ئەیلول 18, 2019

سێیه‌مین ڕاكردنی منداڵان بۆ زیاتر له‌ 1000 منداڵ له‌ هه‌ولێر به‌ڕێوه‌ده‌چێت

له‌ژێر دروشمی ڕاده‌كه‌ین به‌ره‌و ئاینده‌یه‌كی گه‌ش ڕێكخراوی ئه‌ربیل ماڕاسۆن بۆ وه‌رزش و ئاشتی و به‌ پاڵپشتی فیدڕاسیۆنی ماڕاسۆن و ڕاكردنی ماوه‌كان، سێیه‌مین ڕاكردن بۆ منداڵانی 6 تا 13 ساڵان له‌ هه‌ولێر به‌ڕێوه‌ده‌بات، ئه‌مه‌ سێیه‌مین ساڵا ئه‌م ڕاكردنه‌ به‌ڕێوه‌ده‌چێت، ئامانجیش له‌ ئه‌نجامدانی ڕاكردنه‌كه‌ ناساندن و ئاشناكردنی زیاتری منداڵانه‌ بۆ وه‌رزش، جگه‌ له‌وه‌یش دوای ڕاكردنه‌كه‌ به‌ ئاماده‌ بوونی چه‌ند كه‌سایه‌تیه‌كی كارتۆنی و بۆ دڵخۆشكردنی منداڵان به‌ گۆرانی و ئاهه‌نگ گێڕان مه‌ڕاسیمێك به‌ڕێوه‌ده‌چێت.
جگه‌ له‌ ڕاكردنه‌كه‌ چه‌ند چالاكی بۆ دڵخۆش كردنی منداڵه‌كان به‌ڕێوه‌ده‌چێت
ده‌رباره‌ی به‌ڕێوه‌چوونی ڕاكردنه‌كه‌ و پلان و ئامانجی ئه‌م ڕاكردنه‌ له‌ لێدوانێكدا بۆ ڕۆژنامه‌ی هه‌ولێر (عه‌بدولستار عیسمه‌ت) سه‌رۆكی ڕێكخراوی ئه‌ربیل ماڕاسۆن به‌مجۆره‌ قسه‌ی كرد و گووتی: دوای ئه‌وه‌ی كه‌ له‌لایه‌ن فیدڕاسیۆنی ماڕاسۆن و ڕاكردنی ماوه‌كان مافی به‌ڕێوه‌چوونی ڕاكردنی منداڵانمان به‌ده‌ستهێنا، خۆشبه‌ختانه‌ بۆ سێیه‌مین ساڵ ئه‌و متمانه‌یه‌ له‌لایه‌ن فیدراسیۆنی ناوبراو وه‌رده‌گرینه‌وه‌ و به‌ به‌شداری زیاتر له‌ 1000 منداڵ ڕاكردنه‌كه‌ ئه‌نجامده‌ده‌ین، كه‌ هه‌موو منداڵانی به‌شدار بوو میدالیای نێوده‌وڵه‌تی وه‌رده‌گرن كه‌ له‌لایه‌ن فیدڕاسیۆنی ماڕاسۆن و ڕاكردنی ماوه‌كان دابینكراوه‌.
هێمای بۆ ئه‌وه‌یش كرد كه‌ هاوشیوه‌ی ساڵانی ڕابردوو، جگه‌ له‌ ڕاكردنه‌كه‌ له‌شیوه‌ی ڤیستڤاڵێك بۆ منداڵانی به‌شدار بوو چه‌ند چالاكی و گۆرانی بۆ دڵخۆشی ئه‌وان ڕێكخراوه‌ و چه‌ندین كه‌سایه‌تی كارتۆنی و مه‌نه‌لۆجیش پێشكه‌ش ده‌كرێن و به‌ بۆیاخ جوانكاری بۆ ڕوخساری منداڵه‌كان ده‌كرێت، ئه‌وه‌یشی گوت كه‌ ڕۆژێك پێش ڕاكردنه‌كه‌ هه‌ر له‌ پاركی سامی عه‌بدولڕه‌حمان كه‌ شوێنی ڕاكردنه‌كه‌یه‌ جل و به‌رگ و ژماره‌ی تایبه‌ت به‌ ڕاكردنه‌كه‌ به‌سه‌ر ئه‌و منداڵانه‌ دابه‌ش ده‌كرێت كه‌ ناوی خۆیان تۆمار كردووه‌، ئاماژه‌ی به‌وه‌یش كرد كه‌ ئه‌وان گه‌ره‌كیانه‌ كه‌ به‌ ئه‌نجامدانی ئه‌جۆره‌ چالاكیانه‌ زیاتر وه‌رزش له‌لای منداڵان ئاشنا بكه‌ن و تێكه‌ڵاوی و ئاشنایه‌تی زیاتر لای منداڵان دروست بكه‌ن.
ڕاکردنی خۆشی منداڵان ڕۆژی شەممە 29/6 کاتژمێر ٦:٠٠ی ئێوارە لە پارکی سامی عەبدولرەحمان بەڕێوە دەچێت و 1000 منداڵ میدالیای نێودەوڵەتی وەردەگرن، ماوه‌ی ڕاكردنه‌كه‌یش 1300 مه‌تر ده‌بێت و سه‌رجه‌م منداڵه‌كان براوه‌ ده‌بن و ڕكه‌به‌ری و پێش بڕكێی تێدا نیه‌.

© 2017 Hawler