تشرینی دووەم 16, 2018

هیچی نوێ لە ئارادا نییە!

ئاریان فەرەج

 

حزبێك توشی قەیرانی جێگرتنەوەی كەسی یەكەم دەبێت، سەركردەكانی حیزبێك پێكەوە هەڵناكەن، كەسانێك بە پێگەی خۆیان رازی نین و خۆ بە شایستەی زیاتر دەزانن، كۆمەڵێ بەرژەوەندی بەریەك دەكەون و تێكناكەنەوە، رق و لێكدی توڕەیی دەبێتە پرنسیپ، دەستێكی نادیار لە پشتەوە گەمەیەك بە داشی دامەكان دەكات، یەك لە دوای یەك تان و پۆی ئینشقاق و مەكۆی بەرژەوەندخوازییەكی دیكە دادەمەزرێن، حزبێكی دی و ناوێكی دی و خیتابێكی دیكەی بریقەدار و سۆزخەڵەتێن دێتەمەیدان. ئەم و ئەو دەست دەدەنە دەستی یەكدی و خۆ لە خیتابە ئایدیۆلۆجییە ئاسمان و رێسمان لێكدورەكانی نێوانیان دەخافڵێنن، گەلەكۆمەكێ و سەنگەربەندیی دیكە دەخەنە بازاڕەوە. لێكترازانێكی دیكە لە كایەی سیاسیی لێكترازاو و شپرزەی كوردستاندا بەرهەم دێت.
لە خیتابی موعلەنی ئەم بەرە و گەلەكۆمەكییە تازە هەڵتۆقیوەدا، فریاد رەسێكی موژدەبەخش و پاكیزە و دەست و داوێن پاك خۆی بە خەڵكی بەش مەینەت دەناسێنێ. فریادرەسەكە هەمان گۆشتخۆر و گۆشتاونەویستەكەی جارانە، هەمان شان ئارداوی و خەتابارو شەریكە كەتنەكەی جارانە، كەمێك شانی خۆی دەتەكێنێ و دەمامكێكی نوێ دەپۆشێ و بە ناوێكی دیكەوە دیتەوە بازاڕ.
هەرچی دێ و دەیەوێ بە دوو قسەی بریقەدار، بە دوو وەعد و بەڵێنی هەنگوینی، پاشخانی دوێنێی خۆی پاكاتەوە و هەرچی كردووە لە بیری میللەتی بباتەوە و خۆی لە خەڵكی كارەساتدیدەی كوردستان بكات بە خدری زیندە و هەڵگری چارەی سیحری و مژدەبەخشی خۆشگوزەرانی و شامی شەریف. لە سەر زەمینی واقیعیش هەولێری گوتەنی چ لە گۆڕێ نییە و تەنیا و تەنیا گێژەڵوكەی ناو فنجانێكی بچوكە. شەڕی بەریەككەوتنی بەرژەوەندی و بەرچاوتەنگیی سسیاسییەكانە و وەك پڕۆژەی ئیسلاح و چاكەخوازی و ئینقاز، بە خەڵكی ماندوو و تێربوو لە قسەی بریقەدار، دەفرۆشرێتەوە.
بەرژەوەندیی كوردستان لەم هەلو مەرجەدا چ لە ناوخۆ و چ لەسەر ئاستی عێراق هاودەنگیی و پێكەوەیی هێزە سیاسییەكانی دەخواست. قەیرانەكانی ناوخۆ و ئەوانەش كە لە دەرەوە ڕا یەخەی كوردستانیان گرتووە، دەرهاویشتەی لێكترازان و فرە بەرەیی و رێكنەكەوتنە، ئەم قەیرانانە نەك بە ئینشقاق و میحوەربەندی و سەنگەرلێكدی گرتنی زیاتر چارەسەر نابن، بەڵكە قوڵ و قوڵتر دەبنەوە. خۆ ئەگەر ئەم لۆژیكە بەرچاوتەنگ و حیزبخوازە لە سەر حسابی نیشتمانسالاری هەر بەردەوام بێ، رۆژێ دێ هەمومان دەبینە پاشای عەرشی كەلاوە.

© 2017 Hawler