ئەم پەڕەیە چاپ بکە

ئاسۆ دوای ساڵانێك خۆ حەشاردان لە گوند و لادێكان بە نامورادی و كوردستان جێ دەهێلێت!

زۆربەی چیرۆكە كۆمەڵایەتیەكان كە ڕۆژانە پەڕاوی ڕۆژنامە و گۆڤارەكانی داگیر دەكەن، بریتین لە چەند سیناریۆیەكی دروست كراو، تەنانەت زۆرجار دەبن بە خامی فیلمێكی سینەمایی و ویژدانی خەڵك دەهەژێنن، بەتایبەت لە كوردستانی خۆمان، كە زۆرجار چیرۆكی ئەوینداران دەبێت بە هەوێنی بەرهەمە هونەرییەكان، بەڵام هەندێ ڕووداو ڕوودەدەن بێ ئەوەی كەس بە دێڕێكیش لەسەر ئەو ڕووداوە بنووسێت و خاوەن سكاڵا و تاوانباریش ناتوانن بگەن بە سزا و حەقی خۆیان، (ئاسۆ داود محەمەد ئەمین)، ناوی كوڕە گەنجێكی خێر لەخۆ نەدیووی ئەم كوردستانەیە، كە ماوەی پتر لە هەشت مانگ كەوتە داوی خۆشەویستی كچێكی ژیكەڵانە بە ناوی (گەشبین عەلی ئەحمەد)، كە لای هەردووكیان وابوو، لە ڕێگەی ئەو خۆشەویستیەوە دەتوانن ژیانێكی پڕ لە بەختەوەریی پێكبهێنن، بەڵام ئەوەی كە پێشبینی و نەخشەیان بۆ دادەڕێشت بە تەواوەتی پێچەوانە بوویەوە و ئاییندە و دواڕۆژی ئەو ئەو خۆشەویستیە كەوتە دەستی قەدەرەوە و (ئاسۆ)ـش بە نامورادی و بە كەساسی لە لادێ و شارەكانی كوردستان و لە وڵاتی دایك ئاوارەبوو بەرەو شوێنێكی نا دیار، جگە لە جێهێشتنی دەیان گرفتی كۆمەڵایەتی لە دوای خۆی بەهۆی كەوتنە داوی ئەو خۆشەویستیەوە، سەربووردەی ئەو چیرۆكەش تەنیا لە دڵڕەقی باوكی كچەكەیەوە كە نەیهێشتن ئەو دوو خۆشەویستە بەیەك بگەن دروست بوو، تا ئەوساتەی دوو خۆشەویستی لەیەكتر ترازاند.
چیرۆكێكی ڕاستەقینە!
وەك هەموو گەنجانی ئەم وڵاتە كوڕە لاوێكی تازە هەڵكەوتوو، كە تەواوی ژیانی بە چەند قۆناغێكی سەختدا تێدەپەڕێ، تەنانەت بە بڕوای (ئاسۆ) هەڵبژاردنی خۆشەویستەكەی دەبێتە دوا وێستگە بۆ دووركەوتنەوە لە ئازارەكانی ژیان كۆتایی هێنان بە خەمەكان، نزیك بوونەوە لە دنیای ڕۆمانسیەت و تێكەڵ بوون بە عەشقێكی پاك و نەخشە دانان بۆ پێكهێنانی ژیانی هاوسەرگیری خۆی لەگەڵ كچە شۆخێك بە ناوی (گەشبین)، بەڵام خەونەكەی ئاسۆ بوو بە چیرۆكێكی تراژیدی و جارێكی تر ئاسۆ بە ئەویندارەكەی نەگەیشت!.
تەنیا 8 مانگ
ئەگەرچی (ئاسۆ) خەونی جوانی لە خەیاڵی خۆی گەڵاڵە كردبوو، هەموو ڕۆژێكیش بەو خەونەوە چاوی بۆ ڕۆژێكی نوێ دەكردەوە، كە خۆشەویستیەكەیان نزیك ببۆوە لە 8 مانگ، كە هێشتا تەمەنی ئەو خۆشەویستیە كەم بوو، بەڵام خەونی گەورەیان هەبوو، كە بتوانن بە یەك بگەن، بەڵام نەیانزانی بە ترازان كۆتایی بەو خەونە دێ.
باوكێكی دڵڕەق
هەرچەندە ئەوان بڕیاریاندا بوو، كە ژیانێكی بچووك بەیەكەوە گرێبدەن و ئیدی بۆ یەك بژین، بەڵام دڵڕەقی باوكی (گەشبین)، كۆتایی بە هەموو خەونەكان هێنا و لە پێكهێنانی ژیانێكی نوێوە بۆ لەیەكتر ترازان، چونكە باوكی ئەو كچە هەمیشە ئەوەی ڕەت دەكردەوە كە بە خوازبێنی ئاسۆ ڕازی بێت و خزمەیاتی لەگەڵ ئەو كوڕە بكات، ئەمەیش تەنیا بەهۆی زانینی خۆشەویستی نێوان كچەكەی و ئەو كوڕەوە بوو، بەڵام سووربوونی ئەو جووتە خۆشەویستە گەیشتە لووتكە و بڕیاریاندا ئەگەر بۆ یەكیش نەبن دەبێت بەیەكەوە بمرن!.
لە گوند و لادێ حەشاردا
دوای بێ هیوا بوون لە گەیشتن بە خۆشەویستەكەی و سووربوونی هەردوولا، بەیەكەوە ژوانێكیان بەست، كە تێیدا بڕیاری ڕاكردن و جێهێشتنی ناوچەكەی خۆیاندا، تا ئەو بگەن بە شوێنێكی ئارام و لەوێ درێژە بەو خۆشەویستیەوە بدەن، بەڵام لەوێشدا نەگەیشتن بە حەسرەت و خەونەكانی خۆیان دوای مانەوەیان لە گوندێكی نزیك لە ناوچەی باڵەكایەتی و ئاشكرابوونی شوێنەكەیان، كە لە نێو كۆمەڵگەی كوردەواری دا هەر كچێك ڕەدوو كەوت، چارەنووسی بە كوشتن كۆتایی دێ، بە ناچاری ئاسۆ و گەشبین كوردستانیان بە نامورادی جێ هێشت و بەرەو ڕێگەی مان و نەمان و بەبێدەنگی و خودا حافیزە بۆ شوێنێكی نادیار وڵاتیان جێهێشت

 

شیڤان شێرزاد- هه‌ولێر
.