تشرینی دووەم 16, 2018

گەڕانەوە بۆ خــــاڵی دەستپێک

هەورامان علی تۆفیق

 

ڕەوتی سیاسی کورد وەک یاری مارو پەیژەیەک دەچێت لە خاڵی پێش کۆتایی گەڕانەوە بۆ ئەو خاڵەی دەبێ دەست پێبکاتەوە . دەست پێکردنەوەیەک لە خۆکۆکردنەوە و رێکخستنەوە و هەستانەوە سەرپێ بۆ هەنگاونان بەرەوسەرکەوتنەوە، ڕوداوە سیاسیەکان و پێشهاتەکان لە گۆرەپانی سیاسی هەرێم و عێراقدا پەیوەست بەیەکن بەجۆرێک کاریگەری تەواویان لەسەر یەک هەیە، بەوپێیەی کورد لە بازنەی چونە دەرەوەی عێراق هێنرایەوە نێو بازنەی عێراق بەو زیانانەشەوە کە لێیکەوت کاریگەری تەواوی لە دەرەنجامی هەڵبژاردنەکانی هەرێمی کوردستان بەدیارکەوتن و سەلماندی هەستی نەتەوەیی و خواستی جیاخوازی لە پێشەوەی داخوازیەکانن، بەو سەلماندنەی کورد تانەبیتە خاوەن دەوڵەت هەمیشە لەم گێژاوەسیاسیانەدا دەبێت و بەردەوام کێشەکان وەک دروشمەکانی هەڵبژاردن دووبارەدەبنەوە و یاری مارو پەیژەکە بەردەوامی دەبێ و خەڵک ناحەسێتەوە و هەمیشە گرفت وکێشەو کەموکوریەکان بوونیان دەبێ و شتێک بەناوی ئارامی و ئایندە و مافی تاک و دادپەروەری و ژیانی شایستە بوونی نابێت و سەرکەوتنیش دەبێتە ئاوخالە چەقبەستووەی کورد خەوی پێوەببینێ .
کاتێک کورد بیر لەو سەرکەوتنە دەکاتەوە هەنگاوەکان لە ڕێڕەوی ڕاستیدابن بۆ بەدەست هێنانی دەستکەوتە نیشتمانیەکانی هاوڵاتیان، لە لایەکی دی دەستەبەرکردنی خۆشگوزەرانی و ژیانێکی شایستە بە هاونیشتمانیان و تاڕدەیەک بەلەبیرکردنی خەمەکانی ڕابردوو .
ئەمەش ئەرکی تەواوی پێکهاتە سیاسیەکانی بەزۆرینەو کەمینەوە بەسەرکەوتوو و شکستخواردوەوە، چونکە ئەزمونی ڕابردوو ئەوەی نیشانداین هەڵەو کەموکوڕی زۆربوون و ململانێ و یەکترشکاندن و دژایەتیەتی و رق لەیەک بوون و یەکتر شکاندن دەرەنجامی نابێ و دواتر خەڵک لەوەش بێزاربووە .
پارتی وەک لایەنی براوە لە چوارساڵی داهاتوو ئەرکی قورس تر دەبێ . کەواتە متمانەی دەنگدەران و هیوای خەڵک ئەوە بەسەر پارتیدا دەسەپێنێ بە دەستە بەرکردنی چوارساڵی ئارامی و هیواو بوژاندنەوە و گەڕانەوەی متمانە و هەنگاوی دروست بۆ چارەسەرکردنی هەڵەکانی ڕابردوو .
کۆتایی هێنان بەهەندێ کۆسپ لەڕێگای کاری سیاسی لەوانە یەک خستنەوەی هێزەکانی پێشمەرگە و دروستکردنی هێزێکی نیشتمانی یەکگرتوو، پێموایە ئەمە دەبێتە یەکەم هەنگاوی سەرکەوتوو بۆ بەدەست هێنانی ئامانجە نەتەوەییەکان، دواتر گوزەرانی خەڵک لەباشکردنی ژیان و چاککردنی سیستەمی تەندروستی، لەژیانی مرۆڤدا دووشت گرنگن تەندروستی و دواتر ئارامی ژیان و هیوا بۆ ئایندە، گەر ئەم لایەنەی ژیان دەستە بەرکرایە ئەوا دەکرێ هانگاوکارو بەرنامەکانی دی لە سێکتەرەکانی تری ژیاندا ڕێچکەی خۆیان بەشێوەیەکی تەندروست بگرن ..
ناکرێت بەڵێنەکان زۆربکرێن ودواتریش هیچیان نەیەنەدی و بۆ هەڵبژاردنەکانی داهاتووش هەمان بەڵێن و دروشم دووبارەبکرێنەوە، چونکە لە دوایی ڕاپەڕینەوە لە هەموو هەڵبژاردنەکاندا درووشمەکان هەمیشە دووبارە بوون و بەردەوام گەڕانەوەبووە بۆ خاڵی دەستپێک .

© 2017 Hawler