تشرینی یەکەم 20, 2020

حەز و ئارەزووەكانم دیاری دەكرێن

نەسرین حەسەن

 

لەكاتی منداڵیمدا بەشی زۆری كاتەكانم بە یاری ساپ ساپێنی، هەلماقۆینێ، راكردن و چەندین یاری تربە سەر دەبرد و هەموو كاتیش هەوڵم دەدا بیبەمەوە و كاتێكیش سەردەكەوتم زۆر هەستم بە خۆشی دەكرد، جاروباریش هەندێ لە دراوسێكان بە تایبەتی "پور مریەم " پێی دە گوتم،" كچێ! ئەوە پێت عەیب نییە بەو تەمەنەوە هەر هەڵدەبەزیەوە، وەختی مێردت هاتووە"، بەدەست خۆم نەبوو زۆر جار بەو قسانە دڵگران دەبووم .
كاتێك كەسێك لە ناخەوە هەست بە ئازار دەكات كاردانەوەی لە جەستە و هەڵسووكەوتی رۆژانەی دەردەكەوێت ئەو هەستە دەروونیانە زۆر جار دەبنە بەربەست لە بەر دەم توانا و بیركردنەوەكانی مرۆڤ، ئەوەش كاریگەری سلبی لە سەر هەموو ژیانی دادەنێت، مرۆڤ هەر چەندە بە توانا بێت ئەگەر نەتوانێ بە سەر گرێ دەروونییەكانیدا زاڵ بێت ئەوە دەبنەهۆكارێك بۆ ئەوەی بیرتەسكانە رووبەرووی ژیان بێتەوە و ئاستەنگی زۆر دێتە سەر رێگەی سەركەوتنەكانی، ئەو حاڵەتەش زیاتر لە ئافرەتدا بەدی دەكرێت. "د. لیندا ئاستین" مامۆستای دەرونناسی لە كتێبی " ئافرەت بۆچی پێش ناكەوێت" دەڵێ: لەوە دڵنیام ئەگەر بەربەستە دەروونییەكان رێگا لە سەركەوتنی ئافرەت بگرن، زۆر بەزەحمەت دەتوانێ بەربەستە دەرەكییەكان لە خۆی دوور بخاتەوە، ئەگەر ئافرەتێك نەتوانێت لە دەرووندا خۆی وەكو كەسێكی گەورە و سەركەوتوو ببینێت، بەرەبەرە لە داخوازیەكانی كەم دەكاتەوە و ململانی لەگەڵ ئەو شتانە دەكات كە رێگرن لە بەردەم گەشەسەندنی تواناكانی و كەمتر بایەخ بەو دەرفەتانە دەدات كە دەبنە هۆی سەركەوتنی، ئافرەت لەو كاتەدا هیچ كات ناگاتە ئەو خاڵەی كە دەرگایەك بە روویدا بكرێتەوە كە بەرەو سەركەوتنی بەرێت، لە بەر ئەوەی لە دەرگایەكیتر چۆتە ژوورەوە كە بەرەو هەڵدێری دەبات.پێچەوانەی ئەو حاڵەتەش ئەو ئافرەتانەن كە زۆر بە ئاسانی توانیویانە بە سەر بەرەبەستە دەرونییەكانیاندا زاڵ بن وئەو بەربەستانەش بوونە هۆكارێك بۆ ئەوەی رۆژانە بە هەڵبژاردنی بەرنامەیەكی رێك و پێك لە ژیاندا بەرەو پێش برۆن و لە ئامانجەكانیان نزیك ببنەوە و خاوەنی پێگە و كەسایەتییەكی بەهێز و سەركەوتووبن لە كۆمەڵگەدا.
"مارگریت مید" دەڵی:" كۆمەڵگە، حەز و ئارەزووەكانی ئافرەت دیاری دەكات، نەك سروشت" .كەواتا بنەمای ئەو كێشانەی كە دەبنە هۆی دروستبوونی بەرەبەستە دەروونییەكان "من" و " پورمریەم " نین، بەڵكو كۆمەڵگەیە كە بە پێی داب و نەریت و كولتوری خۆی، هەر لەتەمەنی منداڵییەوە حەز و ئارەزووەكانمان بۆ دیاری دەكات.

© 2017 Hawler