ئایار 21, 2019

گوڵە نێرگز مژدەی هاتنی بەهارمان پێ دەدات

نێرگز ئەو گوڵە جوان و خۆرسكەیە كە لەوادەی خۆیدا دەبێتە میوانمان و مژدەی ڕۆژێكی نوێ و رووناكمان پێ ڕادەگەیەنێت و لەوەش وەئاگامان دێنێ كە گزنگی خۆری نوێ هەڵهات و هەموو كون و كەلەبەرێكی سەر ئەو زەمینەی بە تیشكە جوانەكەی ڕۆشن كردەوە، هەموو ساڵێك لەگەڵ هاتنی وەرزی بەهاری ڕەنگین گوڵە نێرگز پەیدا دەبن و هەر لە دوورەوە دڵ و دەروونمان ڕۆشن دەكەنەوە و جۆرێك لە ئاسوودەیمان پێ دەبەخشن بۆ ئەو گوڵە جوانییەكی ئەفسووناوی هەر لە ئەزەلەوە هەیە، هەر لەبەر خۆشەویستی ئەم گوڵەش زۆربەی دایك و باوكانی كورد ناویان لە كچەكانی خۆیان ناوە نێرگز، سەرباری ئەوەش زۆربەی شاعیر و هونەرمەندان لە شیعر و گۆرانییەكاندا ناوی ئەو گوڵەیان بە جوانترین شێوە و شێواز بردووە و بە نموونەیەكی بەرز وەسفیان كردووە، سەبارەت بە گوڵە نێرگزی بەهاران كوڕە گەنجێكی تازە هەڵچوو بەوپەڕی سەلیقەوە دەیگوت من لە وەرزی بەهاراندا بەدەست خۆم نییە زۆر دڵم بەو گوڵە جوانە خۆش دەبێت و قەستی ئەوە دەكەم هەمیشە بە بەرچاومەوە بێت، بۆیە هیوای ئەوە دەخوازم ساڵ دوانزەی مانگ بەهار بێت بۆ ئەوەی جوانی ئەو گوڵە لەبەرچاو و دیدەمان ون نەبێت، من دڵنیام لەوەی ئێمە و ئەوانەی دیكەش هەمان هەست و سۆز و خۆشەویستیمان بەرامبەر بەو گوڵە جوان و دڵگیرەی بەهارو گوڵەكانی دیكەش هەیە، بۆیە لەو بەهارە دەستە دەستە لە باوەشی دەگرین و لەهەمان كاتیش بۆ خۆشەویست و ئازیزانمان دەنێرین، لە هەمووشی بەرچاوتر ئەمڕۆ منداڵە كاسب و شت فرۆشەكانی سەر جاددە و شەقامەكانیش هەموو شتێكیان بەلاوە ناوە و دەستە دەستە گوڵی نێرگز لە ترافیك لایت و شوێنە تایبەتی و گشتییەكاندا بە بڕە پارەیەكی ڕەمزی بە خەڵكان دەفرۆشنەوە، بۆیە خەڵكانیش پەیتا پەیتا ئەو گوڵە جوانە دەكڕن و بە دیاری بۆ ئازیزانیان دەن، جگە لەوەی مرۆڤی وا هەیە هێندە گوڵی خۆش دەوێ هەر خوا خوایەتی ئەو گوڵە دەركەوێت تا تێر تێر بونیان بكەن و لەباوەشیان بگرن، گوڵفرۆشێك بەكەمێك داخەوە ئەوەی دووپات دەكردەوە كە ئەم گوڵە لای زۆرینەی خەڵكی خۆشەویستە و جێی بایەخە، بەڵام بەداخەوە تەمەنی وەك وەك تەمەنی بەهار كوورتە و هەر زوو دەبێتە میوانی ماڵ و دیدەمان و هەر بەزوویش باروبارگەی خۆی تێك دەپێچێتەوە و ماڵئاوایمان لێ دەكات، بەڵام گرنگ ئەوەی یادگاری زۆر جوان و دڵگیرمان لەلا بەجێ دێڵن كە هەرگیز لە بیر و هزرمان ناچێتەوە. 

© 2017 Hawler