تشرینی دووەم 18, 2019

ئەمساڵ توانیومانە 300 قوتابیی دابڕاو بـۆ پـڕۆســــــەی خوێندن بگەڕێنینەوە

بەڕێوەبەرایەتیی لاوانی هەولێر، سەر بەبەڕێوەبەرایەتیی گشتیی لاوان، ساڵانەچالاكیی جۆراوجۆر لەرێگەی بنكەكانی سنووری پارێزگاری هەولێر بۆ توێژی لاوان و ئارەزوومەندان ساز دەكات، دوای دەستبەكاربوونی بەختیار فەریق، وەك بەڕێوەبەر، چەند گۆڕانكارییەكی لەنێو بنەكەكانی لاوان ئەنجام دا بەمەبەستی پێشخستنی ئاست و توانای بنكەكان، هاوكات گرێبەستێكی گرینگی لەگەڵ رێكخراوی نێودەوڵەتی یونیسێف بۆ ماوەی یەك ساڵ واژۆ كرد بەمەبەستی بەرێوەبردنی چالاكییەكان بەهەماهەنگیی هەردوولا.
لە بارەی بەرنامەی كار و چالاكییەكانیان و دروستكردنی ئەو هەماهەنگییە، بەختیار فەریق، بە رۆژنامەی هەولێری ڕایگەیاند: ئێمە وەك بەرێوەبەرایەتیی لاوانی هەولێر، ئەمساڵ هەڵساین بەئەنجامدانی گرێبەستێك لەگەڵ رێكخراوی نێودەوڵەتی یونسێف لە ژێر ناوی (هەڵمەتێك بەرەو گەڕانەوە بۆ خوێندن)،لەم رێگەیەوە،توانیوامانە قوتابیان و ئەوانەی ماوەیەكی زۆرە لەخوێندن دابڕاون، جابەهەر هۆكارێك بێت، دووبارە بیانگەڕێنینەوە نێو پرۆسەی خوێندن، تا لە زانست دانەبڕێن و بێبەش نەبن، بۆیە بەباشمانزانی لەگەڵ ئەم رێكخراوەدا هەڵمەتێك بۆماوەی 50 رۆژ ڕابگەیەنین و لەم ماوە دیاریكراوەدا بەهەماهەنگیی هەردوولا هەوڵی جدی بدەین قوتابییەكان و توێژی لاوان و هەرزەكاران و ئەوانەی لەپرۆسەی خوێندن دوور كەوتوونەتەوە بیانگەڕێنینەوە بۆ باوەشی قوتابخانەكان، وەك قوتابیان و هاوڕێیەكانی خۆیان دەست بەپرۆسەی خوێندن بكەن.
بەختیار فەریق لەدرێژەی قسەكانیدا هێمای بۆ ئەوەیش كرد: بۆ ئەم مەبەستە لێژنەیەكمان لە20 تیم پێكهێناوە، هەر تیمێك دوو كەس لەخۆ دەگرێت لەهەردوو ڕەگەزی كوڕ وكچ،لەرێگەی ئەو تیمەوە هەوڵ دەدەین زیاتر لە1000 منداڵ بۆ پرۆسەی خوێندن بگەڕێنینەوە، ئەمساڵ بەفەرمی لەگەڵ پەروەردەی گشتی هەولێر و رێكخراوی یونیسێف رێك كەوتین لەپێنج شوێنی جیاواز هەڵمەتی گەڕانەوە بەرەو خوێندن ڕابگەیەنین، ئەو پێنج شوێنەیش بریتین لە قوشتەپە،بەحركە، دارەتوو، بنەسڵاوە، خەبات، لەماوەی دیاریكراودا هەوڵ دەدەین لەم پێنج شوێنە زیاتر لە1000 منداڵ بەرەو پرۆسەی خوێندن بگەڕێنینەوە و مافخوراو نەبن لەپرۆسەی خوێندن، ئەگەرچی لەم چەند هەفتەیەدا بەهاوكاری هەموولامان توانیومانە زیاتر لە300قوتابی بۆ پرۆسەی خوێندن بگەڕێنینەوە و دەست بەخوێندن بكەن،ئەم هەڵمەتە بەهەڵمەتێكی زۆر گرینگ و مێژوویی دادەنیم لە نێو كارو چالاكیی بەڕێوەبەرایەتییەكەمان، بەدڵنیاییەوە هەوڵ دەدەین، هەموو قوتابیانی دابڕاوی شارو شارۆچكەكانی سنوری پارێزگای هەولێر ئەم هەڵمەتەیان پێ بگات و لەكەمترین كاتدا هەموو هەوڵەكانی خۆمان دەخەینە گەڕ، تا بتوانین رێژەیەكی زۆری قوتابیانی دابڕاو بگەڕێنینەوە بەرەو پرۆسەی خوێندن.

© 2017 Hawler