ئاب 04, 2020

بێنزێما سه‌لماندی كه‌ پێشتر ببووه‌ قوربانیی كریستیانۆ

ئەسعەد ئیسماعیل- هەولێر

 

ماركۆ تاردێلی یاریزانی پێشووی یانه‌ی یوڤێنتۆس هۆشداریی ده‌داته‌ به‌رپرسانی یانه‌ی یوڤێنتۆس كه‌ هاتنی كریستیانۆ رۆناڵدۆ بۆ یوڤی هه‌م زیاتی هه‌یه‌ و هه‌م قازانج.

له‌مباره‌یه‌وه‌ ده‌ڵێت: ترسم هه‌یه‌ وه‌ك چۆن له‌ ریال مه‌درید كه‌ریم بێنزێما ببووه‌ قوربانی كریستیانۆ رۆناڵدۆ، لێره‌ش له‌ یوڤی دیبالا ببێته‌ قوربانی.
كه‌ریم بێنزێما له‌ دوایین 61 یاری كه‌ پێشتر هاوشانی كریستیانۆ رۆناڵدۆ ئه‌نجامی دا بوو، ته‌نیا 16 گۆڵی كرد بوو، به‌ڵام له‌گه‌ڵ رۆیشتنی كریستیانۆ ئاستی بێنزێما هه‌ڵكشا و به‌جۆرێك له‌ یه‌كه‌مین وه‌رز له‌ دوای نه‌مانی كریستیانۆ، بێنزێما 21 گۆڵی له‌ لالیگا كرد، ئه‌م وه‌رزه‌ش 13 گۆڵی كردووه‌ و ركابه‌ری سه‌ره‌كی لیۆنێل مێسییه‌.
كه‌ریم بێنزێما هێرشبه‌ری فره‌نسی له‌ دوایین یاری خۆی له‌گه‌ڵ ریال مه‌درید ریكۆردێكی كریستیانۆ رۆناڵدۆی شكاند و بووه‌ یه‌كه‌مین یاریزان له‌ مێژووی ریال مه‌درید ئه‌م ژماره‌ پێوانه‌ییه‌ تۆمار بكات.
رۆژنامه‌ی ماركا، له‌ راپۆرتێكی شیكاری دا ئاماژه‌ بۆ ئه‌وه‌ ده‌كات ئاستبه‌رزی بێنزێما له‌م دوو وه‌رزه‌ سه‌لماندی كه‌ پێشتر ببووه‌ قوربانی ئه‌ستێره‌ پورتوگالییه‌كه‌.
كه‌ریم بێنزێما له‌ دوایین یاری به‌رامبه‌ر ئۆساسۆنا له‌ گێمی دووه‌می ئاسیستێكی بۆ لوكاس ڤاسكێز كرد، ئه‌مه‌ش پێنجه‌مین ئاسیستی ئه‌م یاریزانه‌ بوو له‌م وه‌رزه‌ی لالیگا.
كه‌ریم بێنزێما ژماره‌ی ئاسیسته‌كانی له‌گه‌ڵ ریال مه‌درید گه‌یانده‌ 133 ئاسیست، پێش كریستیانۆ رۆناڵدۆی پورتوگالی كه‌وته‌وه‌ كه‌ 132 ئاسیستی بۆ شایانه‌كانی مه‌درید كرد بوو، به‌مه‌ش بێنزێما بووه‌ خاوه‌نی زۆرترین ئاسیست له‌ مێژووی یانه‌كه‌.
كه‌ریم بێنزێما له‌ 10 ساڵی رابردوو دووه‌م یاریزانه‌ له‌ دوای لیۆنێل مێسی كه‌ زۆرترین ئاسیستی كردووه‌، بێنزێما یه‌كه‌مین یاریزانیشه‌ له‌ مێژووی ریال مه‌درید
بێنزێما له‌ دوای سێرخیۆ رامۆس بووه‌ دووه‌مین یاریزان له‌ مێژووی یانه‌كه‌ كه‌ زۆرترین یاری به‌ درێسی یانه‌ی شایانه‌كان ئه‌نجام داوه‌ و پێش كریستیانۆ كه‌وتۆته‌وه‌ كه‌ ته‌نیا 438 یاری به‌ درێسی ریال مه‌درید ئه‌نجامداوه‌.
له‌ لایه‌كی دیكه‌یشه‌وه‌، رۆژنامه‌ی تووتوسپۆرتی نزیك له‌ یانه‌ی یوڤێنتۆس، ئاماژه‌ی بۆ ئه‌وه‌ كردووه‌ كه‌ كریستیانۆ رۆناڵدۆ هۆكاری ئاستخراپی ئه‌م وه‌رزه‌ی یوڤێنتۆسه‌، به‌وپێیه‌ی ئه‌م یانه‌یه‌ ئه‌م وه‌رزه‌ له‌ جامی ئیتاڵیا دوورخرایه‌وه‌ و له‌ سێریا ئه‌ی پێشه‌نگی بۆ به‌رژه‌وه‌ندی ئینته‌ر میلان له‌ده‌ستداوه‌.
رۆژنامه‌كه‌ نووسیویه‌تی: ماوریزیۆ ساری راهێنه‌ری یوڤێنتۆس به‌هۆی كریستیانۆ پلانی یاریكردنی به‌ كۆمه‌ڵی پشتگوێخستووه‌ و هه‌موو پلانه‌كانی له‌ به‌رژه‌وه‌ندی كریستیانۆ رۆناڵدۆ داڕشتووه‌، به‌مه‌ش چه‌ندان یاریزانی هاوشێوه‌ی دیبالا، بێرنادیسكی و كۆستای پشتگوێخستووه‌، هاوشێوه‌ی بێنزێما له‌سه‌رده‌می ریال مه‌درید بوونه‌ قوربانی كریستیانۆ.
له‌ لایه‌كی دیكه‌یشه‌وه‌، سه‌رچاوه‌كانی ئیتاڵیا، ئاشكرایان كردووه‌ كه‌ یوڤێنتۆس بیر له‌وه‌ ده‌كاته‌وه‌ ماوریزیۆ ساری له‌ راهێنه‌رایه‌تی یانه‌كه‌ی دوور بخاته‌وه‌، پێیانوایه‌ ته‌نیا گرینگی به‌ كریستیانۆ ده‌دات و دۆخی یانه‌كه‌ی له‌بیر كردووه‌ كه‌ ئێستا لوتكه‌ی ریزبه‌ندی سێریا ئه‌ی له‌ده‌ستداوه‌.
رۆژنامه‌ی لاگازێتای ئیتاڵی بڵاویكردۆته‌وه‌ له‌نێو یوڤێنتۆس ده‌نگۆ هه‌یه‌ و داوای گه‌ڕانه‌وه‌ی ماسیمیلیانۆ ئالێگری راهێنه‌ری پێشوو بۆ پۆسته‌كه‌ی ده‌كه‌ن، ئاماژه‌ به‌وه‌ش كراوه‌ ئاندریا ئانێلی سه‌رۆكی یانه‌كه‌ دڵخۆش نییه‌ به‌ ماوریزیۆ ساری كه‌ ئه‌م یانه‌یه‌ رۆژی شه‌ممه‌ تووشی سێیه‌م شكستی ئه‌م وه‌رزه‌ی سێریا ئه‌ی بوو.
یوڤێنتۆس هه‌ڕه‌شه‌ی له‌ده‌ستدانی نازناوی ئه‌م وه‌رزه‌ی سێریا ئه‌ی له‌سه‌ره‌ كه‌ له‌ دوایین هه‌شت ساڵی رابردوو توانیویه‌تی ئه‌م نازناوه‌ بباته‌وه‌، به‌تایبه‌ت به‌هۆی ئینته‌رمیلان و لازیۆ كه‌ ركابه‌رییه‌كی به‌هێزی بردنه‌وه‌ی نازناوه‌كه‌ ده‌كه‌ن.
ساری ته‌مه‌ن 61 ساڵ، پێشتر راهێنه‌ری یانه‌كانی، هێلاس ڤیرۆنا، پێسكارا، ئیمپۆلی و ناپۆلی بووه‌، نازناوی یۆرۆپالیگی بۆ چێڵسی به‌ده‌ستهێناوه‌، له‌ هاوینی رابردوو روویكرده‌ یوڤێنتۆس، له‌گه‌ڵ ئه‌م یانه‌یه‌ له‌ كۆی 32 یاری، 24 بردنه‌وه‌، 4 به‌رامبه‌ربوون و 4 شكستی هه‌یه‌.
له‌ لایه‌كی دیكه‌یشه‌وه‌، رۆژنامه‌ی توتوسپۆرت نووسیویه‌تی: پێویست رێز له‌ كریستیانۆ بگیردرێت و هیچ یاریزانێك له‌ یوڤی هاوشێوه‌ی بێنزێما له‌ ریال مه‌درید نه‌بێته‌ قوربانی.
كه‌ریم بێنزێما له‌ هاوینی 2009 له‌ یانه‌ی لیۆنی فره‌نسا به‌ به‌های 35 ملیۆن یۆرۆ روویكرده‌ ریال مه‌درید، له‌گه‌ڵ ئه‌و یانه‌یه‌ 4 نازناوی چامپیۆنزلیگی بردۆته‌وه‌، له‌ كۆی 495 یاری، 240 گۆڵی كردووه‌ و چواره‌مین گۆڵكاری مێژووی ریال مه‌درید له‌ دوای هه‌ریه‌كه‌ له‌ دی ستیفانۆ، كریستیانۆ رۆناڵدۆ و رائول گۆنزالێز.

© 2017 Hawler