تەمموز 22, 2018

كۆمەڵی مەدەنی، هێزێكی نوێ..

كۆمەڵی مەدەنی هێزێكی نوێ، ناونیشانی كتێبێكە "رێبوار یەڵدا" لە زمانی فارسییەوە وەریگێراوەتە سەر زمانی شیرینی كوردی، لە 141 لاپەڕەی قەبارە مامناوەندی پێك هاتووە، لە بەرگێكی قەشەنگ و جواندا چاپ و بڵاو بووەتەوە.
ڕێكخراوەكانی كۆمەڵی مەدەنی، ڕێكخراوی نادەوڵەتین، خەڵك ئارەزوومەندانە دروستیان دەكەن و دوور لە دەسەڵاتی دەوڵەت بەڕێوەیان دەبەن و قازانج نەویستن، بەو مانایەی كە مەبەستیان سوودگەیاندن نییە بە تاكێك یانی گرووپێك. ئەركی كۆمەڵی مەدەنی هەر تەنیا ئەوە نییە كە كۆمەڵێك خەڵك لە دەوری یەكتر كۆ ببنەوە و پێكەوە گیروگرفتە هاوبەشەكانیان چارەسەر بكەن.
ڕێكخراوەكانی كۆمەڵگەی مەدەنی هەندێك جار لە حكوومەتەكان زیاتر توانیویانە لە خەڵك نزیك ببنەوە، لەبەر ئەوەی توانیویانە پەنجە بخەنە سەر برینەكانیان ‌و كێشەكانی ژیانی ڕۆژانەیان.
ڕێكخراوەكانی كۆمەڵی مەدەنی پێویستە چاودێریی كارەكانی حكوومەت بكەن، نەك هەر ئەوەندەش، بەڵكو ڕێكخراوەكان بۆیان هەیە بەشداری لە پێشنیاز ‌و پرۆپۆزەڵی پڕۆژەكاندا بكەن.
هێشتا كەموكووڕی لە كاری ڕێكخراوەكاندا هەیە و نەیتوانیوە وەك پێویست بەشداری لە گەشەی بەردەوامی كۆمەڵگەدا ببینێت، دوو هۆكاری سەرەكی لەپشت ئەو بەرەوپێشچوونەی ڕێكخراوەكانی كۆمەڵی مەدەنییەوەن لە وەڵاتدا، یەكەمیان ئەوەیە كە یاسا كارەكانی ڕێك خستووە و ڕێگەی پێداوە بەشدارییەكی چالاكانەی هەبێت، دووەمیشیان لەسەر ئاستی جێبەجێ كردن، گرنگیدانی حكوومەتە بە ڕێكخراوەكان، ئەوەتا لە ماوەی ڕابردوودا، ئەنجوومەنی باڵای ڕێكخراوەكان لەلایەن حكوومەتی هەرێمی كوردستان دامەزرا، بەم هەنگاوانە ڕێكخراوەكان تارادەیەك چوونە پێشەوە.
هێشتا ژمارەیەكی زۆر كێشە ‌و بابەت هەن كە پێویستیان بەوەیە كاریان تێدا بكەن ‌و بەشداری لە چارەسەر كردنیاندا بكەن، هێشتا ڕێكخراوەكان لە زۆر بواردا چالاكییان نییە ‌و لاوازن.
ڕێكخراوەكانی كۆمەڵی مەدەنی ئەگەر بە ئەركی دروست و ڕاستی خۆیان هەڵسن دەتوانن كاریگەریی زۆر باشیان هەبێت لەسەر كاری حكوومەت ‌و ڕێگە گرتن لە گەندەڵیی ‌و بەرەو پێشبردنی كۆمەڵگە بەشێوەیەكی گشتی، لایەنی كەم هەر دامەزراوەیەك كە دادەمەزرێت، بەر لە هەموو شتێك پێویستە چاودێری كارەكانی حكوومەت بكات، پێشنیاز بكات، ڕەخنە بگرێت، ناڕەزایی دەربڕێت، هەروەها مانەوە ‌و بەردەوامبوونی حكوومەت مسۆگەر بكات.

© 2017 Hawler

Please publish modules in offcanvas position.