کانونی دووەم 17, 2021

لە هەولێر ماڕاسۆنی هیوا بۆ نەخۆشانی شێرپەنجە بەڕێوەدەچێت

بە دروشمی (بە وەرزش و هیوا بەرەنگاری شێرپەنجە دەبینەوە) ڕێكخراوی ئەربیل ماڕاسۆن بۆ وەرزش و ئاشتی، بە هەماهەنگی لەگەڵ ناخۆشخانەی نانەكەلی و سەنتەری ڕزگاری بۆ چارەسەری شێرپەنجە و بە سپۆنسەری كۆمپانیای كۆڕەك تیلكۆم، ڕۆژی شەممە ڕاكردنێكی 3 كم لە شەقامی كەركووك ئەنجام دەدات، ئامانجی ڕاكردنەكە بەرزكردنەوەی هۆشیارییە دەربارەی نەخۆشییەكانی شێرپەنجە و كۆكردنەوەی كۆمەك و هاوكارییە بۆ نەخۆشخانەی نانەكەلی، دەربارەی ماڕاسۆنەكەیش (عەبدولستار عیسمەت) سەرۆكی ڕێكخراوی ئەربیل ماڕاسۆن بەم جۆرە قسەی بۆ ڕۆژنامەی هەولێر كرد.

لە دەسپێكدا ووتی" ئەم ڕاكردنە زیاتر چالاكیەكی مرۆییە و خێر خوازییە زیاتر ئامانجمان ئەوەیە لە ڕێگەی ئەم ڕاكردنەوە هۆشیاری زیاتر دەربارەی نەخۆشییەكانی شێرپەنجە بڵاوبكەینەوە و تا زیاتر خۆیان بپارێزن، هەروەها لە ڕێگەی ئەم ماڕاسۆنەوە بە هەماهەنگی نەخۆشخانەی نانەكەلی و سەنتەری ڕزگاری و سپۆنسەری كۆڕەك تیلیكۆم كۆمەك كۆبكەینەوە بۆ نەخۆشانی نەخۆشخانەی نانەكەلی".
ئەوەیشی ووت كە جیا لە كۆمپانیای كۆڕەك هەریەك لە پەیمانگەی نۆبڵ و تەلەفیزۆنی ئاسمانی كوردستان 24 یش سۆپنسەری ماڕاسۆنەكە دەكەن، باسی ئەوەیشی كرد كە ماڕاسۆنەكە لە شەقامی كەركووك و لە بەردەم تابلۆ مۆڵ دەست پێدەكات و لە بەردەم نەخۆشخانەی نانەكەلی كۆتای دێت، (عیسمەت) هێمای بۆ ئەوەیش كرد كە درێس و جانتا دەدرێت بە ئەو كەسانەی كە بەشداری ڕاكردنەكە دەكەن و هەر كەسێك بڕی 3 هەزار دیناری لێ وەردەگیرێت، لەبەر ئەوەی ماڕاسۆنەكەیش كارێكی مرۆیی و خێرخوازییە، ئەو كەسانەی كە بەشداری دەكەن دەتوانن لەو بڕە زیاتر بدەن كە بۆ هەریەك لە كەسەكان دیاری كراوە، دوای تەواوو بوونی ماڕاسۆنەكەیش سەرجەم داهاتی كۆكراوەی ماڕاسۆنەكە دەدرێت بە نەخۆشخانەی نانەكەلی

 

هێمن ئەسكەندەر - هەولێر
.

© 2017 Hawler