تشرینی دووەم 16, 2018

شێرزاد عەبدولڕەحمان

 

• لەسەروبەندی گۆڕانكارییەكانی حكومەت و ئەگەری گۆڕینی هەندێ پۆست و بەرپرس لێرەو لەوێ، هەندێ بەرپرس میزاج و زەوقیان بە ڕادەیەك تێكچووە، كە جێگەی سەرسوڕمانە. سەیر لەوەدایە هەندێ لەو برایانە لە قودوی هیچ گۆڕانكاری و هاوكێشەیەكدا نین، كەچی شەو ڕۆژ خەمی گەورەیان ئەوەیە، كەی لادەچن و كێ جێیان دەگرێتەوە، ئەگەرچی لە بنەڕەتدا ئەو پۆستە بچووكانە بەر هیچ گۆڕانكارییەك ناكەون و حكوومەت خەریكی شتی زۆر گەورەترە!.

• یەك لەو برادەرانە خراپ كەوتۆتە خۆی، ڕۆژ نییە تەلەفۆن بۆ گۆڤار و ڕۆژنامەكان نەكات، كە هەندێك تەسریحی نوێی هەیە، ئەگەرچی تەنیا قسەی ڕووتن، بەڵام هەر واز لەو خووە تاڵە ناهێنێت، ئەویش دیارە موشتەریی خۆی هەیە، چونكە دوو سێ كەسی بە ناو ڕۆژنامەنووس دەوری دەدەن و پارەی چاكی لێدەستێنن لە بری بڵاوكردنەوەی ناو و وێنەی ئەو برایە، كە كاتێك وێنەی خۆی لە ڕۆژنامە دەبینێ خۆی لێدەبێتە جەنابی (جانەوەر) و هەموو شتێك لەبیر دەباتەوە، تەنانەت ئەسڵ و فەسڵی خۆی!.

• بە ڕاستی وامدەزانی كە ئەو برایە تاقە كەسێكە كە تووشی نەخۆشی كورسی و مانەوەی كورسی بووە، بەڵام پاشان بۆم دەركەوت كە جگە لەو، دەیانی دیكەیش هەمان ئازاری مانەوەیان هەیە، تەنانەت بڕوابكەن كە بەرپرسێك دەناسم، كە مامەڵە لەگەڵ ڕۆژنامەنووس دەكات.. هەواڵ بە 25 هەزار، ڕاپۆرت 50 هەزار، دیمانە 100 هەزار!!!.

© 2017 Hawler