تەمموز 20, 2019

شێرزاد عەبدولڕەحمان

 

•جوانترین مرۆڤەكان، ئەو كەسانەن كە زۆر بەبێدەنگی كار دەكەن، ئەو كەسانەی كە بە ئەشق و خولیابوون و شەونخوونی مامەڵە لەگەڵ وشەدا دەكەن، ببڕای ببڕیش چاوەڕوانی دەستخۆشی و مەرحەبا و ستایش لەكەس ناكەن، بەڵكو كاتێك بەشداری لە داهێناندا دەكەن، لە ناخی خۆیاندا هەست بە بەختەوەری دەكەن نەك روخسارە رووكەشەكان، كە زۆر جار دەبێتە مایەی لەباربردنی كاری داهێنان كە بووە بە خەسڵەتێكی ئەم سەردەمە و داهێنەرانی بێتاقەت كردووە.
•بەرامبەر بەوە، خەڵكانێك پەیدا بوون، كە كاریان تەنیا قسەكردنە، زۆر هیلاكن بۆ ئەوەی هەمیشە قسە بكەن، دەیانەوێ بەتاڵیی خۆیان بە قسەی رووت پڕ بكەنەوە، بۆ ئەوەی بە خەڵك بڵێن ئێمەش هەین، هەر خۆشیان پەیوەندی بە میدیاكانەوە دەكەن و دەڵێن، كاكە قسەی نوێمان هەیە!، كەچی كە دەردەكەون قسەی پاروپێرار دووبارە دەكەنەوە بێئاگان لەوەی ئەمڕۆ لە دنیادا روو دەدات!
•لە سلێمانی، قسەیەكی زۆر خۆش هەیە كە دەڵێن: خۆی خستووەتە بازاڕەوە! ئەوەیان ئەو كەسانە دەگرێتەوە كە بە هەرزانی كەسایەتیی خۆیان دەكەنە قوربانی، لەوانەش حەزی دەركەوتن كە حەزێكی هەرزەكارانەیە و هیچ لە بەخشش و گەورەیی مرۆڤ زیاد ناكات، بگرە هەندێك جار زۆر و بۆریی دەركەوتن دەبێتە مایەی ناشیرنكردنی دەموچاوەكان.
•ئێمە هەر هەموومان كۆمەڵگەیەكین حەزمان لە قسەیە، بەڵام كارەسات لەوەدایە بەشێكی خەڵكی هەر هیچیان نییە بێجگە لە قسە چونكە هیی وا هەیە رۆژ هەتا ئێوارە باسی سیاسەت دەكا ناشزانێ وشەی سیاسەت لە چییەوە هاتووە، هەیە خۆی بە شۆڕەسواری رۆژنامەگەریی كوردی دەزانێ، كەچی تا ئێستاش نازانێ یەكەم رۆژنامەی كوردی لە كوێ دەرچووە!
•هەشە كاتێك دەبێتە میوانی بەرنامەیەك، دەرهێنەر داوای لێ دەكات بۆ ژێر تایتڵ بە چ ناوێك ناوی بێنێت، یان چی بنووسێت، ئەویش كە خۆی لەبیر بردووەتەوە، زۆر بە ئاسانی بێباكانە و هەر لۆ فشەی دەڵێـت: بنووسە (رووناكبیری ناسراو)!!

© 2017 Hawler