تشرینی دووەم 18, 2019

یاریی قوه‌ی جه‌وی و مه‌ولودییه‌ی جه‌زائیری گواسترایه‌وه‌ هه‌ولێر

یاریی نێوان قوه‌ی جه‌ویه‌ی عێراقی و مه‌ولودیه‌ی جه‌زائیری له‌ قۆناخی شازده‌ی پاڵه‌وانێتی یانه‌كانی عه‌ره‌بی بۆ یاریگای شەهید فرەنسۆی تایبەت بە یانەی هەولێر گواسترایه‌وه‌، ئه‌مه‌ش به‌هۆی ئاڵۆزییه‌كانی ئه‌م دواییانه‌ی شاره‌كانی ناوه‌ڕاست و خوارووی عێراقی گرتۆته‌وه‌.
ئه‌م یارییه‌ بڕایاربوو له‌ شاری به‌سڕه‌ ئه‌نجام بدرێت، به‌ڵام فیدڕاسیۆنی تۆپی پێی عه‌ره‌بی له‌ پێناوی پاراستنی گیانی یاریزانه‌كان، یارییه‌كه‌ی بۆ یاریگای یه‌كه‌می فڕه‌نسۆ هه‌ریری گواسته‌وه‌‌، وابڕیاریشه‌ رۆژی هه‌ینی یارییه‌كه‌ ئه‌نجام بدرێت، ئه‌مه‌ یاریی چونی قۆناخی شازده‌یه‌، له‌ جامی یانه‌ پاڵه‌وانه‌كانی عه‌ره‌ب.
دوێنێش یانه‌ی قوه‌ی جه‌ویه‌ گه‌یشته‌ شاری هه‌ولێر و یه‌كه‌م یه‌كه‌ی مه‌شق و راهێنانی له‌سه‌ر یاریگای برایه‌تی بۆ ئه‌م یارییه‌ ئه‌نجامدا، قوه‌ی جه‌ویه‌ به‌ راهێنه‌رایه‌تی ئه‌یوب ئۆدیشۆ، له‌ قۆناخی سی و دوو له‌ یانه‌یه‌كی عومانی برده‌وه‌ و گه‌یشته‌ ئه‌م قۆناخه‌، به‌ڵام ئه‌مجاره‌ ڕووبه‌ڕووی یانه‌یه‌كی به‌هێز ده‌بێته‌وه‌، هه‌رچه‌نده‌ قوه‌ی جه‌ویه‌ سه‌رجه‌م یاریزانه‌كانی بۆ ئه‌م یارییه‌ ئاماده‌ن، به‌ڵام بۆ پاڵپشتی یانه‌كه‌ چاویان له‌ هانده‌رانی شاری هه‌ولێره‌ تا له‌ یاریگا ئاماده‌بن و هانیان بده‌ن.
قوه‌ی جه‌ویه‌ توانی بۆ سێ ساڵ ببێته‌ پاڵه‌وانی جامی یه‌كێتی ئاسیا، كه‌ پێشووتر هیچ یانه‌یه‌كی عێراقی نه‌یتوانیووه‌ ئه‌م ده‌ستكه‌وته‌ی یانه‌ به‌غدایه‌كه‌ دووباره‌ بكاته‌وه.
یاریی گه‌ڕانه‌وه‌ی نێوان ئه‌م دوو یانه‌یه‌ له‌ ناوه‌ڕاستی ئه‌م مانگه‌ له‌ وڵاتی جه‌زائیر به‌ڕێوه‌ده‌چێت.‌

 

بارزان ئەكرەم - هەولێر

© 2017 Hawler