ئەم پەڕەیە چاپ بکە

پیانیچ له‌ بارسێلۆنا ده‌بێته‌ جێنشینی ئینیێستا

 

بارسێلۆنا به‌ فه‌رمی گرێبه‌سته‌كه‌ی له‌گه‌ڵ مێرالیم پیانیچ واژۆ كرد و درێسی ژماره‌ هه‌شت ده‌پۆشێت.

ئێواره‌ی دوێنێ پیانیچ ناوه‌ڕاستكاره‌ نوێیه‌كه‌ی بارسێلۆنا گرێبه‌ستی گواستنه‌وه‌ی له‌ یانه‌ی یوڤێنتۆسه‌وه‌ بۆ یانه‌ كه‌ته‌لۆنیه‌كه‌ واژۆ كرد و به‌ مێدیاكان ناسێندرا، كه‌ ئه‌م یاریزانه‌ بۆسنه‌ییه‌ له‌ شه‌ممه‌ی رابردووه‌وه‌ له‌گه‌ڵ بلاوگرانا ده‌ستی به‌ مه‌شق و راهێنان و ئاماده‌كاریی بۆ وه‌رزی نوێ كردووه‌.

پیانیچ له‌ به‌رده‌م مێدیاكان درێسی ژماره‌ هه‌شتی به‌رز كرده‌وه‌ و دوای واژۆكردنه‌وه‌ی گرێبه‌سته‌كه‌ش به‌شداری له‌ كۆنگره‌یه‌كی رۆژنامه‌وانی كرد و گوتی: زۆر دڵخۆشم ئێستا له‌ باشترین یانه‌ی جیهانم.

پیانیچ یه‌كه‌م گرێبه‌ستی ئه‌م هاوینه‌ی بارسایه‌ و بۆ ماوه‌ی چوار وه‌رز په‌یوه‌ست ده‌بێت به‌م یانه‌یه‌ و نرخی گرێبه‌سته‌كه‌شی ده‌گاته‌ 60 ملیۆن یۆرۆ، جگه‌ له‌ وه‌رگرتنی پێنج ملیۆن یۆرۆ له‌كاتی بردنه‌وه‌ی نازناوه‌كان، مه‌رجی شكاندنی گرێبه‌سته‌كه‌شی ده‌گاته‌ 400 ملیۆن یۆرۆ.

 

گۆدین گرێبه‌سته‌كه‌ی هه‌ڵده‌وه‌شێننه‌وه‌

 

رۆژنامه‌ی لاگازێتا دێللۆ سپۆرتی ئیتاڵیا ئاشكرای كردووه‌ كه‌ دیێگۆ گۆدینی ئۆرۆگوای نزیكه‌ له‌ جێشهێشتنی ئینته‌رمیلان و له‌گه‌ڵ به‌رپرسانی ئه‌و یانه‌یه‌ گه‌یشتووه‌ته‌ رێككه‌وتن و گرێبه‌سته‌كه‌ی نێوانیان هه‌ڵده‌وه‌شێننه‌وه‌، هۆكاری رۆیشتنی یاریزانه‌كه‌ش كه‌می یاریكردنه‌ له‌و یانه‌یه‌، به‌مه‌ش به‌پێی رێككه‌وتنه‌كه‌ی نێوان هه‌ردوولا ئینته‌رمیلان قه‌ره‌بووی دارایی یاریزانه‌كه‌ ده‌كاته‌وه‌ و ده‌ستبه‌رداری ده‌بێت.

 

حاڵه‌تی نوێی تووشبوونی كۆرۆنا له‌ پرێمه‌رلیگ راگه‌یاندرا

 

ئه‌نجومه‌نه‌كه‌ ئاشكرایكردووه‌ له‌ حه‌وت بۆ سێزده‌ی ئه‌م مانگه‌ دوو هه‌زار و سه‌د و سی و یه‌ك پشكنینی نوێ بۆ تیمه‌كانی یانه‌كان كراوه‌ و چوار خاڵه‌تی نوێی تووشبوون به‌ ڤایرۆسی كۆرۆنا تۆمار كراوه‌.

له‌ هه‌فته‌ی رابردووش له‌ ئه‌نجامی پشكنینه‌كان كه‌ پێشتر بۆ هه‌زار و شه‌ش سه‌د و پێنج كه‌س كرابوو ده‌ركه‌وت كه‌ سێیان ئه‌نجامه‌كه‌یان پۆزه‌تیڤه‌ و تووشی كۆرۆنا بوونه‌ به‌بێ ئه‌وه‌ی ناسنامه‌یان ئاشكرا بكرێت به‌ڵام پێویسته‌ ئه‌وانه‌ی تووشبوونه‌ كه‌ره‌نتین بكرێن و له‌ یانه‌كانیان داده‌بڕێن.

وه‌رزی نوێی پرێمه‌رلیگ له‌ دوازده‌ی ئه‌م مانگه‌ به‌بێ ئاماده‌بوونی هانده‌ران و به‌پێی رێنمایه‌ ته‌ندروستییه‌كان ده‌ستیپێكردووه‌.

 

ژووری جلگۆڕینی یاریزانان له‌ یانه‌كان قه‌ده‌غه‌ ده‌كرێت

 

ئه‌نجومه‌نی لالیگا داواكه‌ی راهێنه‌رانی یانه‌كانی لالیگای ره‌تكرده‌وه‌ كه‌ داوایان كردبوو ژووری جلگۆڕینی به‌كاربهێنن بۆ دانانی پێكهاته‌ و رێنماییه‌كان، به‌ڵام رۆژنامه‌ی ماركا ئاماژه‌ی به‌وه‌ كردووه‌ ئه‌نجومه‌نی لالیگا به‌هه‌موو شێوه‌یه‌ك ئه‌م داوایه‌ له‌ ترسی ڤایرۆسی كۆرۆنا ره‌تده‌كاته‌وه‌.

ئاماژه‌ به‌وه‌ش كراوه‌ ئه‌نجومه‌نی لالیگا ته‌نانه‌ت له‌گه‌ڵ ئه‌وه‌دا نییه‌ كه‌ یانه‌كان ته‌نانه‌ت ژووری هۆتێله‌كانیش به‌كار بهێنن بۆ وانه‌ی هونه‌ری و دانانی پێكهاته‌ چونكه‌ مه‌ترسی زیاتری له‌سه‌ره‌ و یاریزانان به‌ ئاسانی تووشی ڤایرۆسی كۆرۆنا ده‌بن.

 

بارسێلۆنا ده‌نگۆكانی گواستنه‌وه‌ی دێپای ره‌تده‌كاته‌وه‌

 

رۆژنامه‌ی سپۆرتی كه‌ته‌لۆنیا سه‌رجه‌م ئه‌و ده‌نگۆیانه‌ ره‌تده‌كاته‌وه‌ كه‌ باس له‌ رێككه‌وتنی نێوان بارسێلۆنا و لیۆن ده‌كه‌ن له‌سه‌ر گواستنه‌وه‌ی دێپای هۆڵه‌ندی بۆ یانه‌ كه‌ته‌لۆنیه‌كه‌.

دوێنێ شه‌و چه‌ند سه‌رچاوه‌یه‌ك بڵاویانكرده‌وه‌ كه‌ لایه‌نه‌كان گه‌یشتوونه‌ته‌ رێككه‌وتن و دێپای به‌ 25 ملیۆن یۆرۆ ده‌بێته‌‌ یاریزانی بارسێلۆنا.

ئاماژه‌ به‌وه‌ش كراوه‌ ره‌تكرانه‌وه‌ی ده‌نگۆی گواستنه‌وه‌ی ئه‌م یاریزانه‌ بیست و شه‌ش ساڵیه‌ مانای چوونه‌ ده‌ره‌وه‌ نییه‌ له‌ گرنگیدان به‌م دیپای و چاوه‌ڕێ ده‌كرێت له‌م هه‌فته‌یه‌ بارسا به‌ فه‌رمی گرێبه‌ستێك بۆ گواستنه‌وه‌ی بخاته‌ به‌رده‌م یانه‌ی لیۆنی فه‌ره‌نسی.

 

ئارتۆرۆ ڤیدال ماڵئاوایی له‌ یاریزانانی بارسێلۆنا كرد

 

ئارتۆرۆ ڤیدال دوێنێ بەشداریی راهێنانەکانی بارسێلۆنای نەکرد و ماڵئاوایی لە یاریزانانی بارسێلۆنا کردووە و کەلوپەلەکانی کۆکردووەتەوە و بەرەو ئیتاڵیا گەشتی کردووە و به‌ فه‌رمی بووه‌ یاریزانی نوێی ئینتەر میلان.

ناوەڕاستکارە چیلییەکە پێشتر یاریی بۆ یانەکانی بایر لیڤەرکوزن و بایرن میونشنی ئەڵمانی و یۆڤێنتۆسی ئیتاڵی کردووە و لەلایەن رۆناڵد کومانەوە پێشتر ئاگادار کرایەوە کە یانەیەکی دیکە بۆ خۆی بدۆزێتەوە، لەکاتێکدا هاوینی رابردوو پەیوەندی بە بارسێلۆنا کردبوو.

ئارتورۆ ڤیدال له‌ كاروانی وه‌رزشی خۆی له‌گه‌ڵ یانه‌ی بارسێلۆنا 96 یاری كردووه‌، 11 گۆڵ و 10 ئاسیستی هه‌بووه‌.