتیشمان نییە نۆژەنی بكەینەوە، لەگەڵ ئەوەی چەندین ساڵە كێشە و گرفتەكانی خۆمان دەگەیەنینە بەرپرسان، دەرگا نەماوە لێمان نە دابێت، بەڵام كەس دەستی هاوكاری بۆ ئێمە درێژ ناكات، داوا لە لایەنە پەیوەندیدارەكان دەكەین بەدەم داواكاری ئێمەوە بێن و یاریگەكەمان بۆ نۆژەن بكەنەوە".

لەلایەكی دیكەوە دینۆ میكائیل، راهێنەری یانەكە بۆ "هەولێر" گوتی:" هۆكاری خراپی ئەنجامەكانی یانەی هەڵۆ لەم وەرزەدا بۆ خراپی یاریگە دەگەڕێتەوە، خراپی یاریگە زۆر كاریگەری لەسەر یاریزانەكان هەیە، راهێنەر ناتوانێت پلانەكانی خۆی جێبەجێ بكات، ئەگەر یاریگە باش بێت یاریزان تواناكانی خۆی دەردەخات، رێنماییەكانی راهێنەر زۆر بە باشی جێبەجێ دەكات، چونكە ئەگەر تەماشای ئەنجامی یارییەكانی خۆمان بكەین، ئەو دوو یارییەی كە لە دەرەوەی یاریگەی خۆمان كردوومانە بە بەرامبەر دەرچووینە، ئەوەش ئەنجامێكی باش بووە بۆ ئێمە، كەچی لەناو یاریگەی خۆمان لەو سێ یارییەی كردوومانە دوو یاریمان دۆڕاندووە، رۆژانە لە یاریگەی بچووككراو مەشقەكانی خۆمان دەكەین، دواتر لە یاریگەی گەورە یاری دەكەین، ئەوەش كاریگەری لەسەر ئەنجامەكانی ئێمە هەبووە، بڕیاربوو یاریەكانی خۆمان بگوازینەوە بۆ یاریگەیەكی دیكە، بەڵام لەبەر نەبوونی پارە نەمان توانیوە ئەوەش بكەین".

 

هۆكاری ئەنجامە خراپەكانی یانەی هەڵۆ

دینۆ میكائیل، ئەوەشی گوت:" ئەگەر پارە هەبێت دەتوانین یاریزانی باش بهێنین، چونكە لە هێلی هێرشبەر پێویستمان بە یاریزانی نوێ هەیە ئەگەر بهێنین ئەنجامەكانمان باش تر دەبن، بەڵام لەبەر بێ پارەیی ناتوانین هیچ یاریزانێكی نوێ بهێنین، زۆر لەو یارییانەی كە كردوومانە بە یەك هێرشبەر یاریمان كردووە، ئەوەش هەمووی لەبەر بێ پارەییە، ئەوەش هۆكاری سەرەكی ئەنجامە خراپەكانی ئێمەیە، بەڵام بەهەر شێوەیەك بێت دەمانەوێت لە یاری سۆران بە سێ خاڵی یارییەكە بگەرێینەوە و دڵی جەماوەری خۆمان خۆش بكەین".

 

ئامانجی سەرەكی ئەم وەرزەی یانەی هەڵۆ

راهێنەری یانەی هەڵۆ، دەشڵێ:" ئامانجی ئێمە لەم وەرزەدا مانەوەیە لە خولی نایاب، هەر چەندە پێشتریش لە خولی نایاب یاریمان كردووە، بەڵام دەمانەوێت ئەمساڵ ئەزموونێك بۆ خۆمان پەیدا بكەین، بۆ ئەوەی بۆ وەرزی داهاتوو تیمیكی توكمە دروست بكەین و كێبڕكێ لەسەر ریزەكانی پێشەوە بكەین، بەڵام بە مەرجێك ئەگەر هاوكاری ئێمە بكرێت، ئەگەرنا نەك ساڵی داهاتوو بەشداری ناكەین، بەڵكو هەر لەم وەرزەدا و لە قۆناغی دووەم ئەنجامەكانمان خراپتر دەبن".

 

پاشخانی یانەی هەڵۆ

یانەی هەڵۆ لە ساڵی 2003 لە دەڤەری بارزان لە قەزای مێرگەسۆر دامەزراوە، سێیەمین جارە بەشداریی لە خولی نایابی كوردستان دەكات، ساڵی 2005 بۆتە پاڵـەوانی خولی یانە پلەیەكەكان و دواتر چووەتە نێو ڕكابەری سەركەوتن بۆ خولی نایابی عێراق تەنها یەك یارییان مابوو تا بگەنە ئامانجەكەیان، بەڵام لەبەر خراپی دۆخی ئەمنی ناوچەكانی خواروو و ناوەراستی عێراق پەشیمان بوویەوە و لە ململانێكە كشایەوە، لە خولی نایابی كوردستان لە كۆمەڵەی یانەكانی (سیروانی نوێ، برایەتی، شێروانە، چەمچەماڵ، سۆران، هەولێر)ـدایە، كە سێ یانە بۆ قۆناغی دووەمی خولەكە سەردەكەون".

 

ڕآئیب جادر - هەولێر

 

© 2017 Hawler