ئایار 21, 2019

سێ یانه‌ ڕكه‌به‌ری له‌سه‌ر دوو پلیتی سه‌ركه‌وتن بۆ ڕیزی یانه‌ نایابه‌كان ده‌كه‌ن

ئه‌مڕۆ یارییه‌كانی گه‌ڕی شه‌شه‌م و كۆتایی چوارگۆشه‌ی زێڕینی خولی یانه‌ پله‌ یه‌كه‌كانی كوردستان به‌ڕێوه‌ ده‌چن و ناسنامه‌ی ئه‌و دوو یانه‌یه‌ ئاشكرا ده‌بن كه‌ ده‌گه‌نه‌ ڕیزی یانه‌ نایابه‌كانی كوردستان بۆ وه‌رزی داهاتوو، سیروانی نوێی پێشه‌نگی یانه‌كان له‌ یاری لوتكه‌دا میوانداری گاره‌ ده‌كات كه‌ 8 خاڵی هه‌یه‌ و به‌ جیاوازی گۆڵ له‌ خانه‌ی سێیه‌م دێت، سۆرانیش كه‌ خانه‌ی دووه‌می گرتووه‌ له‌ شاری كه‌ركووك ده‌بێته‌ میوانی یانه‌ی خاك، كه‌ هیچ هیوایه‌كی سه‌ركه‌وتنی نه‌ماوه‌، هه‌رسێ یانه‌ی سیروانی نوێ و سۆران و گاره‌ له‌ پێناو دوو پلیتی سه‌ركه‌وتن ده‌جه‌نگن، هه‌ردوو یارییه‌كه‌یش له‌ كاتژمێر3:00 به‌ڕێوه‌ده‌چن.

سیروانی نوێ و گاره‌ له‌ یاری لوتكه‌دا به‌یه‌ك ده‌گه‌ن
ئه‌مڕۆ یارییه‌كانی خولی یانه‌ پله‌ یه‌كه‌كانی كوردستان كۆتاییان دێت و ناسنامه‌ی ئه‌و دوو یانه‌یه‌یش ئاشكرا ده‌بن كه‌ ده‌گه‌نه‌ ڕیزی یانه‌ نایابه‌كانی كوردستان، سیروانی نوێ ئه‌مڕۆ له‌سه‌ر یاریگه‌ی خۆی له‌ یاری لوتكه‌ و گه‌یشتن به‌ نایاب میوانداری یانه‌ی گاره‌ی نوێنه‌ره‌كه‌ی دهۆك ده‌كات، سیروانی نوێ له‌ گه‌ڕی ڕابردوودا به‌ شكستهێنانی له‌گه‌ڵ سۆران چاره‌نوسی سه‌ركه‌وتنی كه‌وته‌ مه‌ترسیه‌وه‌ و دوورنیه‌ به‌ دۆڕانی له‌ یارییه‌كه‌ی ئه‌مڕۆدا ئامانجه‌كه‌ی له‌ ده‌ست بدات، سیروانی نوێ به‌ بردنه‌وه‌ و یه‌كسان بوون به‌ فه‌رمی ده‌گاته‌ ڕیزی یانه‌ نایابه‌كان بێ ئاوڕدانه‌وه‌ له‌ یاری خاك و سۆران.
یانه‌ی گاره‌یش به‌ ئومێدێكی زۆره‌وه‌ گه‌شتی سلێمانی كردووه‌، یاریزانانی گاره‌ له‌ بارودۆخێكی ده‌روونی باشدان دوای ئه‌وه‌ی له‌ دوو گه‌ڕی ڕابردوودا 6 خاڵیان به‌ ده‌ستهێناوه‌ و به‌ 8 خاڵ و به‌ جیاوازی گۆڵ له‌ پله‌ی سێیه‌م دێن، گاره‌ به‌ دوو ئه‌گه‌ر ده‌گاته‌ نایاب، بردنه‌وه‌ له‌ یارییه‌كه‌ی ئه‌مڕۆ به‌ فه‌رمی نوێنه‌ره‌كه‌ی دهۆك ده‌كاته‌ نایاب، ئه‌گه‌ری دووه‌م یه‌كسان بوونی له‌م یارییه‌، به‌ مه‌رجێك سۆران له‌گه‌ڵ خاك توشی دۆڕان بێت، ئه‌گه‌ر هه‌ردوو یارییه‌كه‌یش به‌ یه‌كسان بوون كۆتاییان هات، ئه‌و كات سیروانی نوێ ده‌گاته‌ نایاب و پلیتی دووه‌میش له‌ نێوان سۆران و گاره‌ ده‌بێت و جیاوازی گۆڵ یانه‌ی سه‌ركه‌وتوو دیاری ده‌كات.

سۆران گه‌ره‌كیه‌تی بۆ یه‌كه‌مجار له‌ مێژووی خۆیدا بگات نایابی كوردستان
ئه‌مڕۆ یانه‌ی سۆران گرنگترین یاری له‌ مێژووی خۆیدا ئه‌نجام ده‌دات، كاتێك له‌ یارییه‌كی چاره‌نوسسازدا ده‌بێته‌ میوانی یانه‌ی خاك، سۆران كه‌ به‌رده‌وام له‌ هه‌وڵی ئه‌وه‌ دا بووه‌ كه‌ بگاته‌ ڕیزی یانه‌ نایابه‌كانی كوردستان، ئه‌م وه‌رزه‌ به‌ ئاستێكی به‌رز ده‌رده‌كه‌وێت و ده‌رفه‌تێكی زێڕینی هاتۆته‌ پێش بۆ ئه‌وه‌ی بۆ یه‌كه‌مجار له‌ مێژووی خۆیدا بگاته‌ ڕیزی یانه‌ نایابه‌كان و خه‌ونی چه‌ند ساڵه‌ی هانده‌رانی ئه‌و ده‌ڤه‌ره‌ ببێت به‌ ڕاستی.
 یانه‌كه‌ی میری سۆران له‌به‌رده‌م ئه‌ركێكی مێژوویدایه‌ و به‌هیوای بردنه‌وه‌ و گه‌یشتن به‌ ڕیزی یانه‌ نایابه‌كانی گه‌شتی شاری كه‌ركووكی كردووه‌، یانه‌ی خاكیش به‌ پێچه‌وانه‌ی سۆران هیچ ئومێدێكی نه‌ماوه‌و له‌ 5 یاری ڕابردویشدا نوێنه‌ره‌كه‌ی كه‌ركووك ته‌نیا یه‌ك خاڵی هه‌یه‌، ئه‌گه‌رچی خاك له‌ قۆناخی یه‌كه‌مدا به‌ ئاستێكی به‌رز ده‌ركه‌وت و به‌ پله‌ی یه‌كه‌می كۆمه‌ڵه‌كه‌ی گه‌یشته‌ چوارگۆشه‌ی زێڕین، به‌ڵام یانه‌كه‌ نه‌یتوانی به‌رده‌وامی به‌و ئاسته‌ی بدات و ئه‌مڕۆ به‌هیوای ئه‌وه‌یه‌ یه‌كه‌م بردنه‌وه‌ له‌ چوار گۆشه‌ی زێڕین تۆمار بكات و تۆڵه‌ی یاری چوون له‌ سۆران بكاته‌وه‌، كه‌ دوو گۆڵ به‌رانبه‌ر به‌ گۆڵێك پێی دۆڕا بوو.
 ئه‌گه‌ره‌كانی سه‌ركه‌وتنی سۆران به‌م شێوه‌یه‌ ده‌بن، بردنه‌وه‌ به‌ هه‌ر ئه‌نجامێك سۆران به‌فه‌رمی ده‌گه‌یه‌نێته‌ ڕیزی نایاب، دۆڕانی سۆران و بردنه‌وه‌ یان یه‌كسان بوونی گاره‌ له‌گه‌ڵ سیروانی نوێ سۆران ماڵئاوای ده‌كات، یه‌كسان بوونی هه‌ردوو یارییه‌كه‌یش جیاوازی گۆڵ یانه‌ی سه‌ركه‌وتوو شان به‌ شانی سیروانی نوێ ئاشكرا ده‌كات، دۆڕانی سۆران و گاره‌ به‌ جیاوازی گۆڵ یانه‌ی براوه‌ دیار ده‌بێت.
بۆ زانین یاریزانی یانه‌ی خاك (عه‌لی حوسێن) به‌ تۆماركردنی 9 گۆڵ تاكو ئێستا گۆڵكاری خوله‌كه‌یه‌، هه‌ردوو یاریزان دیار ئه‌حمه‌د له‌ یانه‌ی ڕزگاری و گۆران قادر له‌ یانه‌ی كۆیه‌ به‌ 5 گۆڵ له‌ پله‌ی دووه‌م دێن، به‌ڵام یانه‌كانیان له‌ خوله‌كه‌ نه‌ماون و ماڵئاواییان كردووه.‌

ڕیزبه‌ندی یانه‌كان دوای كۆتایی یارییه‌كانی گه‌ڕی چواره‌م
1- سیروانی نوێ 5 یاری 10 خاڵ
سۆران 5 یاری 8 خاڵ 2-
- گاره‌ 5 یاری 8 خاڵ 3
4- خاك 5 یاری 1 خاڵ

 

هێمن ئەسكەندەر - هەولێر

© 2017 Hawler