شوبات 27, 2020

ئه‌مرۆ ریال مه‌درید جه‌نگی بردنه‌وه‌ی نازناوه‌كه‌ ده‌ستپێده‌كات

شاندی یانەكانی ریال مەدرید و بارسێلۆنا بۆ یارییه‌كانی جامی سووپه‌ری ئیسپانیا گه‌یشتنه‌ وڵاتی سعوودییه‌، زێدان و ڤاڵڤێردی به‌ پێكهاته‌یه‌كی كه‌موكوڕی یه‌كه‌مین یاری له‌ پاڵه‌وانێتییه‌كه‌ ئه‌نجام ده‌ده‌ن، ئه‌گه‌ر له‌ یه‌كه‌مین یاری پاڵه‌وانێتییه‌كه‌ سه‌ركه‌وتن به‌ده‌ستبێنن له‌ یاریی كۆتایی كلاسیكۆ رووده‌دات.
 ریال مه‌درید لیستی ناوی ئەو یاریزانانەی بڵاوکردەوە کە بۆ یارییەکانی جامی سوپەری وڵاتەکەیان بانگهێشتکراون و لە لیستەکەدا ناوی كه‌ریم بێنزێما و گاریس بەیل بوونی نییە، به‌هۆكاری پێكان دوورخراونه‌ته‌وه‌.
ئێواره‌ی دوێنێ ریال مەدرید لە سعوودیە دوایین یەکەی مەشق و راهێنان بۆ یارییەکەی ئه‌مڕۆ بەرامبەر ڤاڵێنسیا كرد، كه‌ بڕیاره‌ یاریییه‌كه‌ له‌ كاتژمێر 10:00ـی شه‌و به‌ڕێوه‌ بچێت و براوەی یارییەکە لە یاریی کۆتایی رۆژی یەکشەممە رووبەڕووی براوەی یاریی نێوان بارسێلۆنا و ئاتڵێتیکۆ مەدرید دەبێتەوە.
له‌ لایه‌كی دیكه‌یشه‌وه‌، یانه‌ی بارسێلۆنا لیستی یاریزانه‌كانی بۆ یارییه‌كه‌ی سبه‌ی له‌ جامی سووپه‌ری ئیسپانیا به‌رامبه‌ر ئاتڵێتیكۆ مه‌درید بڵاو كرده‌وه‌ كه‌ بڕیاره‌ یارییه‌كه‌ له‌ كاتژمێر 10:00ـی شه‌و له‌ یاریگه‌ی شا عه‌بدوڵڵا له‌ سعوودییه‌ به‌یه‌ك بگه‌ن
ئارنیستۆ ڤاڵڤێردی راهێنه‌ری یانه‌ی بارسێلۆنا بۆ جامی سووپه‌ری ئیسپانیا له‌ تواناكانی 3 یاریزانی كاریگه‌ری بێبه‌ش ده‌بێت، یه‌كه‌میان تیر شتگنی گۆڵپارێز، ئارتور میللۆی ناوه‌راستكاری به‌رازیلی و عوسمان دێمبلی هێرشبه‌ری فره‌نسی.
بریارە بۆ یەکەمجار بە شێوازێکی نوێ و بە بەشداری چوار یانە، جامی سووپەری ئیسپانیا لە سعوودیه‌ بەرێوەبچێت، بارسێلۆنا 13 نازناوی جامی سووپه‌ری ئیسپانیای بردۆته‌وه‌ و یه‌كه‌م یانه‌یه‌ له‌ ئیسپانیا كه‌ خاوه‌نی زۆرترین نازناوه‌، له‌ پله‌ی دووه‌م ریال مه‌درید به‌ 10 نازناو دێت، دیپۆرتیڤۆ لاكورونیا 3 نازناوی هه‌یه‌، ئاتڵێتیكۆ مه‌درید و ئاتڵێتیك بلباو هه‌ریه‌كه‌یان 2 جار بوونه‌ته‌ پاڵه‌وان،‌ یانه‌كانی (ڤالێنسیا، سێڤییا، زاراگۆزا، مایۆركا و ریال سوسیداد) هه‌ریه‌كه‌ نازناوێكی جامی سووپه‌ری ئیسپانیایان بردۆته‌وه‌.

 

ئەسعەد ئیسماعیل- هەولێر

© 2017 Hawler