ئاب 26, 2019

كه‌ی هاوینه‌هه‌واری زێدان كۆتایی دێت؟!

له‌ به‌رده‌وامی ڕكابه‌رییه‌ نێوده‌وڵه‌تییه‌كانی جامی پاڵه‌وانان كه‌ هه‌موو ساڵ به‌ر له‌ ده‌سپێكی ڕكابه‌رییه‌كانی خوله‌ به‌ناوبانگه‌كانی ئه‌ورووپی به‌ڕیوه‌ده‌چێت، ڕیاڵ مه‌درید له‌ یاریگای مه‌ت لایفی نیوجێرسی ئه‌مریكا به‌روڕووی یانه‌ی ئه‌تڵتیكۆ مه‌دریدی هاوشارییه‌كه‌ی بوویه‌وه‌ و دۆرانێكی زۆر قورسیشی پێشكه‌ش به‌ ڕكابه‌ره‌كه‌ی كرد، تا ئێستا هیچ یانه‌یه‌ك به‌و شێوه‌یه‌ له‌م ڕكابه‌ریانه‌دا نه‌دۆڕاوه‌.
دێربی مه‌درید به‌رده‌وام هه‌ستیاره‌ و هه‌میشه‌ش بینه‌ری خۆی هه‌یه‌، هه‌رچه‌ند ئه‌م یارییه‌ دۆستانه‌ بوو، به‌ڵام هیچ پێوانه‌یه‌كی دۆستایه‌تی پێوه‌ دیار نه‌بوو، جگه‌ له‌ گۆڕینی زۆری یاریزانه‌كان، زینه‌دین زێدانیش جه‌ختی له‌وه‌ كرده‌وه‌ كه‌ ئاتڵێتیكۆی ركابه‌رییان هاوشێوه‌ی یارییه‌كی فه‌رمی جه‌نگان و بیریان له‌وه‌ نه‌كرده‌وه‌ كه‌ ئه‌وه‌ یارییه‌كی دۆستانه‌یه‌، گوتیشی: من خۆم وه‌ك راهێنه‌ر هاوشانی سه‌رجه‌م یاریزانه‌كان ئاستێكی خراپمان پێشكه‌ش كرد، به‌ڵام متمانه‌م به‌ یاریزانه‌كانم هه‌یه‌ بۆ وه‌رزی داهاتوو به‌شێوه‌یه‌كی باش خۆیان ئاماده‌ بكه‌ن.
له‌ شه‌وی دیێگۆ كۆستادا و هه‌ڵبه‌ت ده‌ركرانی كارڤاخاڵ، له‌ ڕاستیدا یانه‌ی ریاڵ مه‌درید وێڕان بوو و به‌ ئه‌نجامی 7-3 ئه‌م یارییه‌ی دۆڕاند. یاریزانانی ئه‌تلتیكۆ مه‌درید هه‌ر له‌ خوله‌كی یه‌كه‌مه‌وه‌ یارییه‌كه‌یان هێرشكارانه‌ ده‌ست پێ كرد و ته‌نیا له‌ گێمی یه‌كه‌مدا پێنج گۆڵیان له‌ ریاڵ مه‌درید كرد، ئه‌ویش له‌ كاتێكدا ریاڵ مه‌درید به‌ یاریزانه‌ سه‌ره‌كییه‌كانی یاری ده‌كرد. ئه‌تلتیكۆش دوای فرۆشتنی ئانتوان گریزمان به‌ بارسێلۆنا گۆڕانكاری له‌ هێڵی هێرشبه‌ردا كردبوو، به‌ڵام كۆستا باشتر له‌ ڕابردوو یاری كرد و گورزی گه‌وره‌ی له‌ ڕیاڵ مه‌درید دا، جیا له‌وه‌ش جواو فێلیكس ئه‌ستێره‌ بچووكه‌ نوێیه‌كه‌ی ئاتڵێتیكۆ مه‌درید له‌و یارییه‌ یه‌كه‌مین گۆڵی خۆی به‌ درێسی ئاتڵێتیكۆ له‌ دژی ریال مه‌درید تۆمار كرد.
ئه‌م شكسته‌ قورسه‌ كه‌ بێشك كاردانه‌وه‌ی زیاتر له‌ یاری دۆستانه‌ ده‌بێت، زه‌نگێكی مه‌ترسیداره‌ بۆ زێدانی فه‌ڕه‌نسی. زیزۆ كه‌ سێ وه‌رزی باشی له‌ ریاڵ مه‌درید تێپه‌ڕاند و له‌ هه‌ر سێ وه‌رزدا یانه‌كه‌ی له‌ یانه‌ی ئه‌تلتیكۆ مه‌درید باشتر بوو، له‌ ناوه‌ڕاستی وه‌رزی ڕابردوودا دووباره‌ ڕاهێنه‌رایه‌تی ئه‌م یانه‌یه‌ی به‌ده‌سته‌وه‌ گرته‌وه‌ بۆ ئه‌وه‌ی جارێكی دیكه‌ ریاڵ مه‌درید له‌م قه‌یرانه‌ بێنێته‌ده‌ر كه‌ تووشی بووه‌.
یارییه‌كه‌ی نێوان ریاڵ مه‌درید و ئه‌تلتیكۆ مه‌درید ده‌ریخست چوونه‌ده‌ر له‌ قه‌یران ئاوا به‌ ئاسانی نییه‌. زێدان هه‌رچه‌ند چه‌ند یاریزانێكی ئاستبه‌رزیشی بۆ یانه‌كه‌ی گواستۆته‌وه‌، به‌ڵام نه‌یتوانی له‌ دۆڕانێكی گه‌وره‌ ده‌ربازی بێت. یاریزانانی وه‌كوو ئیدین هازارد و لۆكا یوڤیچ كه‌ له‌ هه‌ر یانه‌یه‌ك یاری بكه‌ن، هاوسه‌نگییه‌كه‌ به‌لای ئه‌واندا ده‌شكێته‌وه‌، به‌ڵام بوونی ئه‌وانیش نه‌بوو به‌ ڕێگر له‌ دۆڕانیكی گه‌وره‌.
هاوینی ئه‌مساڵ به‌ جۆرێك له‌ جۆره‌كان هاوینێكی نه‌فره‌تی بووه‌ بۆ زێدان. له‌ مردنی براكه‌یه‌وه‌ بگره‌ تا دۆڕان به‌رانبه‌ر به‌ بایرن میونیخ و ئێستاش ئه‌تلتیكۆ مه‌درید له‌ یاری دۆستانه‌ی پێش وه‌رزدا. ڕه‌نگه‌ ئه‌گه‌ر یانه‌كه‌ی زێدان زووتر بچێته‌ ناو ڕكابه‌رییه‌ فه‌رمییه‌كان، هه‌ناسه‌یه‌كی وه‌به‌ر بێته‌وه‌ و بتوانێ به‌ چه‌ند بردنه‌وه‌ی سه‌ره‌تای وه‌رز قورسایی دۆڕاندنه‌كانی له‌بیر بكات.

 

محەمەد شهەدی- هەولێر

© 2017 Hawler