شوبات 16, 2019

هەردەمێ كورد ئێكبگرن، دڤێت چاڤەڕێیا كارڤەدانێن دوژمنێن خوە بكەن

سوهەیب میكائیل

 

باشورێ كوردستانێ جهەكێ فرە نەتەوە و ئۆل و زمانە و دهەمان دەمدا هەلگرێ هزر و دیتنێن سیاسیێ جودایە. گەلێ كوردستانێ دەهەمی قۆناغاندا پێدڤی ب ئێك رێزی و ئێكگرتنا سیاسی، ئولی، نەتەوەیی هەبویە و هەیە، تا سەقامگیریا سیاسی و ئاشتیا جڤاكی تێدا یێ پاراستی بیت و بشێت روو بڕوویێ هەمی مەترسی و گەفێن دوژمنان ببیت، دهەمان دەمدا دگەل پێشهات و گوهوڕینێن سیاسی ب سەركەفتیانە پێنگاڤان بهاڤێژیت، دهەمان دەمدا دگەل پێشهات گوهورینێن سیاسی ب سەركەفتیانە پێنگاڤان بهاڤێژیت و بەرەڤ ئەوێ ئارمانجێ بچیت ئەوا زێدەتر ژ سەد سالایە خوینا خۆ بۆ درێژیت و قوربانیێ بۆ ددەت.
هەر دكەڤندا هوزانڤان و بیرمەندێن كوردا داخواز ژ مەزنێن كوردا كرینە ئێك رێزییا ناڤ مالا كوردی بپارێزن، چونكی د دیرۆكا كورداندا ئەگەرێ سەرەكیێ بەردەست نەبونا ئارمانجا سەرەكیا كوردان نەبونا ئێكگرتنا كوردا بویە، لگورەی ئەڤێ دیتنێ هۆزانڤان و نڤیسەرا كورد رەوشەن بەدرخان دبێژیت ) تو ئێكگرتنا كوردا بدەمن، ئەزێ دەولەتا كوردی بدەم تە )
پشتی ژناڤ چونا میرنشنیێن كوردی ژ ئەنجامێ نەبونا ئێكڕێزیێ دناڤبەرا واندا، كوردان ناڤەندا بڕیاردانا سیاسی ژدەست دا، هەر ژبەرهندێ ب دەستەكێ بەتال ژ جەنگێن ئێكێ و دووێ یێ جیهانی دەركەفتن و كەفتنە ژێر دەستێ دەولەتێن زلهێزێن جیهانی و داگیركەر.
رەنگە د دیرۆكا هەفچەرخا كوردیدا، چ پەیوەندیەكێ سیاسی هندی پەیوەندیا دناڤبەرا هەرئێك ژ ( مەسعود بارزانی و جەلال تالەبانی ) سەرنج راكێش و جهێ تێڕامانێ نەبیت، پەیوەندیەك پتر ژ پێنجی سالێن بزاڤا رزگاری خوازا كوردستانا باشور پێك دئینیت، هەلبەت ئەڤ پەیوەندییە ب گەلەك هەڤراز و نشێڤیان و دناڤبەرا توندو تیژیێ و دۆستایەتیێ دا دەرباز بویە، پەیوەندییەك كو دێشێین دیرۆكا میللەتەكێ ئێك نەگرتی تێدا بخوینین دەمێ دڤێت هەڤ دوو بگرن، دڤێ هەڤكێشەیا ئالۆز و دویر و درێژا ئیكگرتنا نەتەوەیەكێ دا، هەر ئێك ژ بارزانی و تالەبانی وەك سەركردەیێن دوو حزبێن سەرەكی ل باشورێ كوردستانێ دكەڤنە پەیوەندییەكا سیاسی و كەسی یا دویر و درێژ، ئەڤان هەردوو سەركردەیان ب وێ لێك تێگەهشتنا دناڤبەرا واندا هەی شیان گەلەك دەسكەفتان بۆ كورد و كوردستانیان بدەستڤە بینن و باشورێ كوردستانێ بكەنە هژمارەكا گران و كاریگەر و خودان سەنگ د هاوكێشەیا نێڤدەولەتیدا . لێ پشتی وەغەرا ( جەلال تالەبانی ) ئەڤ پەیەیوەندییە لاسەنگ بوو، ئیدی ناڤەندەكا بریاردانا بهێز دناڤ ئێكەتیا نشتیمانیدا دروست نەبوو، جەندین بالێن جودا دروست بوون . ئیدی بۆ ( مەسعود بارزانی ) رێككەفتن دگەل ئێكەتیا نشتمانی بزەحمەت كەفت؛ چونكی دگەل بالەكێ رێككەفتبا بالێن دی پێگیر نەبوون ب وێ رێككەفتنێ، هەر ئەڤەژی بو ئەگەرێ رویدانا خیانەتا 1٦ ی ئۆكتۆبەرێ.
دناڤ رێزێن سەركردایەتیا سیاسیا كوردیدا هێشتا مە گەلەك سەركردە هەنە كو د خەما ئێك رێزییا كورداندانە و، بەهایێ یەكڕیزی دزانن، ژوانا نێچیرڤان بارزانی سەرۆكێ حكومەتا هەرێمێ، بۆ مینا من دڤێت ئاماژێ بدەمە دوماهیك گوتارا وی دەربارەی گرنگیا ئێكڕێزییا ئالیێن كوردستانێ . سەرۆكێ حكومەتا هەرێمێ ل مەراسیما بیرئانینا شەهیدێن ئێكی شوباتا (200٤) ێ گوتارەك پێشكەش كر و تێدا راگەهاند: تیرۆرستان د ئێك دەمدا هەردوو بارەگایێن ئێكەتیا نشتیمانی و پارتا دیموكراتا كوردستنانێ كرە ئارمانج و د وێ رویدانێدا (101) سەركردە و پێشمەرگەیێن هەردوو ئالیان شەهید بوون.
هەروەسا نێچیرڤان بارزانی گۆت ئەم بیرئانینا روداوەكا ئاسایی ناكەین، بەلكو یادا تێكەلبونا خوینا پێشمەرگە و سەركردەیێن پارتی و ئێكەتیێ دكەین و ئەو راستی ژی دەركەفت كو دوژمنێن مە چ جوداهیێ دناڤبەرا مەدا ناكەت و دڤێت ئەمژی بینینە بیرا خوە كو پێدڤیە ئێكڕێزیا دناڤبەرا خوەدا بپارێزێت، وەكی دیار گوتارا سەرۆكێ حكومەتا هەرێمێ هندەك دەستەواژەیێن بالكێش تێدابوون ب تایبەت بیر ئینانا هندێ كو بۆ سەرخستنا كوردستانێ خوینا پارتی و ئێكەتیێ تێكەل بویە و رونكر كو پارتی دڤێت هەڤبەشێ خۆ یێ چەندین سالا پێكڤە د حوكمڕانیێ دا پشت راست بكەت كو یێ جدییە دگەل وان حكومەتێ پێك بهینیت و ب زوترین دەم كێشەیێن نافخۆیی ب داوی بینن و جارەكادی دگەل پارتی ملێ خۆ بدەنە بەر بەرپرسیاریەتێ و قۆناغا داهاتی بڕێڤە ببەن .
خویایە بەری ڤێ گوتارێ د مەدیایێن كوردیدا بەحسێ هەبونا هندەك ئاستەنگان د هاتنە كرن كو ببونە رێگر لهەمبەر كۆمبونا هەردوو ئالیان بۆ پێك ئینانا حكومەتێ . لێ ئەڤ گوتارا نێچیرڤان بارزانی شیا زەمینەیا كۆمبونێن دناڤبەرا ئێكەتی و پارتی بۆ پێك ئینانا حكومەتەكا نوو خۆشتر بكەت . و بو ئەگەرێ هندێ كو ل دوماهیك كۆمبونا هەردوو ئالیان بەروارێ (18) ی ڤێ مەهێ هات دەست نیشانكرن بۆ كۆمبونا پەڕلەمانێ كوردستانێ و هەلبژاردنا دەستەیا نوو یا سەرۆكایەتیا پەرلەمانێ كوردستانێ .
هەلبەت ئەو نا تەباییا سیاسی كو دناڤبەرا ئالیێن سیاسیێن كوردستانێ دا هەی، ئەگەر ب شێویەكێ شارستانی و د چارچۆڤا یاساو دەستورێ وەلاتی دا و ب شێوەیەكێ تەندروست ململانێیا سیاسی دناڤبەرا ئالیاندا بهێتە كرن تشتەكێ خوەزایە دناڤ پرۆسەیا دیموكراسیێ دا . لێ بەرەڤاژی و تەڤلهەڤ كرنا وان دگەل بابەتێن نشتیمانی و چارنڤیسساز، دبیتە ئەگەرێ زێدەتر ژ هەڤ دویركەفتنا ئالیێن سیاسی و چارەنڤیسا گەل و وەلاتی دئێخیتە د مەترسیێ دا . ژبەرهندێ پێدڤیە ئالیێن سیاسی بێ جوداهی هەست ب ڤێ بەرپرسیاریەتێ و دۆخێ سیاسیا باشورێ كوردستانێ بكەن.
ئانكو ئەڤڕۆ هەبونا ئێك گوتاریا نشتیمانیا كوردی بۆ تێپەڕاندنا ئەڤێ قۆناغا هەستیار زەرورەتەكێ حاشا هەلنەگرە . ئەڤرۆ رۆژا هندێ یە ئالیێن سیاسیێن كوردستانێ ئێك دەنگ و ئێك هەلویست بن لهەمبەر ئەوان گوهۆرینێن نها ل دەوروبەرێن مە رووددەن".

© 2017 Hawler