ئازار 22, 2019

سەمیر جەمال ڕەشید: لایەنە پەیوەندارەكان وەك پێویست ئاوڕێكیان لەو وەرزشە نەداوەتەوە

وەرزشی (ئاسمانی) لە كوردستان وەرزشێكی تازەیە و دەگمەنە و كەم وەرزشوان دەتوانێ خۆی لەقەرە بدات و وەك ئەستێرەیەكی پرشنگدار دەربكەوێ كە یەكێك لەوانەی تەمەنێكی دوور و درێژی لەو وەرزشە بەسەر بردووە ناوبژیوانی نێودەوڵەتی ( سەمیر جەمال ڕەشید) ە وەك خۆی دەڵی: هەر لە منداڵیەوە خولیای ئەو وەرزشە بوومە و حەزمكردووە خۆمی تێدا بدۆزمەوە، بەڵام لە ساڵی 1979 بە شێوەیەكی فەرمی هاتمە نێو ئەو وەرزشە و هەر خۆشم ئەو وەرزشەم هێنایە هەرێمی كوردستان و خۆشبەختانە یەكەمین تیمی (پەڕەشوتەوان) م لە شاری سلێمانی داهێنرا و لە یەكەمین پاڵەوانیەتی لە ساڵی 1980 بەڕێوەچوو تیایدا پلەی یەكەممان بەدەست هێنا، هەروەها لە ساڵی 1984 بووم بە ئەندامی هەڵبژاردەی عێراق و لە ساڵی 1987 بووم بە یەكەمین ڕاهێنەری كورد لەو بوارەدا و بەردەوام بووم لەسەر كارەكەی خۆم و چەند بڕوانامەیەكی بیانی بەرزم بەدەستهێنا بەهۆی بارودۆخی سەختی خێزانیم ناچار بووم لە ساڵی 2000 ڕوو بكەمە هەندەران و لە وڵاتی بەریتانیا و لەوێش وازم لەو وەرزشە نەهێنا تا ساڵانی 2006 گەڕامەوە هەرێمی كوردستان، سەرباری، جگە لەوەی یەكەمین ناوبژیوانی نێودەوڵەتیم لە بواری ( پەڕەشوتەوانی) لەسەر ئاستی كوردستان، بەڵام ساڵی 2007 بەیەكجاری گەڕامەوە كوردستان و لەوساوە لە شاری هەولێر نیشتەجێمە، لەبەر ئەوەی زۆر هۆگری ئەو وەرزشە بووم توانیمان لەگەڵ چەند برادەرێك یەكەم یانەی ئاسمانی بە ناوی یانەی هەولێری ئاسمانی دابەمەزرێنین كە خۆم ئەمینداری گشتیی یانەكە بووم، خۆشبەختانە ساڵی 2010 هەڵبژێردرام بۆ خولێكی تایبەتی بۆ ناوبژیوانی نێودەوڵەتی ئاسمانی كە لە وڵاتی سعودیە بەڕێوە چوو كە وانەكانی لەسەر ئاستی جیهانی بوو توانیم بڕوانامە بە پلەی نایاب بەدەست بێنم.

وەرزشی ( پەڕەگلایدەر – پەڕە ماتۆر) چییە؟
 ئەو وەرزشوانە بە ئەزموونە سەبارەت بە ناساندنی وەرزشی (پەرەگلایدەر –پەڕە ماتۆر) دەڵێ: ئەو وەرزشە بەشێكە لە وەرزشی فڕۆكەوانی ئاسمانی و بۆ یەكەمین جار ساڵی 2009 هاتە كوردستان و یەكەمین خولی فڕۆكەوانی (پەرەگلایدەر ) بۆ لاوانی كوردستان لە یانەی هەولێری ئاسمانی كرایەوە و لە ڕۆژی 28 ی مایسی ساڵی 2015 یەكەمین پاڵەوانیەتی پەرەگلایدەر لە كوردستان و عێراق لە چیایی هەیبەت سوڵتان بۆ ماوەی سێ ڕۆژ بەڕێوەچوو كە 12 فڕۆكەوان بۆ هەڵبژاردەی فڕۆكەوانی(پەرەگلایدەر) عێراق دەستنیشان كران، منیش وەك سەرۆكی ناوبژیوانانی نێودەوڵەتی لەو پاڵەوانیە بەشداریم كرد و توانیم ڕۆڵی كاریگەر و وەرزشیانەی خۆم ببینم و ببمە جیگای ڕەزامەندیی هەموو لایەك.

مێژووی ئەو وەرزشە لە كوردستان
هەر لە درێژەی قسەكانیدا ناوبژیوانی نێودەوڵەتی (سەمیر جەمال) دەڵێ: ئەو وەرزشە ساڵی 1979 بۆ یەكەمین جار لە كوردستان ئەنجامدرا كاتێ لێژنەی ئۆڵۆمپی عێراق سەرپەرشتی یەكێتی ناوەندی ئاسمانی عێراقی دەكرد و یەكەمین خولی (پەڕەشوتەوانی) لە شاری سلێمانی كردەوە، ئێمە چەند گەنجێك بووین لەو خولە بەشدار بووین كە ماوەی 3 مانگی خایاند، دواتر لە ساڵی 1980 یەكەمین تیمی(پەڕەشوتەوانی) مان لە ڕێگەی هەڵبژاردنەوە دامەراند كە بریتی بوو لە شەش كوڕ و شەش كچ ئەوكاتەش یەكەمین پاڵەوانیەتی (پەڕەشوتەوانی) لە شاری بەغدا بەڕێوەچوو كە ئێمە هەموومان كورد بووین و تێدا نوێنەرایەتی كوردستانمان دەكرد لە ئەنجامدا پلەی یەكەممان بەدەستهێنا، بەڵام بەداخەوە ئەو كات بەهۆی شەڕی عێراق و ئێران ئەو وەرزشە پاڵەپەستۆیەكی زۆری خرایە سەر و وەستێنرا.

چالاكی و بەشداریكردنەكان
ناوبژیوانی نێودەوڵەتی ( سەمیر جەمال ڕەشید) سەبارەت بە كار و چالاكی و بەشداریكردنەكانی دەڵێ: سەرباری سەرپەشتیكردن و دامەزراندنی یانەی ئاسمانی هەولێر و هەوڵو كۆششەكانم وەك خاوەن ئەزموونێك لە بواری (پەڕەشوتەوانی) ساڵی 2010 لەلایەن یانەكەمەوە هەڵبژێردرام بۆ بەشداریكردن لە یەكەمین خولی ناوبژیوانی نێودەوڵەتی كە لە وڵاتی عەرەبی سعودی كە بەسەرپەرشتی یەكێتی نێودەوڵەتی ئاسمانی – FAL بەڕێوەچوو، ئەوەبوو لەو خولەدا پلەی نایابم بەدەستهێنا، هەروەها لە شەش پاڵەوانیەتی نێودەوڵەتی وەك ناوبژیوان لە وڵاتانی سعودیە و میسر و ئیمارات بەشداریم كردوە و لە هەر هەموو بەشداریكرنەكانمدا بڕوانامەم پێ بەخشراوە، پاشان لە ساڵی 2014 شەڕەفی ئەندامیەتی یەكێتی نێودەوڵەتی ئاسمانی – FAL پێ بەخشرا، من لە ساڵانی 2011 و 2012 و 2013 لە چەندین پاڵەوانیەتی لە وڵاتانی فەرەنسا و نەمسا و ئیتاڵیا بەشداریم كردوە و ڕۆڵی دیار و بەرچاوم لەو وەرزشە بینیوە، هەروەها ئەگەر هاوكاری و پاڵپشتی بكرێم ئامادەم بە شێوەیەكی بەردەوامیش بایەخ و گرنگی بەو وەرزشە بدەم، چونكە من بە شێوەی خۆبەخشانە سەرۆكی فەخری یانەی هەڵۆكانی ئاسمانی سلێمانی و جێگری سەرۆكی ڕێكخراوی (پەرەگلایدەر یپەڕە ماتۆر) بووم، ئێستاش بەڕێوەبەری ناوەندی تایبەتمەندی فڕۆكەوانی باڵی ئازادم.

خواست و داواكاری
لە پاڵ خستنە ڕووی هەموو ئەو كار و چالاكیانە و ناساندنی كەمێك لەو وەرزشە، دوا جار ناوژیوانی نێودەوڵەتی ( سەمیر جەمال ڕەشید) دەڵێ: بەداخەوە دەڵێم لایەنە پەیوەندارەكان وەك پێویست ئاوڕێكیان لەو وەرزشە نەداوەتەوە، هەروەها دوای ئەزموونی 37 ساڵیم لەو بوارە گرنگەدا كەچی وەك پێویست هیچ ئاوڕێك لە خودی منیش نەدراوەتەوە تەنانەت مووچەیەكی مانگانەشیان پێ ڕەوا نەبینیوم كە بتوانم وەك مرۆڤێك ژیان و گوزەرانی خۆم و خێزانەكەمی پێ بەڕێوە ببەم كە من لە ئێستادا لە خانووی كرێ ژیان بەسەر دەبەم و بە شانازیەوەش دەڵێم خاوەنی دوو برای شەهیدم كە ئەو دوو برایەم لەسەر ڕێبازی پیرۆزی پارتی و بارزانیی نەمر خوێنی خۆیان بەخشیوە.

 

محەمەد سەعید كوردە - هه‌ولێر

© 2017 Hawler