ئەیلول 28, 2020

ئه‌مڕۆ وه‌رزی نوێی چامپیۆنزلیگ به‌ چه‌ندان یاری ئاگرین ده‌ستپێده‌كات

خولی یانه‌ پاڵه‌وانه‌كانی ئه‌ورووپا بۆ وه‌رزی 2019 ـ 2020 به‌ ئه‌نجامدانی هه‌شت یاری ده‌ستپێده‌كات، شه‌ش یاری له‌ كاتژمێر 10:00ـی شه‌و ده‌كرێن، دوو یارییه‌كه‌ی دیكه‌ش له‌ كاتژمێر 07:55 خوله‌كی ئێواره‌ به‌ڕێوه‌ ده‌چن.
ئه‌مشه‌و له‌ قۆناخی كۆمه‌ڵه‌كانی چامپیۆنزلیگ، به‌ یاری نێوان (ئینته‌ر میلان و سلاڤیا براگ) له‌گه‌ڵ یاری (لیۆن ـ زینت) شه‌مه‌نده‌فه‌ری وه‌رزی نوێی خوله‌كه‌ به‌ڕێده‌كه‌وێت، هه‌ردوو یارییه‌كه‌ش له‌ كاتژمێر 07:55 خوله‌كی ئێواره‌ ده‌كرێن.

دۆرتمۆند ـ بارسێلۆنا
ئارنیستۆ ڤاڵڤێردی راهێنه‌ری یانه‌ی بارسێلۆنا 22 یاریزانی بۆ رووبه‌ڕبوونه‌وه‌ی دۆرتمۆند بانگهێشت كردووه‌، له‌ نێویاندا لیۆنێل مێسی دوای 72 رۆژ دابڕان له‌ یاریكردن بۆ پێكهاته‌ی یانه‌كه‌ بانگهێشتكراوه‌ته‌وه‌، به‌ڵام عوسمان دێمبلی له‌ لیستی یاریزانه‌كان نییه و‌ بۆ یه‌كه‌مین یاری بارسا له‌ وه‌رزی نوێی چامپیۆنزلیگ ئاماده‌ نابێت.
ڤاڵڤێردی له‌ شوێنی دێمبلی بۆ یه‌كه‌مجار بانگهێشتی ئانسۆمانی فاتێ ده‌كات، ئه‌مه‌ش دوای ئه‌وه‌ هات ئه‌و یاریزانه‌ كه‌ به‌ مێسی بچووك ناسراوه‌ له‌ دوایین 3 یاری بارسا له‌ لالیگا 2 گۆڵی كرد.

ماركۆ ریۆس هه‌ڕه‌شه‌ له‌ بارسێلۆنا ده‌كات
ماركۆ ریۆس هێرشبه‌ری یانه‌ی بورسیا دۆرتمۆندی ئه‌ڵمانیا له‌ پرێس كۆنفرانسێك پێش یارییه‌كه‌ی ئه‌مڕۆ جه‌خت له‌وه‌ ده‌كاته‌وه‌ كه‌ هیچ ترسێكیان له‌ رووبه‌ڕبوونه‌وه‌ی مێسی و بارسێلۆنا نییه‌، ده‌شڵێت: ئێمه‌ ناترسین و ده‌مانه‌وێت له‌سه‌ر یاریگه‌ی خۆمان یارییه‌كه‌ ببه‌ینه‌وه‌، دڵخۆشیش ده‌بین ئه‌گه‌ر لیۆنێل مێسی بۆ یارییه‌كه‌ی ئه‌مڕۆ ئاماده‌ بێت.
ماركۆ ریۆس گوتیشی: له‌م یارییه‌ زۆر دڵخۆشین به‌ بوونی پاكۆ ئالكاسێر، چونكه‌ ئه‌و یاریزانه‌ پێشتر له‌ بارسێلۆنا یاری كردووه‌ له‌ ڕووی هێرشبه‌رییه‌وه‌ بۆ ئێمه‌ زۆر گرینگه‌.

یارییه‌كانی دیكه‌ی ئه‌مرۆی چامپیۆنزلیگ
له‌ یارییه‌كی دیكه‌ی لوتكه‌ی چامپیۆنزلیگ، یۆرگن كڵۆپی راهێنه‌ری لیڤه‌رپوول بۆ رووبه‌ڕبوونه‌وه‌ی یانه‌ی ناپۆلی گه‌یشتۆته‌ ئیتاڵیا.
یانه‌ی ناپۆلی به‌ راهێنه‌رایه‌تی كارلۆ ئانچیلۆتی به‌ره‌نگاری لیڤه‌رپوولی هه‌ڵگری نازناوی وه‌رزی رابردووی چامپیۆنزلیگ ده‌بێته‌وه‌.
له‌ یارییه‌كی دیكه‌دا، ئایاكس ئه‌مستردام و لیلی فره‌نسا به‌یه‌ك ده‌گه‌ن، فرانك لامپاردیش یه‌كه‌مین یاری خۆی وه‌ك راهێنه‌ری چێڵسی له‌ چامپیۆنزلیگ به‌رامبه‌ر ڤالێنسیا ده‌كات و هه‌ردوو یانه‌ی بێنفیكا و لایپزیگیش به‌ره‌نگاری یه‌كتر ده‌بنه‌وه‌.

 

ئەسعەد ئیسماعیل- هەولێر

© 2017 Hawler