ئاب 26, 2019

ڤان دایك نهێنییه‌ك ئاشكرا ده‌كات

ڤان دایك، به‌رگریكاره‌ پۆڵایینه‌كه‌ی یانه‌ی لیڤه‌رپوول له‌ لێدوانێكدا ئاماژه‌ بۆ ئه‌وه‌ ده‌كات كه‌ وه‌رزی رابردوو یاریزانێك هه‌بووه‌ كه‌ به‌ ئاسانی لێی تێپه‌ڕبووه‌، ده‌شڵێت: ترسم له‌ هیچ یاریزانێك نه‌بوو، جگه‌ له‌ لێرۆی سانی ناوه‌راستكاری مانچێسته‌ر سیتی كه‌ چه‌ندینجار تۆپی لێ تێپه‌ڕ كردم.
ڤان دایك كاپتنی هه‌ڵبژارده‌ی تۆپی پێی هۆڵه‌ندا وه‌رزی رابردوو نازناوی چامپیۆنزلیگی له‌گه‌ڵ لیڤه‌رپوول برده‌وه‌، له‌ لێدوانێكدا كه‌ له‌ پێگه‌ی سكای سپۆرتسی بریتانیا بڵاو بۆته‌وه‌، جه‌خت له‌وه‌ ده‌كاته‌وه‌ كه‌ لێرۆی سانێ چه‌ندانجار تۆپی به‌ ئاسانی تێپه‌ڕ كردووه‌.
ڤان دایك گوتیشی: لێرۆی سانێ له‌شولارێكی سووكی هه‌یه‌ و به‌شێوه‌یه‌كی ژیرانه‌ مامه‌ڵه‌ له‌گه‌ڵ تۆپ ده‌كات، له‌ یارییه‌ك دووجار تۆپی لێ ڕه‌تكردم، هه‌ردووجاره‌كه‌ش مه‌ترسی خسته‌ سه‌ر ئێمه‌.
ڤان دایك گوتیشی: له‌ قۆناخی پێشكۆتایی وه‌رزی رابردووی چامپیۆنزلیگ رووبه‌ڕووی لیۆنێل مێسی و بارسێلۆنا بوومه‌وه‌، به‌ڵام هیچ هه‌ستم به‌ فشار نه‌كرد، ئه‌گه‌رچی مێسی یه‌كێكه‌ له‌ باشترینه‌كانی مێژوو. ڤان دایك له‌ به‌شێكی دیكه‌ی قسه‌كانیدا له‌ باره‌ی باڵۆن دۆری ئه‌مساڵ گوتی: راسته‌ بردنه‌وه‌ی خه‌ڵاتی باڵۆن دۆر خه‌ونی هه‌موو یاریزانێكه‌، به‌ڵام لای من بردنه‌وه‌ی نازناو له‌گه‌ڵ لیڤه‌رپوول و هۆڵه‌ندا زۆر له‌ نازناوی باڵۆن دۆر به‌نرختر و گرینگتره‌.
به‌ گوێره‌ی بۆچوونی شرۆڤه‌كاران، ڤان دایك هاوشانی لیۆنێل مێسی و كریستیانۆ رۆناڵدۆ بۆ بردنه‌وه‌ی خه‌ڵاتی تۆپی زێرینی 2019 به‌ربژێری سه‌ره‌كییه‌ كه‌ بڕیاره‌ خه‌ڵاته‌كه‌ له‌ سه‌ره‌تای ساڵی داهاتوو دابه‌ش بكرێت.

 

ئەسعەد ئیسماعیل- هەولێر

© 2017 Hawler