ئازار 06, 2021

- لە شاری قەڵادزێ‌، لە رۆژی ڤالانتاین، باوكێك بێ‌ گوێدانە لۆمەی خەڵك دەستی كچەكە گوڵفرۆشەكەی گرت و لە شەقامی سەرەكی ئەو شارە یارمەتیدا بۆ ئەوەی گوڵە‌كانی بفرۆشێت، ئەو باوكە پێیوایە كە پێویستە هاوكاری كچەكەی بكات بۆ ئەوەی لە پیشەكەی سەربكەوێت و لە دوارۆژدا ببێتە خاوەنی سەرچاوەی ئابووری خۆی.

 

- "ئەنگۆزی ئوكونجو" یەكەم ئافرەت و یەكەمین ئەقریقییە لە مێژوودا كە پۆستی سەرۆكی بازرگانی جیهانی پێدەبەخشرێت، "ئەنگۆزی" تەمەنی 66 ساڵە و خەڵكی نیجیریایە، دەرچووی بەشی ئابوورییە لە زانكۆی هارواردی ئەمریكی، و ماوەی 25 ساڵ لە بانكی جیهان كاری كردووە و دواتر لە ساڵی 2003 وەك وەزیری دارایی نیجیریا دەستبەكاربووە، هەرچەندە سەرۆكی پێشووی ئەمریكا"دۆناڵد ترامپ" بۆ وەرگرتنی ئەو پۆستە دژایەتی دەكرد، بەڵام دواتر بە هاوكاری "جۆ بایدن" سەرۆكی نوێی ئەمریكا ئەو بەرپرسیاریەتیەی پێبەخشرا.

 

-"فران گولدمن" ئافرەتێكی تەمەن 90 ساڵە و خەڵكی شاری "سیاتل" لە ولایەتی واشنگتۆنی ئەمریكایە، ئەو ئافرەتە بە تەمەنە بۆ وەرگرتنی ژەمە ڤاكسینی كۆرۆنا كە دەبوایە لە كاتی خۆیدا ئامادە بێت زیاتر لە 9 كیلۆمەتر بە پێ‌ بە هاتن و چوون دەبڕێت بۆ ئەوەی لە كاتی خۆیدا ژەمە ڤاكسینەكە وەربگرێت، هەڵبەتە ئەوەش بە هۆی ئەو شەپۆلە بەفرە زۆرە بوو كە هەفتەیەك لەمەوبەر ئەو شارەی گرتەوە و بەو هۆیە رێگاكان داخرابوون، "فران" لەو بارەوە دەڵێت: من بۆ وەرگرتنی ڤاكسین شەو و رۆژ هەوڵمدەدا كە ناوی خۆم تۆمار بكەم، ئێستا كە كاتی هاتبوو بڕیارمدا لە كاتی خۆیدا ئامادە بم و ئەو رێگە دوژوارەبە پێ‌ ببڕم.

 

- بە پێی لێكۆڵینەوەكانی دەروونناسی، ئەو دایكانەی لە ناوەندی دووگیانیدا تووشی نیگەرانی و دڵەراوكێی بەهێز دەبن، منداڵەكانیان لە دوای لەدایك بوون، بە گچكەیی یان بە گەورەیی تووشی گرفتی كرداری دەبن، پزیشكانی زانكۆی ئۆكسفۆرد لە كۆتایی لێكۆڵینەوەكەیاندا رایانگەیاند، كە پێویستە دایكان لە كاتی دووگیانی لە كەشێكی ئارام و دوور لە دڵەراوكێ‌ بەسەر بەرن و ئەوەش پێویستی بە یارمەتی كەسە نزیكەكان و بە تایبەتی هاوسەره كان هەیە كە یارمەتیدەر بن بۆ ئەو مەبەستە.

 

 

ئا:نەسرین حەسەن

 

© 2017 Hawler