نیسان 06, 2020

"خیانه‌ت چۆكی به‌ ئێریكسن دادا و ناچاری كرد تۆتێنهام جێبهێڵێت"

کریستیان ئێریکسنی دانیمارکی دوای 7 ساڵ له‌ خزمه‌تی یانه‌ی تۆتێنهامی له‌نده‌نی، به‌ فه‌رمی درێسی ئه‌و یانه‌یه‌ی فڕێدا و به‌ درێسی ئینته‌ر میلان ئێواره‌ی سێشه‌ممه‌ یه‌كه‌مین مه‌شق و راهێنانی له‌ژێر سه‌رپه‌رشتی ئانتۆنیۆ كۆنتی كرد.



" ئیریكسن له‌سه‌ر راسپارده‌ی كۆنتی په‌یوه‌ندی به‌ ئینته‌ر میلان كرد"
یانه‌ی ئینته‌ر میلان له‌ تویته‌ری فه‌رمی خۆی وێنه‌یه‌كی ئێریكسنی بڵاو كرده‌وه‌ و ئه‌م یاریزانه‌ی به‌ فه‌رمی به‌ گرێبه‌ستێك بۆ ماوه‌ی چوار وه‌رز به‌ هانده‌رانی یانه‌كه‌ی ناساند.
ئێریكسن شه‌ش مانگ به‌ر له‌ ته‌واوبوونی گرێبه‌سته‌كه‌ی بڕیاریدا له‌ تۆتێنهام جیابێته‌وه‌ و ئاماده‌ نه‌بوو گرێبه‌سته‌كه‌ی نوێ بكاته‌وه‌، كریستیان ئیریكسن دوای ئه‌وه‌ی گه‌یشته‌ میلانۆ له‌لایه‌ن ئینته‌رمیلانه‌وه‌ پشكنینه‌ پزیشكییه‌كانی بۆ كرا به‌ فه‌رمی واژۆی له‌سه‌ر گرێبه‌سته‌كه‌ی ئینته‌ر میلان كرد و هه‌ر له‌ هه‌مان رۆژ به‌ پێكه‌نین و خۆشحاڵییه‌كی زۆره‌وه‌ له‌ مه‌شقه‌كانی ئینته‌ر میلان بینرا.
كریستیان ئێریكسنی ته‌مه‌ن 27 ساڵ، پێشتر له‌ هاوینی 2013 له‌ یانه‌ی ئایاكس به‌ به‌های 18 ملیۆن یۆرۆ روویكرده‌ تۆتێنهام، له‌گه‌ڵ ئه‌و یانه‌یه‌ له‌ كۆی 305 یاری 69 گۆڵ و 89 ئاسیستی كردووه‌.
ئێریكسن له‌ پێناو هه‌ڵوه‌شاندنه‌وه‌ی گرێبه‌سته‌كه‌ی، 20 ملیۆن یۆرۆی خسته‌ ده‌ستی تۆتێنهام، له‌ ئینته‌ر میلانیش هه‌فتانه‌ 320 هه‌زار پاوه‌ند وه‌رده‌گرێت، یه‌كه‌م یاریی ئه‌م یاریزانه‌ 27 ساڵیه‌ یه‌كشه‌ممه‌ی داهاتوو له‌ سێریا ئه‌ی به‌رامبه‌ر ئۆدێنزی ئیتاڵیا ده‌بێت.

ئیریكسن دوای جێهێشتنی تۆتێنهام چی گوت؟
كریستیان ئێریكسن ئێواره‌ی دوێنێ پێش ئه‌وه‌ی به‌ میدیاكان بناسێندرێت له‌ یه‌كه‌مین لێدوانی وه‌ك یاریزانی نوێی ئینته‌ر میلان گوتی: به‌جۆش و خرۆش بووم بۆ په‌یوه‌ندیكردن به‌ ئینته‌ر میلان، به‌رگه‌ی چاوه‌ڕوانی ناگرم تا ئه‌و كاته‌ی یه‌كه‌مین یاری به‌ درێسی ئه‌و یانه‌ نوێیه‌م ده‌كه‌م، ئه‌وان زۆر به‌ گه‌رمی پێشوازیان لێكردم، هه‌ستێكی خۆشم هه‌یه‌ و زۆر دڵخۆشم كه‌ ئێستا یاریزانی ئینته‌ر میلان.
ئێریكس گوتیشی: له‌ ئینگلاند ئه‌نجامی باشم به‌ده‌ستهێناوه‌ و ئێستا كاتی ئه‌وه‌یه‌ ده‌ست به‌ ركابه‌رییه‌كی نوێ بكه‌م، دڵخۆشم كه‌ ده‌رفه‌تم بۆ ره‌خساوه‌ له‌ سێریا ئه‌ی یاریی بۆ یانه‌یه‌كی گه‌وره‌ بكه‌م.

خیانه‌ت ناونیشانی چیرۆكی جیابوونه‌وه‌ی ئیریكسن و تۆتێنهامه‌
 به‌ گوێره‌ی میدیاكانی بریتانیا، ئه‌م یاریزانه‌ له‌ پێناو به‌دوورگرتنی خێزانه‌كه‌ی له‌ چاوتێبڕینی ڤێرتۆنخنی به‌رگریكاری تۆتێنهام ریزه‌كانی ئه‌و یانه‌یه‌ی به‌ره‌و ئینته‌ر میلان جێهێشتووه‌.
له‌ دوای شكسته‌ گه‌وره‌كه‌ی تۆتێنهام له‌ چامپیۆنزلیگ به‌رامبه‌ر بایرن میونشن ئاڵۆزی و ناكۆكی نێوان كریستیان ئێریكسن و ڤێرتۆنخنی به‌لجیكا له‌ نێو میدیاكانی بریتانیا هه‌رایه‌كی گه‌وره‌ی نایه‌وه‌، به‌جۆرێك به‌ هۆكاری سه‌ره‌كی شكسته‌ گه‌وره‌كه‌ی تۆتێنهام به‌رامبه‌ر بایرن میونشن تۆمه‌تباركران.
پێگه‌ی ده‌یلی مه‌یل نووسیویه‌تی: له‌ دوای ئه‌وه‌ی له‌ مانگی ئۆكتۆبه‌ری ساڵی رابردوو كریستیان ئێریكنسی دانیماركی جه‌نگی له‌ دژی ڤێرتۆنخن ده‌ستپێكرد و له‌ مه‌شقه‌كان بۆكسێكی له‌ لاچاوێكی ڤێرتۆنخن داوه‌، به‌هۆی ئه‌وه‌ی ده‌ستدرێژی كردۆته‌ سه‌رخێزانه‌كه‌ی و ویستوویه‌تی په‌یوه‌ندی سۆزداری له‌گه‌ڵ ببه‌ستێت.
سه‌رچاوه‌كه‌ ئاماژه‌ی بۆ ئه‌وه‌ش كردووه‌ ڤێرتۆنخن خیانه‌تی له‌ ئێرێكسنی هاوڕێی كردووه‌ و په‌یوه‌ندی سۆزداری له‌گه‌ڵ هاوسه‌ره‌كه‌ی ئێریكس به‌ستووه‌ و به‌به‌یه‌كه‌وه‌ش خه‌وتوون.
له‌ لایه‌كی دیكه‌یشه‌وه‌ پێگه‌ی میره‌ری بریتانیا ئه‌وكات نووسیبووی: شه‌ڕ و ئاژاوه‌ی نێوان ئه‌م دوو یاریزانه‌ كاریگه‌ری ده‌روونی خراپی له‌سه‌ر كۆی یاریزانه‌كانی تۆتێنهام دروست كردووه‌، هه‌ر بۆیه‌ له‌ چامپیۆنزلیگ به‌رامبه‌ر بایرن میونشن تووشی شكستێكی شه‌رمه‌زاری گه‌وره‌ بوونه‌وه‌.

ماوریسیۆ پۆچیتینیۆ بووه‌ته‌ قوربانی ئه‌م كێشه‌یه‌
رۆژنامه‌ی میره‌ر ئه‌وه‌شی خستۆته‌ڕوو كه‌ كێشه‌كانی نێوان ئه‌م دوو یاریزانه‌ به‌جۆرێك ئاڵۆزه‌ ته‌نانه‌ت ماوریسیۆ پۆچیتینیۆی راهێنه‌ری ئه‌وكاتی تۆتێنهام نه‌یتوانیوه‌ كێشه‌كانیان چاره‌سه‌ر بكات، ده‌گوترێت ئه‌و راهێنه‌ره‌ بووه‌ قوربانی ده‌ستی كێشه‌كانی ئه‌و دوو یاریزانه‌ و دواجار دوورخرایه‌وه‌، به‌وپێیه‌ی
ڤێرتۆنخنی ته‌مه‌ن 32 ساڵ سوور بووه‌ له‌سه‌ر هه‌وڵدان بۆ په‌شیمان كردنه‌وه‌ی سابرینا كڤیستی هاوسه‌ره‌كه‌ی ئێریكسن بۆ ئه‌وه‌ی له‌ یاریزانه‌ دانیماركییه‌كه‌ جیاببێته‌وه‌  و هاوسه‌رگیری له‌گه‌ڵ ئه‌ودا بكات، به‌جۆرێك ته‌نانه‌ت داوای له‌ هاری كه‌ینی كاپتن كردووه‌ بۆ ئه‌وه‌ی یارمه‌تی بدات بۆ ئه‌وه‌ی له‌گه‌ڵ ئه‌و كچه‌ هاوسه‌رگیری بكات كه‌ ئێستا له‌گه‌ڵ ئێریكنس ده‌ژیت.

مۆرینهۆش له‌ كێشه‌كان تێوه‌گلا
دوای ئه‌وه‌ی سه‌ره‌تای ئه‌م مانگه‌ تۆتێنهام له‌ جامی ئینگلاند به‌رامبه‌ر یانه‌ی میدلزبره‌ كه‌وته‌ داوای یه‌كسانبوونه‌وه‌، مۆرینهۆ به‌ توڕه‌یی گوتی: ئیریكسن مێشكی له‌ تۆتێنهام نییه‌.
مۆرینهۆ له‌ وه‌ڵامێكی رۆژنامه‌نووساندا ره‌خنه‌ی توندی له‌ ناوه‌راستكاری پێشووی یانه‌كه‌ی گرت و گوتی: من گه‌مژه‌ نیم، یاریزان باش ده‌ناسم و ساڵانێكه‌ كاری راهێنه‌رایه‌تی ده‌كه‌م، كریستیان ئێریكسن مێشكی له‌ تۆتێنهام نییه‌ و ئاستی زۆر به‌ره‌و خراپ بوون رۆیشتووه‌ و ئاخر ناكرێت یاریزانێك به‌م ته‌مه‌نه‌ ئاوها به‌ لاوازی ده‌ربكه‌وێت.
رۆژنامه‌ی ده‌یلی ده‌یل مه‌یل له‌ راپۆرته‌ هه‌واڵێكدا ئاماژه‌ بۆ ئه‌وه‌ ده‌كات كه‌ مۆرینهۆ دڵنیابووه‌ له‌وه‌ی هه‌رگیز دۆخی نێوان ئیریكسن و ڤێرتۆنخن ئاسایی و باش نابێته‌وه‌، بۆیه‌ له‌ پێناو ئه‌وه‌ی به‌ ده‌ردی پۆچیتینیۆ نه‌چێت ده‌رگای یانه‌كه‌ی له‌به‌رده‌م ئێریكسن كرده‌وه‌ و كارئاسانی بۆ كرد بۆ ئه‌وه‌ی په‌یوه‌ندی به‌ ئینته‌ر میلان بكات، بۆ ئه‌وه‌ی كێشه‌ گه‌وره‌كه‌ی یانه‌كه‌ی بنبڕ بكات كه‌ كاریگه‌ری له‌سه‌ر لایه‌نی ده‌روونی سه‌رجه‌م یاریزانه‌كان كرد بوو.

 

ئەسعەد ئیسماعیل- هەولێر

© 2017 Hawler